Alan Howell a bisa cu e ta apela e sentencia atrobe
Corte di Casacion na Hulanda lo bay evalua e caso
ORANJESTAD (AAN): Diaranson merdia, Hof di Corte Superior a dicta sentencia den e caso di apelacion di Alan Howell. Hof tabata den sala di Corte na Curacao y via video conference a conecta cu Corte di Husticia di Aruba, caminda Alvin Howell tabata. E abogado mr. Herrera tabata den sala di Corte na Curacao.
RECHAZA DECLARA PG NO ADMISIBEL
Hof a bisa cu a bay studia tur e critica di abogado mr. Herrera riba e forma con e investigacion a tuma lugar. Abogado a pidi Hof pa declara Procurador General (PG) no admisibel y declara Howell liber.
Hof a bisa cu nan ta rechaza e defensa y ta haya cu e investigacion ta haci corecto.
HOWELL CONDENA
Hof a bisa cu nan ta haya Howell culpabel y ta confirma e sentencia cual Howell a apela. Pa loke ta e castigo, Hof a bisa cu ta tene cuenta cu e caso aki ya tin 3 aña andando. Door di esey a dicidi di reduci e castigo di 24 luna pa 23 luna di prison di cual 6 luna ta condicional cu 3 aña di prueba. Hof a sigui bisa cu Howell ta haya e multa di 35 mil florin y e 15 mil florin cu a confisca, ta keda confisca.
HOWELL TA APELA
Ta asina cu despues di e sentencia, Howell a duna di conoce cu el a consulta cu su abogado mr. Herrera y a keda dicidi cu ta apela e sentencia. Awor ta Corte di Casacion na Hulanda lo bay evalua e caso.
