Otmar Oduber ta haya cu esaki ta un persecusion politico
- Reaccionnan di Fiscal vs. Abogadonan
- Marisol a crea un storia 28 punto contra dje
ORANJESTAD (AAN): Dialuna mainta tabata e ultimo parti di tratamento di e caso Flamingo. E dos Fiscalnan di Ministerio Publico a reacciona riba e defensa di e abogadonan y despues e abogadonan a reacciona riba loke e dos Fiscalnan a trece dilanti.
Ministerio publico kier caba cu Otmar: Despues cu e Fiscalnan y abogadonan a hiba palabra, Otmar Oduber a haci uso di su derecho di ultimo di palabra.
Otmar a bisa Hues cu e ta haya cu Ministerio Publico ta haci todo por todo pa Otmar wordo castiga. El a bisa cu for di comienso na 2018 ora e tabata minister, el a duna permiso na Landsrecherche pa haci investigacion na DIP. El a duna full cooperacion pasobra el a kere cu ta pa e caso Avestruz pero awor ta resulta cu Landsrecherche tabata kier haci investigacion pa cuminsa caso contra Otmar mes.
Otmar a bisa Hues cu Marisol Tromp, kende a reemplac’e, a wordo uza cu dos otro persona pa crea henter un storia di 28 punto pa persigui Otmar.
Otmar a bisa Hues cu e caso di tereno Malmok, el a duna orden na e dama Wever pa haci coreccion riba un asunto di tereno cu tabatin dos reservacion y awor Ministerio Publico ta culp’e di ta faborece hende.
Pa loke ta e asunto di ambtenaarnan fantasma, Otmar a bisa Hues cu tur tres empleado tabata traha corectamente p’e. Otmar a bisa cu e ta haya cu Ministerio Publico ta bin cu speculacionnan cu no ta cuadra cu e realidad. El a remarca cu ta straño cu Ministerio Publico no a papia cu ningun cu a traha cu nan. El a bisa cu no tin ningun prueba cu e tres hendenan no a traha. Otmar a bisa Hues cu hasta esnan sinta na front desk, cu Landsrecherche a bay puntra, nan mes a bisa cu nan sa mira e personann bay serca minister.
Otmar a bisa cu e conoce Esser pa masha hopi aña kende ta un persona hopi conoci pa semper yuda hende. Otmar a bisa cu el a keda sorprendi cu Ministerio Publico ta acusa Esser di tabata faborece hendenan di partido POR. El a bisa Hues cu e ta lamenta cu Marisol Tromp a haci acusacion falso pa asina Ministerio Publico cuminsa cu caso contra Otmar.
Otmar a conclui cu e ta haya cu esaki ta un persecusion tras di dje pa caba cu ne. Otmar a gradici Hues pa a honra su peticionnan pa scucha hendenan na Hues Comisario. E ta spera cu husticia ta prevalece.
