Hues ta haya cu e acusado a defende su mes --- ORANJESTAD (AAN): E homber B.K.(21), acusa cu riba 9 September 2021 intencionalmente a dal of tira e homber K. cu calco na su cabez,
ayera a wordo declara liber despues di a keda 86 dia sera den KIA. B.K. a bisa Hues cu el a tira e homber K., arma cu un machete, cu un calco pa defende su mes. Fiscal no ta haya cu aki por papia di defensa propio y a exigi castigo igual na loke B.K. a sinta caba. Hues no ta comparti e punto di bista di Fiscal. Hues ta haya cu den e situacion cu B.K. tabata, su reaccion tabata di defensa propio y pesey ta declar’e liber.
MALTRATA CU CALCO
Hues a puntra B.K. si ta berdad cu el a dal K. cu un calco den cabez. Segun B.K. el a tira K. cu un calco. El a bisa Hues cu el a haci asina pasobra K. a bay cu un machete riba dje. Segun B.K. pa evita cu K. por dal’e cu machete, el a pasa man pa un calco y tira K. cu esaki. Hues a bisa cu for di e investigacion di Polis por compronde cu tabatin un problema entre B.K. y K., kende ta e padrastro di yiu di B.K. Esaki sosode den oranan di anochi y segun B.K., K. a dale cu mokete den boca. El a core bay den su auto pero e auto no kier a core. El a mira K. ta bin cu un machete den su direccion y e ora ey el a sali for di e auto, coy un calco y tira esaki riba K.
B.K. a bisa Hues cu e tabata sinti su mes amenaza y pesey a tira K. cu e calco. Hues a bisa cu e ex partner di B.K. a bisa cu B.K. a dal K. cu e calco. B.K. ta para riba cu el a tira K. cu e calco.
Ta asina cu Polis a haya un machete na sanger. Hues a bisa cu tin dos version, un cu B.K. a tira y e otro cu B.K. a dal.
FISCAL
Fiscal a bisa Hues cu e homber K. a haci denuncia contra B.K. E ta haya legalmente proba cu B.K. a tira K. cu un calco. Fiscal no ta haya cu por papia aki di defensa propio manera B.K. ta bisa. Na opinion di Fiscal, tabatin un pelea cu despues a resulta den maltrato cu calco. B.K. ta bisa cu K. a bay riba dje cu un machete y B.K. a tir’e cu un calco. Fiscal a bisa Hues cu K. tabata kier a coy un machete pero no a logra esey. Pesey no por papia di defensa propio. El a bisa cu B.K. tin suerte cu tur cos a sali di bon. Fiscal a exigi castigo igual cu loke B.K. ta sera caba, esta 86 dia.
ABOGADO
Mr. Kuster a bisa Hues cu ta acusa B.K. di maltrato cu arma. E abogado a bisa cu e no ta kere cu aki por papia di maltrato cu arma. Polis a confisca un calco y un machete. Na opinion di e abogado, den e relato di Polis no ta bisa cu e calco tabata na sanger. E homber K. a sufri un cap cu mester a wordo cosi. Segun e abogado, segun raport di hospital, K. lo a trompica y herida su mes. Tin testigo ta bisa cu K. lo a bula un banda ora cu B.K. a tira e calco. Door di a bula, el a herida su mes. E abogado a sigui bisa cu B.K. a core pasobra K. a bay cu un machete riba dje. E ta haya cu mester declara B.K. liber.
Fiscal a reacciona cu K. y otro dos testigo a declara cu e calco cu B.K. a tira a herida K. na su cabez. E ta haya cu tin suficiente prueba cu ta un maltrato cu un arma.
ACUSADO DECLARA LIBER
Hues a sera tratamento di e caso y a dicta sentencia di biaha. Hues ta haya B.K. kier a bay for di e cas pero tabatin problema cu e auto. Entretanto K. a sali pafor cu un machete. Na dado momento B.K. a tira e calco riba K. Na opinion di Hues, e pregunta ta si e calco a dal K. den cabez. El a bisa cu door di e herida sanger a cay riba e machete cu a crea e sospecho cu tabata maltrato cu machete.
Hues ta haya K. a wordo herida door di e calco. Hues a sigui bisa cu e pregunta ta si esaki ta defensa propio. Na opinion di Hues, e hecho cu K. tabatin un machete, B.K. tabata sinti su mes menaza. E forma di reacciona di B.K. por wordo considera defensa propio y pesey no por castiga B.K. Hues a declara B.K. liber.
