Ademas di tratamento obligatorio pa problema mental
ORANJESTAD (AAN): Ayera mainta e homber A.J.R. a presenta dilanti Hues pa scucha su sentencia. Manera DIARIO a publica, Fiscal a exigi 6 aña di prizon pa A.J.R. y tratamento obligatorio (TBS). Hues den su sentencia a pone enfasis cu mester proteha comunidad di A.J.R. El a confirma e exigencia di Fiscal pero a pone mas condicionnan.
NO PROBA INTENTO DI ASESINATO
Hues a bisa cu a keda legalmente proba cu dia 12 Augustus 2025, A.J.R. a purba mata e homber K.v.d.B. door di hink’e 8 biaha cu cuchiu. Hues a declara A.J.R. liber di e acusacion di intento asesinato, cual Fiscal si ta haya proba. Hues ta haya cu no tin suficiente prueba pa mustra cu ta intento di asesinato. Na opinion di Hues, e mensahenan cual Fiscal ta referi na dje, no por saca afor ki tempo nan a wordo manda y no ta suficiente pa cualifica como intento di asesinato.
RECHAZA DEFENSA PROPIO
Hues a rechaza e opinion di abogado, cu A.J.R. a actua den defensa propio. Hues ta haya cu ta A.J.R. mes a bay busca K.v.d.B. Hues a mustra cu riba imagennan di camera di seguridad por a mira claramente cu A.J.R. a bay agresivo riba K.v.d.B. y a saca cuchiu y hinca.
CASTIGO ANTERIOR NO A YUDA
Pa cu e castigo, Hues a mustra cu A.J.R. a hinca K.v.d.B. 8 biaha y K.v.d.B. por a muri. Tambe Hues a mustra cu e yiu homber di K.v.d.B. tabata presente ora di e hincamento y hasta a cana bay serca su tata.
Hues a expresa cu loke ta preocupante ta e hecho cu apenas A.J.R. tabata liber 2 siman for di KIA pa un castigo 10 aña pa intento di mata, e ta bay haci e mesun cos. Hues ta haya cu e castigo di 10 aña di prizon, no a yuda cu A.J.R. pa stop.
MESTER DI TRATAMENTO OBLIGATRIO
Hues a bisa cu e ta tene cuenta cu e raportnan di psycologo y psychiater. Tambe Hues ta tene cuenta cu e raport di Reclasering. E raportnan di psycologo y psychiater ta mustra cu A.J.R. tin un actitud anti social y paranoid. E expertonan a conclui cu A.J.R. tabata paranoid ora di incidente. Nan ta haya cu A.J.R. ta menos responsabel pa su actonan. Psycologo y psychiater ta teme cu A.J.R. lo bolbe haci e mesun cos.
E expertonan ta recomenda cu A.J.R. mester tratamento obligatorio (TBS) cu condicionnan special. E tratamento no ta nifica cu A.J.R. mester ta interna den un institucion. Nan ta mustra cu A.J.R. lo por bay Respaldo durante dia pa haya su tratamento y despues por bay cas. Nan ta haya cu Reclasering lo por yuda guia A.J.R.
Ta asina cu durante tratamento di e caso na April 2026, A.J.R. a bisa cu e ta di acuerdo cu tratamento. Psycologo y psychiater ta mustra cu nan no ta haya cu manda A.J.R. Hulanda lo ta adecuado. Nan ta haya cu A.J.R. lo mester sigui tur indicacion di Reclasering. A.J.R. lo mester haci control tur luna. Tambe ta wordo mustra cu manera A.J.R. sali for di KIA, e mester sigui di biaha, e curso di control di agresion.
Hues ta prohibi A.J.R. pa tin contacto cu su ex amiga y e victima.
CASTIGO
Hues ta confirma e exigencia di Fiscal, esta 6 aña di prizon, kitando e tempo cu A.J.R. ta sera den KIA. Na opinion di Hues, un castigo mas abao no ta haci husticia pa loke A.J.R. a haci. Hues a pone enfasis cu e castigo aki ta pa proteha comunidad. El a bisa cu lo mester monitor e desaroyo di A.J.R. y cu e programa di tratamento obligatorio no tin un limite. Normal, ta stipula 2 aña di tratamento pero den e caso aki no a fiha un tempo.
