El a presenta den Corte sin abogado y parce cu ningun abogado kier defende -- ORANJESTAD (AAN): A base di decision di Hof, otro luna dia 11 October 2021,
R. Danies ta haya su libertad condicional. Hof tambe a instrui e representante di Orden di Abogado, pa percura pa haya un abogado pa Danies y notifica Hof si a haya of no. Tratamento di e caso a keda pospone te otro aña.
DANIES SIN ABOGADO
Despues cu Danies, na Augustus 2021 den Corte Superior, a deshaci di su abogado pasobra e no ta confia den dje, el a keda sin abogado. Siman pasa el a presenta den sala di Corte di Husticia pa su caso di apelacion pero sin abogado.
Hof a remarca cu Danies no tin abogado. Hof a mustra cu despues cu Danies a nenga ayudo di e abogado pasobra e ta desconfia den dje, a pidi Procurador General (PG) pa haya un abogado pero ta resulta cu PG no a haya. Hof ta haya cu esaki ta un problema.
Hof a puntra PG kico a pasa. PG a splica cu el a puntra e abogadonan cu ta bay KIA regularmente y 8 a reacciona cu nan no por. A check via Orden di Abogado pero no a haya reaccion. PG a bisa cu e ta preocupa cu e desaroyo aki. Danies a bisa cu e ta haya cu e ta inocente y e kier pa Hof trata e caso asina mes.
E representante di Orden di Abogado, cu tabata den Corte pa representa VNO, a bisa Hof cu el a manda mensahe via computer pa abogadonan, pero no a haya reaccion.
El a bisa cu Orden di Abogado no por bay apunta un abogado sin mas. Esey mester bay a base voluntario.
HOF KIER PA DANIES TIN ABOGADO
Hof a menciona articulo 499 di ley penal cu ta duna Hof e poder pa dicidi riba e situacion mental di Danies. Ta asina cu psikiatra a constata cu Danies ta sufri di problema mental. Hof a puntra PG su opinion riba esaki. PG a bisa cu pa laga Danies liber lo mester tin un plan con lo bay atende cun’e na Respaldo y Reclassering. PG a bisa cu si Danies no atene su mes na palabracionnan pa cu e libertad condicional, e lo bay bek KIA.
Danies a bisa cu si PG dicidi cu e lo mester tratamento di psikiatra e lo sigui esey. Hof a pospone un rato pa bay pensa con lo bay sigui. Despues di basta rato nan a bolbe y a dicidi cu lo aplica e articulo 499 di ley penal.
Hof a dicidi cu ta pospone e caso di Danies pasobra e mester di asistencia di un abogado, teniendo cuenta cu e acusacionnan. Hof a bisa tambe cu ta importante pa Danies tin contacto cu Reclasering. Hof a haci peticion na e representante di Orden di Abogado, pa percura pa Danies haya un abogado cu lo wordo aproba door di Hof.
Hof a instrui PG pa laga Reclassering traha un plan con lo bay atende cu Danies.
CONDICIONNAN PA DANIES
Hof a bisa cu pa 11 October 2021 pa 9.30 di mainta, Danies ta haya libertad condicional. Esaki bou condicionnan:
- Danies no por haci cosnan contra ley.
- Danies mester sigui indicacionnan di Reclassering. Esey ta nifica tambe cu Danies lo mester haya tratamento na Respaldo.
OTRO AÑA LO SIGUI CASO
Por a mira cu Danies no tabata mucho contento cu e decision di Hof. Hof a bisa cu ta pospone e caso di apelacion pa dia 15 Februari 2022. E dia ey e caso lo wordo trata cu portanan sera. Hof a bisa tambe cu e ta spera cu pa 15 Februari 2022 lo tin un raport di Reclassering cu ta mustra con e guia di Danies a bay.
