Riba peticion di abogado di e sospechoso
ORANJESTAD (AAN): Diahuebs mainta abogado mr. Rosenstand a haci peticion na Hues pa scucha e dama agente Polis, J., cu lo a wordo molestia como testigo den e caso penal contra su cliente, e homber C. Hues a pospone e caso un rato pa e evalua e peticion y ora el a bolbe el a bisa cu di e diferente testigonan cu mr. Rosenstand a pidi, e ta honra e peticion pa scucha e dama agente Polis J.
Awor Hues Comisario lo bay interoga e dama agente Polis J. y despues lo bay sigui cu e caso.
Acusa di a molestia Polis femenino: E homber C. di 43 aña riba Diahuebs mainta a presenta dilanti Hues, caminda Fiscal ta acus’e cu riba 15 Juni 2025, el a haci actonan inmoral cu e dama J. Esaki lo a sosode den un bar na San Nicolas, caminda C., lo a primi J. na su bil.
Hues a mustra cu e dama J. a declara cu e tabata na un bar na San Nicolas y C. a yega eynan. Den pasado C. tabatin un relacion cun’e. Segun J., C. a dun’e sunchi y primi su bil.
Sospechoso ta nenga: C. a nenga di a mishi cu e dama J. Segun C., el a bay den e bar y amigonan a bis’e cu tin un dama ta blo keda wak C. C. a bisa Hues cu el a duna e dama señal y J. a bay serca dje. El a bisa J. cu el a haci aña y J. a dun’e un sunchi. Segun C., e no a mishi cu J. El a bisa cu na dado momento J. a choke y bis’e, no mishi cu mi. Un amigo di C. a intermedia y a kita nan for di otro. E ora J. a bay pafor. Despues C. a sali y J. lo a tira palabra p’e.
Hues a mustra cu tin un testigo K., kende a bisa Polis cu el a mira C. a braza J. y su man a bay tras di J. su lomba. E ora J. a bis’e pa stop di mishi. Hues a bisa cu Polis a interoga C., kende a bisa cu e tabata bebi y ta corda cu nan tabatin un discusion y C. tin berguenza di esaki. Hues kier sa kico C. kiermen cu e tin berguenza. C. a bisa Hues cu e tin dos yiu muhe y e tin su pareha. El a bisa cu e lo no bay haci algo asina. Tambe el a bisa cu e no kier pa su pareha bay pensa cos cu no ta berdad.
Fiscal: Fiscal a bisa Hues cu e ta haya proba cu C. a mishi cu e dama J. Fiscal a remarca cu si C. tabata burachi, e mester tene su mannan na su curpa y no ta bay mishi. Fiscal a exigi 50 ora di trabao pa comunidad y 2 siman di prizon condicional cu 2 aña di prueba.
Abogado a pidi pa scucha testigonan: Abogado mr. Rosenstand ta haya cu e investigacion no a wordo haci completo. E abogado a bisa cu Fiscal ta acusa C. di a gara bil di e dama J. E abogado a remarca cu ta straño cu un agente di Polis ta laga hende mishi cun’e di e forma aki. El a bisa cu e dama J. a declara na Polis cu el a bay cuminda C. y dun’e sunchi.
Despues el a bay cuminda otronan y a sinti hende gara su bil. E ora ey el a gara C. na su garganta. Na opinion di mr. Rosenstand, por bien ta cu un di e otronan cu e dama J. a bay cuminda, a mishi cun’e y no C.
E abogado a mustra cu su cliente C. a bisa Polis cu el a topa cu su ex amiga y no a mishi cun’e. E dama J. mes no kier a haci denuncia contra C. sino a pidi asistencia di Polis pa un homber burachi. E abogado ta haya cu e testigo no a mira tur cos sino a tende di J. cu C. lo a mishi cu su bil.
E abogado a señala cu un testigo cu a wordo yama pa duna declaracion, no a presenta. E testigo aki lo a mira tur cos pero no kier papia. E abogado ta haya cu no tin claridad kico realmente a pasa.
E abogado a pidi Hues pa scucha e dama J. mes como testigo. El a mustra cu e testigo homber G. cu C. a menciona, no a wordo scucha door di Polis. E dama A. testigo cu J. mes a menciona, no a duna declaracion. Abogado ta haya cu e declaracion di e testigonan aki lo duna un bista cla di kico realmente a pasa. Na opinion di mr. Rosenstand, si keda sin scucha e testigonan, ta perhudica C. den su defensa. E abogado ta haya cu no tin ningun indicacion cu C. a gara e dama J. na su bil y pesey mester declara C. liber.
Polis femenino lo wordo interoga: Hues a pospone e caso pa evalua y a bolbe. El a bisa cu Fiscal tin razon cu tin prueba di sosten caminda tin testigo cu a mira C. pone man patras di lomba di J. y cu J. a reacciona, “no mishi cu mi”.
Hues a bisa cu di tur e testigonan cu e abogado a pidi, e ta honra e peticion pa scucha e dama Polis J. como testigo. Hues a pospone tratamento di e caso y a instrui pa Hues Comisario interoga e dama J., caminda mr. Rosenstand lo por ta presente. Ora cu Hues Comisario caba cu e interogacion, e lo manda un relato pa Hues kende lo stipula un fecha pa sigui cu tratamento di e caso.
