El a mata Sayuri Petronia...
- Izak su comportacion anti-social a empeora ultimo añanan
ORANJESTAD (AAN): Diaranson merdia, Hof di Corte Superior, via video conference, a dicta sentencia den e caso penal contra Izak Principaal. Den sala di Corte tabata presente, e tata di Sayuri, e ruman homber di Sayuri y mas famia. Tambe tabata presente e mama y e ruman muhe di Principaal.
Izak Principaal a wordo haya culpabel di a tira mata Sayuri dia 4 Juni 2021. Tambe e ta wordo haya culpabel di a participa den un asalto arma caminda el a usa cuchiu pa kita auto di un hende. Principaal tambe ta wordo haya culpabel, di hunto cu Celaire, a haci un drive by shooting na San Nicolas caminda diferente persona a resulta herida.
Exigencia di P.G.: Luna pasa tratamento di e caso a tuma lugar caminda Procurador General (PG) a bisa cu dia 4 Juni 2021, Sayuri (conoci pa amigonan como ‘Sayu’) a wordo tira mata door di Principaal. Desde 4 Juni 2021, Principaal ta sera y en espera di un decision. Famia di e victima tambe kier un fin den esaki. PG a bisa cu Principaal a haci delitonan serio.
Corte Supremo a destrui e sentencia di Hof pasobra Hof a condena Principaal na dos castigo. E tempo ey Principaal tabatin 17 aña caminda a usa e castigo hubenil. PG a siugi bisa cu Principaal tabata envolvi den un drive by shooting y despues e tira mata di Sayuri. Dos biaha e mesun arma a wordo usa.
Mester aplica castigo di adulto: PG a bisa Hof cu Psychiater a papia cu Principaal e aña aki y Psychiater ta haya cu mester usa castigo di adulto. PG a mustra cu Psicologo, for di 2022 a bisa cu mester atende cu Principaal como adulto. E aña aki e Psicologo a bolbe evalua Principaal y ta keda mantene su punto di bista. Ta asina cu a constata cu Principaal tin un actitud anti social. PG ta haya cu mester considera Principaal como adulto.
Na opinion di PG, e meta di castigo ta pa evita cu delitonan serio ta bolbe sosode. Tambe pa manda señal den comunidad cu no ta tolera tipo di comportacion asina. PG a sigui bisa cu e meta di castigo tambe ta pa paga pa e delito cu el a haci. PG ta haya cu ta hopi complica pa yega na un castigo pa Principaal.
El a mustra cu desde Juni 2021 Principaal ta sera den KIA y no a haya ningun tratamento. Door di tur e tempo aki e problema anti social di Principaal a bira mas serio. PG ta haya cu Principaal mester haya tratamento den clinica pa asina mira cambio den actitud di Principaal. Esaki por cu of sin condicionnan. Na opinion di PG, castigo di prison so, no ta e solucion pa Principaal. E ta haya cu tratamento na Hulanda den un clinica lo ta esencial, pero e pregunta ta si Principaal lo ta dispuesto y si Principaal lo por cumpli cu e condicionnan.
PG ta haya cu Principaal mester wordo poni na disposicion di Hulanda pa haya tratamento obligatorio. Tratamento obligatorio ta mas o menos 4 aña. Tratamento cu condicionnan lo por dura 6 aña. PG a bisa cu tabatin combersacionnan cu autoridadnan na Hulanda pa esaki por sosode. PG a exigi 8 aña di prison y banda di esaki tratamento obligatorio pa Principaal. PG a bisa cu subsidiario e ta exigi e tratamento obligatorio den un clinica cu condicionnan cu ta pa 6 aña.
Sentencia: Hof a bisa cu e unico asunto cu mester tuma un decision ta e castigo. Tur e delitonan ta proba. Hof a bisa cu abogado di Principaal, mr. Kock a pidi castigo igual na loke Principaal a sinta caba y cu condicion. PG a exigi 8 aña di prison y cu Principaal ta wordo poni na disposicion di tratamento psychiatrico.
Delitonan hopi serio: Hof a mustra cu Principaal a haci su mes culpabel na 3 delito serio. A tira mara Sayuri, a participa hunto cu otronan den un asalto arma riba 2 homber. Principaal tabatin un cuchiu y a kita auto di un hende. E otro delito ta un drive by shooting caminda 4 hende a resulta herida.
Por a nota cu mientras cu Hof tabata papia, e tata di Sayuri tabata yora.
Castigo: Hof a bisa cu a studia raportnan cu a wordo discuti cu Principaal durante tratamento di e caso na November 2025. Psychiater y Psicologo a constata cu Principaal tin problema di personalidad. Nan a conclui cu Principaal ta menos responsabel pa su actonan.
Hof a bisa cu no ta bay aplica castigo hubenil. Hof a mustra cu loke Principaal a haci e tempo ey no ta cuadra pa un castigo hubenil sino castigo di adulto.
Pa cu e tratamento, Hof a mustra cu no tin facilidad na Aruba. E tratamento lo mester tuma lugar na Hulanda na un institucion psychiatrico. Hof a mustra cu si Principaal no kier sigui e tratamento, e lo bira obligatorio, o sea sera den un institucion.
Hof ta spera cu Gobierno lo haci e preparacionnan pa Principaal bay Hulanda. E condicionnan mara na e castigo ta encera cu Principaal mester sigui indicacion di Reclassering. Tambe cu un institucion di psychiater lo ta encarga cu e tratamento. Psychiater lo dicidi si e tratamento mester ta den un institucion of otro forma.
Hof a condena Principaal na 6 aña di prison, kitando e tempo cu e ta sera den KIA, y cu Principaal ta haya tratamento. Hof a pone medida di pago pa Principaal pa e dañonan per huicio. E 16 mil Florin pa e lamentable caso Sayuri y si Principaal no paga e lo mester bay 115 dia sera. E 4 mil Florin pa e homber T. cu tabata e victima di e asalto arma.
Riba e potret di archivo por mira Sayuri, kende a wordo mata siendo e tabata den pleno flor di su hubentud. Tambe por mira su graf cu ta wordo manteni den forma pristino door di famia y amigonan.
