Debi cu abogado a cuestiona forma di investigacion no corecto
- Enfasis riba uzo di IMEI-number y IMSI-catcher
ORANJESTAD (AAN): Diaranson mainta den Corte, abogado mr. Carlo a cuestiona e forma di investigacion incorecto di Polis y RST riba su cliente, e homber E.G. di 22 aña. E abogado a pidi Hues pa declara e representante di Ministerio Publico, Fiscal, no admisibel y pa su cliente wordo laga liber. Hues, despues di a scucha reacciona di Fiscal, a ordena pa Fiscal trece mas claridad den e investigacionnan.
Hues a bisa cu e no ta haya cu tin violacion di norma manera abogado mr. Carlo a bisa pero si cu e lo por tin consecuencia pa cu e castigo. Hues a pospone e caso pa asina e haya mas claridad for di Fiscal, riba con e investigacion a tuma lugar.
Bende droga y posesion di arma: E acusacion cu Fiscal a presenta den Corte contra E.G. ta cu entre Mei 2025 y 27 November 2025, E.G. a bende droga y tabata den posecion di arma di candela.
Abogado mr. Carlo a pidi Hues pa declara Fiscal no admisibel. Esaki pasobra e abogado ta haya cu Polis y RST a viola normanan den e investigacion, cu ta viola derecho di G. pa un proceso husto. E abogado a menciona sentencia di Corte Supremo caminda ta mustra cu ora viola norma di derecho di proceso husto mester declara Fiscal no admisibel.
E abogado a bisa cu Fiscal ta sospecha cu G. tabata bende marihuana y tabatin arma di candela. Na opinion di mr. Carlo, henter e caso ta traha for di informacionnan di un smartphone. Tur cos ta basa for di un cellular cu no ta existi. E abogado a bisa Hues cu Polis y RST a bay tras di un device number IMEI robez. E number di IMEI ta di un cellular cu no ta existi. Abogado a bisa cu el a bay verifica via computer e device number IMEI cu Polis ta menciona den su raport y ta resulta cu e number no ta existi. E abogado a señala cu tur e scuchamento di cellular y baha informacion di cellular, ta for di un cellular cu no ta existi.
Mester declara Fiscal no admisibel: E abogado a sigui bisa cu RST a uza un ley di Hulanda pa haci uzo di un IMSI-catcher pa scucha combersacionnan, pero e ley ey no ta existi na Aruba. Na opinion di mr. Carlo, ta solamente Direccion di Telecomunicacion (DTZ) por haci esaki. El a pidi Hues pa declara Fiscal no admisibel y cu tur e pruebanan cu Polis a haya ta ilegal y cu mester declara G. liber.
Na opinion di abogado, Polis y RST a haci investigacionnan sin tin autorizacion di Hues Comisario. E abogado a mustra cu Polis a detene G. y despues a haci investigacion na e cas y no a haya nada. Tur cos ta a base di potretnan riba smartphone.
E abogado a bisa Hues cu apesar cu el a pidi Fiscal e aprobacionnan di Hues Comisario pa a haci e investigacionnan, e no a haya esakinan.
E pruebanan no ta legal haya: E abogado a bisa Hues cu e ta haya cu e investigacion ta inhusto y como tal no por usa e pruebanan. El a bisa cu Polis y RST a usa un IMEI cu no ta existi y no ta ningun cellular. Investigacion ta mustra cu e number corecto di IMEI di e cellular di G., ta otro cu loke ta para den e relato di Polis. Tur e scuchamento di e cellular ta basa riba e IMEI di un cellular cu no ta existi. A uso un IMEI robez pa haya tur pruebanan siendo cu esey no ta e IMEI di e cellular di G. cu a confisca.
E abogado a señala cu Polis y RST no por a usa e aparato IMSI-catcher sin haya aprobacion di DTZ. El a señala cu un empleado di DTZ a duna aprobacion no por escrito y esaki no por. Ta solamente Minister por haci esaki. E abogado tambe a cuestiona e scuchamento di combersacionnan y mensahenan. El a señala cu Polis y RST a scucha esakinan for di un cellular cu no ta esun di G. Mr. Carlo a remarca, for di unda RST a saca e informacionnan pasobra e IMEI no ta existi. E no ta e cellular di G.
Reaccion di Fiscal: Fiscal a pidi Hues pa pospone e caso un rato pa asina e bay prepara su reaccion mirando cu mr. Carlo a trece hopi punto dilanti. Despues a sigui cu e caso caminda Fiscal a bisa cu e number IMEI, segun el a compronde for di e experto di RST cu el a yama, e promer 14 cifranan ta valido y e otronan no. Fiscal a bisa cu door cu e abogado no a haci’e e preguntanan anterior, e no por duna splicacion tecnico.
Pa loke ta e ordennan pa haci investigacion, Fiscal a bisa cu enberdad e ordennan no a bay Polis. El a bisa cu tin permisonan duna door di Hues Comisario. Fiscal a sigui bisa cu Fiscal mes por duna permiso pa e IMSI-catcher pa scucha cellular.
Fiscal ta haya cu no a viola norma di investigacion. Pa loke ta e aprobacion cu mester duna pa por haci investigacion, Fiscal ta mustra cu tin aprobacion di Hues Comisario pa haci investigacion. Fiscal a bisa cu si resulta cu lo a viola norma, esaki no tabata intencional. El a pidi Hues pa rechaza peticion di mr. Carlo.
Hues ta pospone caso pa haya claridad: Hues a pospone e caso un rato pa bay evalua y despues a bolbe y tuma un decision. Hues a bisa cu e no ta haya cu tin violacion di norma pero cu esaki lo por tin efecto pa cu e castigo. Pa loke ta e peticionnan pa investigacion di Hues Comisario, Hues a instrui Fiscal cu e kier pa mira tur esakinan.
Hues a bisa cu e ta confia cu tur ta bon sino e ta violacion di norma. Hues a rechaza e peticion di abogado mr. Carlo pa declara Fiscal no admisibel. Hues a sigui bisa cu e forma di investigacion por afecta e prueba. Hues tambe kier pa Fiscal laga verifica e numbernan di IMEI pa tin claridad. Hues a bisa cu ta pospone e caso pa 8 Juni 2026 pa 10’or di mainta.
Abogado a pidi Hues pa laga G. liber pendiente e caso. Fiscal a remarca cu tin e parti di arma di candela. Tin potret di arma semi automatico y tin castigo pisa pa esaki. Hues a dicidi cu tin motibo di peso y cu G. ta keda cera te 8 Juni 2026 ora trata e caso.
