ORANJESTAD (AAN): E homber M.E. di 35 aña di Hulanda biba na Aruba, riba Diabierna mainta a presenta dilanti Hues pa e caso penal cu Ministerio Publico a cuminsa contra dje.
Tin dos acusacion contra M.E. E promer acusacion ta cu M.E. durante Juni 2022 y 23 Juli 2023 a haci traficacion di hende, door di facilita apartamento na muhernan indocumenta pa haci prostitucion ilegal. E otro acusacion ta cu M.E. riba 16 Augustus 2023 a menaza e homber V.C. cu morto.
Menaza: Hues a cuminsa cu e caso mas chikito cu ta e menaza. M.E. a bisa cu e no a menaza cu arma. El a bisa Hues cu el a bay yama e homber V.C. pa papia loke el a bisa su señora. Hues a mustra cu den e relato di Polis ta para cu M.E. a bisa entre otro (“Ma..o, mi ta tira bo mata” y/of “bin mi lugar awor pa nos mata otro” y riba message di WhatsApp a skirbi: “Hijo de p..a. Te quede esparando. Como una Ma…a no veniste”.
M.E. a desmenti e frasenan cu ta acus’e di dje. Hues a bisa cu na di dos yamada di M.E., V.C. a pone e smartphone riba speaker y un otro hende tambe a scucha e menaza. M.E. ta bisa cu e no a menaza V.C.
Hues a bisa cu M.E. a worde interoga pa Polis caminda el a bisa cu V.C. lo ta maltrata muhernan den hanchi pero e no a menace di morto.
Traficacion di hende: Hues a mustra cu M.E. tin tres bar na San Nicolas. E ta worde acusa di a trece muhernan indocumenta na Aruba of a duna hospedahe na muhernan cu ta indococumenta.
Ta asina cu tabatin 7 muher gara pa Guarda Nos Costa y nan a declara cu cada un tabata huur apartamento 100 Florin pa dia. M.E. a bisa cu e homber G. a bis’e cu e tin un amiga ta bin y cu e ta encarga cu e muher. M.E. a bisa Hues cu el a splica e muhernan e reglanan y no ta acepta prostitucion. Hues a puntra M.E. si e tin permiso pa huur camber pa turistanan. M.E. a bisa no. Hues a bisa cu e muhernan a bisa cu M.E. tabata huur camber cu nan y M.E. a bisa cu e no tabata sa cu nan ta prostituta.
Hues a mustra con e muhernan a declara cu nan tabata huur apartamento na M.E. y M.E. tabata trece clientenan pa “escort service”. Hues a mustra tambe cu Polis a haya chat riba smartphone di e muhernan caminda M.E. tabata duna e muhernan 450 Dollar pa mustra na Inmigacion ora di yega Aruba.
Na cuminsamento M.E. tabata desmenti. Pero despues di interogacion di Hues, M.E. a admiti di a cumpra pasashi.
Hues a sigui haci preguntanan y na dado momento el a bisa M.E. cu e no ta kere nada cu loke M.E. ta splica. pasobra eseynan no ta cuadra.
Segun M.E. el a deshaci di e 3 bar y un otro hende a tuma esakinan over. E ta dedica su mes den diving cual e ta haciendo pa 15 aña. E tin certificado como dive master y trata hendenan cu bira malo door di buceo.
Fiscal: Fiscal a bisa Hues cu na November 2022, Polis a cuminsa cu investigacion ora cu un muher a haci denuncia contra M.E. Muher a bisa cu M.E. a facilita apartamento cu e mester paga 85 Florin pa dia y si paga laat tin cu paga boet. E muher a bisa cu nan tabata haci prostitucion pa M.E.
En total 7 muher a haci denuncia. Fiscal a bisa cu Polis a investiga chat riba WhatsApp entre M.E. cu e muhernan. Fiscal ta haya cu e declaracion di e muhernan ta mustra cu M.E. tabata busca e muhernan for di Colombia y laga nan haci prostitucion caminda nan mester paga 100 Florin pa dia pa e camber. Fiscal ta considera cu M.E. tabata haci traficacion di muhernan.
Fiscal a lesa declaracion di e muhernan cu ta mustra cu M.E. a bisa nan pa na Aruba, bisa cu nan ta turista y ora Inmigracion laga nan pasa, nan ta bay traha pa M.E. Fiscal a bisa cu M.E. tabata ofrece servicio di escort y tabata usa e muhernan. Haya cu M.E. ta responsabel pa e muhernan cu tabata trahando prostitucion ilegal.
Pa loke ta e menaza, Fiscal ta haya legalmente proba. El a mustra riba e chatnan cu ta mustra claramente cu M.E. kier a maltrata e homber V.C.
Pa cu e castigo, Fiscal a bisa cu traficacion di hende ta un asunto serio. Nan por pone salubridad den peliger. El a bisa cu e ta tene cuenta cu ta promer biaha cu M.E. ta cay sera y a exigi 18 luna di prison di cual 6 luna ta condicional cu 2 aña di prueba.
Abogado: mr. D. Croes a cuminsa riba e acusacion di traficacion di hende. E abogado ta haya cu M.E. solamente a ofrece estadia y pa esaki mester a duna un boet y no castigo di prison. Segun mr. Croes, ta un hende so M.E. a cumpra ticket p’e y no manera ta pretende cu ta pa tur siete. E otronan a cumpra nan mesun ticket.
Segun e abogado, no ta den man di M.E. pa e muhernan keda ilegal. El a mustra cu e muhernan por pidi pa haci nan estadia mas largo. Segun mr. Croes, tin hopi extranhero ta keda asina na Aruba. E abogado a bisa cu M.E. no a obliga e muhernan pa haci prostitucion y no a menaza nan. E ta haya cu e muhernan tabata tira culpa riba M.E. pa asina nan no haya culpa.
Pa loke ta e acusacion di menaza, segun mr. Croes, e homber V.C. a papia cosnan for di sla y M.E. a papia bruto cu V.C. Ningun momento a menaza di mata. El a bisa cu mas biaha M.E. tabatin problema cu V.C. cu tabata maltrata muhernan den hanchi na San Nicolas. E abogado ta haya cu mester declara M.E. liber di e acusacion di traficacion di hende. E ta haya e castigo exigi pa Fiscal demasiado halto.
Hues a sera tratamento di e caso y a bisa cu e ta bay studia e caso y dia 12 April 2024 lo tin sentencia.
