Dialuna a cuminza cu tratamento di e contenido: - ORANJESTAD (AAN) – Ministerio Publico, mediante Officier van Justitie, mr. Patrick van der Biezen,
a duna un declaracion tocante e Caso IBIS, cu ta den apelacion, na e momentonan aki, door di OM mes.
Fiscal van der Biezen a splica cu na e momentonan aki e ta fungi como “Press Officier” di Ministerio Publico, pa informa prensa y pueblo di Aruba.
Dialuna, exactamente 9.45’or di mainta, e tratamento di e contenido di e caso a cuminza den Corte, Fiscal van der Biezen a indica, na unda tres Huez di Corte di Apelacion lo bay trata e seis casonan di e seis sospechosonan, cu casualmente tur tabata presente.
Fiscal van der Biezen a menciona cu tin un planning traha pa e casonan, den e dianan benidero, y e prome tabata Dialuna 30 di Augustus awor, cu tratamento di e contenido. “Esey ta e behandeling cu ta bay tuma lugar y ta dura un dia y mey, pues probablemente te mañan mainta, y mañan merdia e representante di Ministerio Publico; esta, e abogado general, lo bay cuminza cu su rekisitor unda cu e ta bay trece dilanti e punto di bista di Ministerio Publico, den tur seis caso.
Diaranzon e defensa lo haya oportunidad di trece su argumentonan dilanti y diahuebs tin ingetrokken mitad dia, pa asina por trata e duplica. Nos no sa ainda si diahuebs e caso ta wordo cera door di Hof; si esey pasa, esey kiermen cu despues di tres siman, no mas tarda cu 21 dia despues cu e caso wordo cera lo bay bin un sentencia.
Ta bon pa menciona tambe cu den caso di señor Croes, ken ta e sospechoso principal den e caso aki, cual ta e motibonan pa cual Ministerio Publico a apela contra e caso.
Uno ta cu el a wordo ‘vrijgesproken’ parcialmente, dus un parti di e hecho number uno. Tin diferente hecho y diferente maneho y, den un di nan dos parti chikito a wordo absolve y Ministerio Publico ta haya cu tin suficiente prueba di esey tambe.
Y tambe e castigo. Ministerio Publico a pidi e dos fiscalnan cu a atende e caso den Prome Instancia, pa kita e ‘passief kiesrecht’ (derecho di wordo elegi) pa tempo maximo. Pues e no por ofrece su mes como candidato riba un lista di partido. E no por ta candidato riba un lista, y Huez no a bisa nada over di esey. Dus, pa e motibo ey tambe Ministerio Publico a apela tambe, den e caso aki”, Fiscal mr. van der Biezen a señala.
Aworaki mester warda ki dia nan lo trata esaki pa asina por haya mas informacion tambe un bez cu e dianan aki ta tras di lomba, Fiscal van der Biezen y encargado di prensa a duna di conoce.
