ORANJESTAD (AAN): Oficialnan hudicial di Landsrecherche a keda cla cu interogacion di e ex-politico Gaby Werleman den e investigacion di Caso Avestruz. Y pa tal motibo cu bendicion di Ministerio Publico, riba Diahuebs 29 di April el a wordo libera.
Su pareha cu tambe a keda deteni mesun dia, Dialuna siman pasa, tambe a wordo libera caba un dia prome, esta Diaranson 28 di April 2021.
Mientras tanto Huez Comisario a ordena prolongacion di ex-locutor Leoncita Arends y e ta encarcela aworaki na Prison di KIA.
Riba Diaranson, Landsrecherche a aresta Franklin Abath, kende pa hopi tempo tabata e persona na cabez di Domeinbeheer y cu despues a bira DIP. E ta wordo interoga awor pa haya sa mas di e documentonan cu nan lo a logra haya den Caso Avestruz.
