Despues di 16 luna ta cera como acusado y un condena di 6 aña di prison
ORANJESTAD (AAN): – Un dia despues di tratamento di e caso den Corte Superior, e constelacion di e tres Huesnan cu ta bin for di Curacao (Hof) a duna orden pa laga e homber G.C., acusa di intento di mata, liber. Dos dia despues, Diaranzon, G.C. a presenta den Corte den oranan di merdia, caminda Hof a bisa cu nan no ta haya legalmente proba cu G.C. a tira riba e auto y ta declar’e liber.
Dialuna Procurador General (PG), den e caso di apelacion, a acusa G.C. cu riba 1 Januari 2024 el a purba di mata un pareha den auto, door di tira riba e auto. Tambe PG a acusa G.C. di posecion di un arma di candela. Ta asina cu G.C. a apela e castigo pasobra e ta para riba cu e ta inocente. .
Durante tratamento di e caso G.C. a remarca na Hof, pakico e ta bay tira riba e auto. Hof a bisa cu Polis a haci investigacion y a constata un buraco den e windshield patras di e auto y a haya un bala den e radio di e auto. Polis a haya tambe partinan di windshield kibra di e auto riba caminda. G.C. a bisa cu e no tabatin arma y ningun momento el a tira. El a bisa cu e ta haya straño tur esaki y no por bisa con e windshield patras a kibra. El a bisa Hof cu e no ta tipo di persona asina. El a admiti di a bebe alcohol y huma marihuana pero no cu e tabata hopi bou influencia. El a bisa cu tabatin un discusion riba pago pero esey a keda regla. Hof a mustra tambe cu algun dia despues, S. a manda un mensahe pa G.C. caminda e ta pidi disculpa pa loke a pasa. Segun G.C., S. ta un persona cu e ta haci su cosnan bon. Segun G.C., awor cu e ta sera den KIA el a bin haya sa cu S. tin hopi problema. G.C. ta para riba cu e no tin nada di haci cu e caso aki. G.C. a bisa cu e tin 16 luna sera den KIA y ta haya cu S. y su pareha ta ganja riba dje.
EXIGENCIA DI PG
PG a bisa cu corectamente Hues den Promer Instancia a dicidi cu G.C. ta culpabel di intento di mata door di tira y posecion di arma di candela. PG a mustra cu abogado D.Croes a bisa cu ta S.J. mes a tira riba e auto pa asina haci daño na G.C. Hues no a kere declaracion di G.C. cu e no a tira. Hues ta haya cu G.C. a tuma riesgo cu door di tira, por a mata un di e hendenan den auto. PG a pidi Hof pa mantene e castigo di 6 anja di prison.
ABOGADO
Mr. D.Croes a bisa Hof cu PG no por a demostra cu G.C. ta esun cu a tira y pesey ta pidi Hof pa declara G.C. liber. Abogado ta haya cu declaracion di e pareha ta contradeci otro y despues nan a wordo adapta pa ta mesun cos. E abogado a remarca cu un rato promer S. a tira boter riba G.C. Tambe a haci menazanan serio cu G.C. Despues S. ta bay cu auto te na cas di G.C. y a bis’e cu e lo bay tir’e. E forma di core den direccion ta accion criminal pasobra S. sa masha bon unda G.C. ta biba y no ta manera nan a declara cu nan no sa unda G.C. ta biba. Remarca cu si realmente a tira, ningun hende no a ripara nada. Hende lo a core y lo tabatin hopi desorden. Pero esey no tabata asina. Remarca cu den auto ta mas o menos 3 minuut pa yega e cas pero segun e pareha a dura 15 minuut. Esey ta haci cu nan por a haci tur cos cu nan tabata desea pa perhudica G.C. Mustra cu promer e pareha ta bisa cu G.C. tabata pafor di cura. Despues nan ta bisa cu G.C. tabata den cura. Tur esnan na cas ta bisa cu G.C. tabata paden. Pa loke ta tiramento, e pareha ta bisa cu ta pafor di e cas G.C. a tira y despues ta bisa cu ta paden di cura el a tira. No a haci muestra di tiro riba man di G.C. Tabatin 5 hende na cas y ningun hende no a tende nada di tiro. Haya cu e declaracion di e dama M. y e homber S. ta contradictorio y no por saca afor kico realmente a pasa. No ta haya cu tin suficiente prueba cu G.C. a tira riba e auto. Abogado ta haya cu G.C. a keda consistente cu su declaracion mientras cu e pareha cu a haci denuncia nan declaracion ta contradictorio. Cuestiona e hecho cu nunca G.C. por a tira directo riba e windshield. Pesey e pareha a cambia nan declaracion cu ta for di riba caminda. Remarca cu e glasnan kibra a wordo tira despues riba e caminda. Con por ta posibel cu no a haya huls. E glas di auto ta getint y con por ta cu e parti di glas cu a haya riba caminda, ainda tabata riba e windshield. Si a tira riba un distancia, por a mira e glasnan pega na e tint y no glasnan kibra riba caminda. Mustra e scenario cu ta S. mes a tira riba su auto pa asina G.C. bay sera. Ta lamenta cu no a accepta e otro declaracionnan caminda hendenan ta splica con S. ta venga hende. Abogado ta haya cu mester declara G.C. liber.
HOF A DECLARA HOMBER LIBER
Por a compronde cu G.C. a presenta den Corte y Hof a bisa cu e investigacion di Polis a tuma lugar 10 dia despues di e incidente, na e lugar unda e tiramento lo a tuma lugar. Hof ta haya cu no tin prueba y a declara G.C. liber.
