El a haya boet di 1.250 Florin y e tabata sin rijbewijs valido
ORANJESTAD (AAN): Por corda ainda con dos luna pasa, Alto Comisario di Polis a confirma cu nan a suspende un Sub-Inspector burachi cu a ocasiona un accident na Bakval den oranan di marduga.
“Nos ta lamenta e sucedido pa loke a pasa e colega como tambe e otro coleganan cu tabata na e lugar,” ta loke Altocomisario Ramon Arnhem a declara, relaciona cu loke a socede Diasabra 19 di Augustus den oranan di marduga na Bakval den distrito di Noord. “E caso aki ta worde tuma na serio.”
E marduga ey, ora cu Patruya di Polis a yega a bin nota cu ta un Sub-Inspector di Cuerpo Policial tabata bao influencia tras di stuur, a dal y kibra e Dienstwagen cu e ta coriendo cune.
Polisnan a laga e Sub-Inspector haci test di supla, y ora cu el a supla riba e aparato di Alco Sensor IV, esaki a produci un resultado basta malo pe.
E tabata coriendo e Dienstwagen y debi na su estado di buracheria, a baha di caminda y dal fuertemente contra un auto staciona dilanti un cas.
Altocomisario a tuma decision pa suspende e Sub-Inspector aki.
Rijbewijs no ta valido: E siman aki, Ministerio Publico a informa cu Corte den Prome Instancia a dicta sentencia siman pasa den e caso penal contra e Sub-Inspector K.A.P., kende a causa un accidente di trafico riba 19 di augustus 2023 na Bakval.
Awor prensa a haya sa, cu e marduga ey e Sub-Inspector P. tabata core sin rijbewijs valido y tabata bao influencia di alcohol.
Hues di trafico a conden'e pa un multa di 1.250 Florin y un prohibicion pa stuur auto di 7 luna cu un tempo di prueba di dos aña. Si e sospechoso no paga e multa na tempo, e tin cu sinta 25 dia di detencion. Ademas hues a conden'e pa sigui e curso obligatorio di ‘Alcohol den trafico’.
