Mientras cu Fiscal a exigi 3 aña di prison
ORANJESTAD (AAN): Tabatin un interesante sentencia di Hues di Corte den Promer Instancia den e caso penal cu Ministerio Publico a cuminsa contra e homber di inicial D.
Ta asina cu despues di tratamento di e caso luna pasa, Hues a duna orden pa laga e sospechoso D., sera na KIA, liber na pendiente di su sentencia. Esey caba ta duna indicacion cu algo no normal ta pasando.
Fiscal a exigi 3 aña di prison: Tratamento di e caso a tuma lugar luna pasa caminda Fiscal a acusa D. cu na 2006, el a abusa sexual di su yiu muher R., kende e tempo ey tabatin 8 aña y actual 23 aña. Fiscal ta haya D. culpable a base di declaracion di tres testigo di cual dos ta ruman muher di D.
Nan a bisa cu mas o menos 15 aña pasa R. a bisa nan cu D. a mishi cu ne na su parti intimo. Fiscal a exigi 3 aña di prison di cual 6 luna ta condicional cu un tempo di prueba di 2 aña.
Defensa di Abogado: Abogado di D., mr. Mohamed a bisa Hues cu e ta haya cu no tin prueba di sosten y cu ta solamente declaracion di e yiu muher tin. E abogado a mustra riba sentencia di Corte Supremo cu ta mustra cu den casonan di abuso y inmoralidad, ademas di e declaracion di e victima mester busca prueba di sosten. Si no tin prueba di sosten no por castiga e sospechoso.
Sentencia: Hues a bisa cu e acusacion contra D. ta cu na 2006 e a haci actonan inmoral cu yiu muher R. (di 8 aña). Hues ta haya cu no tin suficiente prueba.
Hues a mustra cu e tres testigonan, di cual dos ta ruman muher di e sospechoso D., a declara di a tende di R. mas o menos 15 aña pasa, cu su tata D., a mishi cun’e, Hues ta haya cu e declaracionnan aki ta confirma e denuncia di R. pero no por worde usa como prueba di sosten.
No tin prueba di sosten: Hues a bisa cu e declaracionnan aki no por worde usa como prueba di sosten pasobra tur esaki a bin for di un Fuente, esta e mucha R.
Hues a sigui bisa cu e yoramento di R. ora cu e tabata contra dos di e testigonan, tampoco por worde uza como prueba di sosten.
Hues a mustra cu e declaracion di e ruman muher di e sospechoso D., cu a bisa cu D. a bis’e cu esaki a sosode tempo cu e tabata adicto na droga y no tabata conciente kico e tabata haci, tampoco no ta prueba di sosten. Hues a mustra cu e ruman muher despues a declara cu e ta supone cu su ruman D. a haci’e pasobra e tempo ey e tabata adicto na droga pero D. mes no a bis’e nada.
Hues a conclui cu tur esaki ta trece cu ne cu no tin prueba di sosten y mester declara D. liber. Hues su decision ta cu e ta declara D. liber di e acusacion di a abusa di su yiu muher.
Por a mira expresion di alegria riba cara di D. ora el a tende cu el a worde declara liber.
