Mientras cu Fiscal a exigi 1 aña di prison
ORANJESTAD (AAN): Diahuebs mainta e señoranan M.H., Y.T. y e homber R.J. mester a presenta den Corte pa scucha nan sentencia. Ta asina cu tanto Y.T. como e homber R.J. no a presenta pero nan abogado si. Hues den su sentencia a mustra cu tin parti di e acusacionnan cu e no ta haya proba. Hues a baha castigo pa e damanan M.H. y Y.T. mientras cu e homber R.J. a wordo declara liber.
ACUSACIONNAN
Aña pasa November 2024, tratamento di e caso a tuma lugar caminda Fiscal a acusa e trio aki di labamento di placa. Fiscal a acusa e dama M.H. cu entre Januari 2018 y Aprill 2022, el a laba 54 mil florin y 80 mil florin pa cumpra un boto. Fiscal a acusa e dama Y.T. tambe di a laba placa. El a mustra cu Y.T. lo a cumpra autonan y otro cosnan. Fiscal a acusa e homber R.J. cu entre 2018 y 2022 el a laba mas cu 200 mil dollar. Segun Fiscal, R.J. lo a cumpra un auto Mercedes Benz y un boto. Ta asina cu R.J. no a presenta. Fiscal a bisa cu nan ta wordo acusa di labamento.
FISCAL A EXIGI CASTIGO
Durante tratamento di e caso, Fiscal a bisa Hues cu labamento di placa ta un caso serio. E castigo maximo ta 8 aña di prison. Fiscal ta haya cu mester manda señal bon cla cu no ta tolera labamento di placa. El a usa orientacion di Hof pa castigo.
Fiscal a exigi pa Y.T., 9 luna di prison di cual 3 luna ta condicional cu 2 aña di prueba. Fiscal a bisa cu e placanan, joyas y auto Toyota lo mester keda confisca.
Fiscal a exigi pa e homber R.J., 12 luna di prison y cu e boto, e auto Mercedes Benz preto y joyas ta keda confisca.
Fiscal ta haya cu M.H. a wordo usa. El a exigi 180 ora di trabao of 90 dia sera, 2 luna di prison condicional cu 2 aña di prueba. Fiscal a pidi pa e cosnan confisca keda confisca.
HUES A BAHA CASTIGONAN
Hues a cuminsa cu e sentencia di e dama M.H., kende tabata e unico presente. Hues a bisa cu segun Fiscal, M.H. ta culpable di labamento di placa. E ta casa cu e homber R.J. Segun Fiscal, M.H. a cumpra boto sabiendo cu e placa ta di fuente ilegal. Tambe cu M.H. a core taxi sin paga belasting. Hues ta haya cu M.H. a uza placanan sabiendo cu ta di fuente ilegal. El a mustra cu 18 October 2021 e boto a wordo bendi na M.H. pa 75 mil florin y cu M.H. a paga cash mas cu 22 mil dollar. Tambe M.H. a paga mas cu 6 mil dollar cash pa importacion di e boto. Hues a sigui bisa cu Belasting a mustra cu M.H. no a paga belasting pa core taxi. Hues a bisa cu segun ley, e hecho cu M.H. no a paga belasting pero a uza e placa pa cumpra e boto, ta wordo considera labamento di placa. Hues ta haya cu no tin prueba cu intencionalmente M.H. lo a sconde placa procedente di fuente ilegal. Hues ta haya cu M.H. no ta culpabel di intencional a laba placa. Si Hues ta haya M.H. culpabel di a laba placa.
Pa cu e castigo, Hues a mustra cu na 2016, M.H. a wordo condena pa un delito similar. Tambe Hues a tene cuenta cu Fiscal a surpasa e periodo stipula pa ley, cu un caso mester wordo trata den Corte. Hues a mustra cu for di April 2020 e caso ta andando.
Hues a baha e exigencia di Fiscal y a condena M.H. na 2 luna di prison condicional cu 2 aña di prueba. Tambe Hues a condena M.H. na 120 ora di trabao pa comunidad y si e no haci esaki, e lo mester bay 60 dia sera den KIA.
Hues a sigui cu e dama Y.T. El a bisa cu e sentencia di Y.T. ta parce un poco di M.H. Esey ta nifica cu varios di e acusacionnan, Hues no a haya proba. Hues aki tambe a baha e castigo exigi y a condena Y.T. na 1 luna di prison condicional cu 2 aña di prueba. Tambe Hues a condena Y.T. na 120 ora di trabao pa comunidad y si e no cumpli, e mester bay 120 ora sera den KIA. Hues a ordena pa tur e cosnan cu a confisca di Y.T., mester wordo debolbe.
Hues a bisa cu e acusacionnan contra R.J. e no ta haya legalmente proba y a declara R.J. liber.
