Awe Hues ta tuma un decision
ORANJESTAD (AAN): Diamars mainta tur e abogadonan di e sospechosonan den caso Avestruz tabata presente pa scucha e reaccion di Fiscal riba nan peticionnan.
Ta asina cu un dia promer ya caba Fiscal a email e abogadonan su punto di bista y Diamars varios abogado a reacciona riba Fiscal su punto di bista.
No kier pa scucha cierto testigonan: Fiscal a bisa Hues cu Ministerio Publico no ta contra pa scucha testigonan. Por compronde cu abogadonan lo kier haya informacionnan.
Sinembargo Fiscal a bisa cu Ministerio Publico ta contra pa scucha algun testigo pasobra Fiscal no ta mira kico nan lo por contribui pa cu e caso.
No kier duna documentonan: Riba e peticion persistente di abogadonan pa facilita e documentonan cu Sevinger a duna autoridad, Fiscal a bisa Hues cu Ministerio Publico ta keda mantene su punto di bista esta cu no ta haci esakinan.
Stop prohibicion di contacto: Pa loke ta e peticion di abogadonan pa para e prohibicion pa cierto di e acusadonan pa tin contacto, Fiscal a bisa Hues cu ta hala e prohibicion aden. Fiscal a bisa cu e investigacion ta cla y e prohibicion no ta necesario.
Pa loke ta interogacion di testigonan, Fiscal a propone pa mihor laga esaki sosode cerca Hues Comisario y no den Corte ora di tratamento. Esey lo haci e proceso mas facil.
No por scucha abogado como testigo: Riba e peticion di algun abogado pa scucha abogado como testigo di algun testigo. Esey pasobra ta e abogado a representa nan den e proceso.
Fiscal ta haya cu por spera cu nan lo bay haci uso di nan derecho di silencio di profesion y pesey no ta haya cu ta necesario.
Fiscal a bisa Hues cu lo duna back administracionnan confisca di e sospechosonan.
Abogadonan ta reacciona: mr. Oomen di Biemans y Werleman a reacciona riba e punto di bista di Fiscal cu no mester interoga abogadonan.
- Oomen ta kere cu mester puntra e abogadonan pa interogacion pasobra nan a hunga rol importante pa nan clientenan. E abogado ta kere e abogadonan mes mester dicidi esaki. E abogado a bisa Hues cu e abogadonan cu kier scucha como testigo, tin derecho y no obligacion pa silencion di profesion. Na opinion di mr. Oomen, no mester bay puntra nan si nan ta dispuesto pa duna declaracion sino yama nan pa scucha nan como testigo.
- Oomen tambe a bisa Hues cu mester duna abogado e oportunidad cu durante interogacion di testigonan por haci preguntanan. Si esnan cu a haci investigacion si por a haci’e, abogadonan tambe mester por.
- Canwood a reclama pakico no ta scucha algun di su testigonan, kendenan e ta haya importante.
- Carlo a remarca cu si e investigacion ta sera manera Fiscal a bisa, mester duna back tur loke a confisca.
- D. Kock a puntra Fiscal pa ki tempo lo por haya administracion y documentonan di su clientenan.
Hues a bisa cu e ta bay evalua e peticionnan di e abogadonan y e reaccion di Fiscal y awe Diaranson mainta e lo bisa su decision. DIARIO lo informa lectornan kico Hues su decision ta.
