ORANJESTAD (AAN) – Diabierna for di oranan di mainta te cu den oranan di tardi, Corte di Husticia a trata e caso penal cu Ministerio Publico a cuminsa contra e conoci fisioterapista Rudy Carti.
Den e articulo aki, DIARIO ta publica e exigencia di Fiscal mientras cu den un otro articulo ta publica e defensa di abogado mr. Carlo.
8 VICTIMA DI VIOLA Y MISHIMENTO
Fiscal a bisa Hues cu tin 8 dama a haci denuncia cu Carti sea a penetra nan cu dede of a mishi cu nan parti intimo of nan pecho.
Fiscal a mustra cu despues cu keho a wordo haci na Inspeccion di Salubridad, e caso a cuminsa wordo investiga pa KZP.
Fiscal a bisa Hues cu Ministerio Publico no a suministra informacion tocante Carti na prensa. Loke a sali den prensa ta responsabilidad di prensa.
Fiscal ta haya cu a keda proba cu Carti a mishi cu e damanan. Fiscal a mustra ariba e denuncianan di e damanan, kendenan ta bisa con durante masashi Carti lo a mishi cu algun nan parti intimo y otronan na nan pecho. Tin algun cu hasta a bisa cu Carti a hinca su dede den nan parti intimo. Na opinion di Fiscal, ta door di berguenza of keda den un shock a pone cu despues di hopi tempo, e victimanan a haci denuncia.
Fiscsal a bisa cu tin declaracion di un otro fisioterapista cu ta mustra cu ora di masashi patient, no ta bay haci masashi na partinan intimo. Mester pidi permiso promer y tambe mester ta cauteloso con ta haci masashi.
CARTI A BAY DI MAS DEN MASASHI
Fiscal a bisa cu a bay detene Carti y a confisca un cantidad di 300 mil florin. Entretanto e placa a wordo debolbe pasobra no tin ningun indicacion cu lo ta algo contra ley. El a mustra cu Carti a reacciona riba e fisioterapista cu segun Carti ta un persona cu ta blo papia malo di dje pa pint’e malo. Fiscal a bisa cu e no ta duda den e trabou bon di Carti pero e casonan aki ta serio. A scucha testigonan cu Carti a pidi pero nan no tabata presente ora cu Carti tabata masashi pues no por bisa nada.
Fiscal ta haya cu Carti a bay di mas den masashi door di mishi cu parti intimo di hende muher. El a bisa cu den e caso aki por mira cu den e declaracionnan di e victimanan, tin puntonan esencial cu ta mustra e forma con Carti a haci. Ningun di e victimanan a duna Carti permiso pa bay mishi na nan parti intimo. Nan ta mustra cu Carti tabata bay cu su man mey mey di nan pia ora e ta masashi nan pia. Tabatin algun caminda Carti a hinca dede. Otronan ta bisa cu e tabata frega cu su dede. Tin otronan cu ta bisa cu el a mishi cu nan pecho. Fiscal a mustra cu Carti mes a bisa cu door di tecnica cu e ta usa, e ta bay serca di e parti intimo pero no a mishi.
Fiscal a mustra cu hinca dede den parti intimo, segun hurisprudencia ta violacion. Tin sentencianan di Corte Supremo cu ta mustra esey.
Remarca cu no ta revelante e punto di bista di Carti cu e victimanan no a reacciona ora e tabata haci masashi cu e lo a mishi cu nan.
CASTIGO
Fiscal ta haya Carti ta culpable. Pa loke ta e demanda di daño, Fiscal a bisa cu e victimanan mester demostra kico ta e demanda di daño. El a splica e 4 victimanan cu tabata presente, cu si e pidi pa declara nan demanda no admisibel, por cuminsa un caso civil despues.
E demanda di e victima pa mas di 50 mil florin, Fiscal ta haya cu gastonan di abogado, transporte, no por wordo inclui. Pa tratamento di psicologo, falta mas detaye pero lo pidi pa aproba un parti 1500 florin. Pa loke ta daño inmaterial ta fastioso. El a pidi Hues pa aproba 5 mil florin.
Pa loke ta e victima cu a demanda 10 mil florin, Fiscal a bisa cu pa e daño material e ta hay 1 mil florin ta na su lugar y inmaterial 5 mil.
Pa loke ta e victima cu a demanda 6500 florin, Fiscal a pidi Hues pa aproba 5 mil florin.
Pa loke ta e victima cu a demanda 5 mil florin, Fiscal a bisa Hues pa aproba esaki.
Hues despues di a scucha defensa di abogado mr. Carlo a bisa cu e ta bay studia e caso y dia 8 di October 2021 lo tin sentencia.
