Hues ta duna abogado mr. Canwood razon cu e sospechoso a actua den defensa propio
ORANJESTAD (AAN): Gregory Junior Zuleta Rave di 22 aña, sospecha di a mata Corniel Tejada riba 3 Juli 2024 den un cas den Pindastraat, a worde declara liber. Hues ta haya cu Junior a actua den defensa propio ora cu Corniel Tejada a bay riba dje cu cuchiu.
Fiscal a exigi 9 aña di prison: Ta asina cu dia 14 di Maart 2025, dia di tratamento di e caso den Corte di Husticia, den su requisitorio Fiscal a bisa cu e ta haya Junior culpabel di a mata Corniel Tejada. Debi na esey, Fiscal a exigi castigo di 9 aña di prison.
Hues a evalua e caso: Diabierna mainta, Junior y su abogado mr. Canwood a presenta den Corte pa scucha e sentencia.
Hues a bisa den su sentencia cu tin hopi a sosode y 1 April 2025, el a ordena pa laga Junior liber. Hues a bisa cu ta di lamenta cu Tejada a muri. Hues den su evaluacion di e caso a bisa cu ta sospecha Junior di a mata Tejada door di dal’e cu algo na su cabez. Hues a bisa cu el a studia e procesverbaal di Polis cu ta mustra cu dia 3 Juli 2024 Polis a bay na Pindastraat pa un pelea. E agentenan di Polis a yega na e cas y a mira Tejada drumi abao for di tino y hendenan tabata scop cosnan cu tabata benta abao, un banda. E momento ey Junior a bay cerca e agentenan di Polis y a bisa: “mi a dal e cu un pia di stoel pasobra el a saca un cuchiu pa mi”.
Fractura di craneo: Den e autopsia practica riba e victima, Patologo a constata cu door di sla cu un obheto duro na cabez, a fractura e craneo cu a causa morto di Tejada.
A actua den defensa propio: Hues a bisa cu for di declaracion di testigonan por conclui cu 3 Juli 2024, Tejada a bay na cas di Junior y tabata hopi agresivo y tabata grita. El a drenta cas di Junior. A surgi discusion entre Junior y Tejada. Junior tabata kier pa Tejada bay for di e cas, pero Tejada a bay den cushina di e cas y a coy un cuchiu grandi. Tejada a bay cu e cuchiu riba Junior, kende a tira un stoel riba Tejada y un pia di e stoel a kibra.
Tejada a bay for di e cas y a bolbe cu e cuchiu den man y a bay atrobe riba Junior cu tabata para na entrada di e cas. E ora ey Junior a coy e pia di stoel cu a kibra y dal Tejada den cabez y Tejada a cay abao.
Na opinion di Hues, a base di e procesverbaal y declaracion di testigonan cu ta cuadra cu loke ta para den e procesverbaal, Hues ta conclui cu Junior a dal Tejada cu pia di stoel na e parti robez di Tejada su cabez. Esaki a causa fractura na craneo.
No culpabel di asesinato: Hues a bisa cu e ta comparti punto di bista di tanto Fiscal como abogado mr. Canwood, cu no por papia di asesinato. Hues a bisa cu e no ta comparti opinion di Fiscal cu Junior a mata. Hues ta haya cu Junior no a tuma e riesgo cu door di dal Tejada, e lo mat’e. Hues ta haya cu Junior a causa maltrato severo cu a causa morto.
Pero, e abogado mr. Canwood a mustra riba actua den defensa propio. Hues ta haya cu Tejada a bay riba Junior cu cuchiu y anterior a hacie caba. Polis a haya e cuchiu aki na e cas tambe. Hues ta haya cu Junior tabata den un situacion cu e mester e defende su mes. Hues a bisa cu e no ta haya cu Junior tabatin chens di por a core bay.
Na opinion di Hues, e defensa door di dal un biaha so na cabez, tabata necesario pero no tabata exagera. Tur esaki ta trece cune cu Hues ta honra e peticion di defensa propio. Hues no ta haya Junior culpabel y a declar’e liber di a haci un hecho castigabel. Hues a rechaza e demanda di daño di parti di famia di Tejada.
