Pa menaza di morto y posesion di armanan
- Zuriel a keda sacudi cabes y wowo a yena cu lagrima
ORANJESTAD (AAN): Diabierna mainta a sigui cu tratamento di e caso penal cu Hues a cuminsa contra Zuriel Celaire (23). Fiscal a baha pisa riba Celaire y a tene cuenta cu e castigo anterior y TBS (tratamento obligatorio den clinica na Hulanda). Fiscal a exigi 4 aña di prizon y tratamento obligatorio y cu banchi electronico na enkel.
E acusacionnan contra Zuriel ta: di intento di maltrato severo, menaza cu morto y posesion di arma di candela den e periodo di 9 April 2025 y 27 September 2025. Tambe e ta wordo acusa cu riba e anochi di 9 pa10 April 2025, a choca e homber D.L. y dal’e cu arma na cabez. E mesun dia a menaza e homber D.L. cu arma. Tambe cu Zuriel a menaza un otro persona cu arma. Tambe cu riba 27 September 2025, Zuriel a menaza e ruman muhe di D.L, via WhatsApp.
Dia 5 Juni 2026, Hues a pospone e caso riba peticion di Fiscal, pa Reclassering haci un investigacion pa mira con lo bay haci tratamento TBS na Hulanda.
Condicionnan pisa pa Zuriel: Ta asina cu 5 Juni 2026, psicologo den Corte a mustra cu Zuriel no kier coopera pero e ta haya cu mester atrobe ordena pa Zuriel haya TBS. Fiscal a pidi conseho di Reclassering. Ayera un miembro di Reclassering a mustra cu e risico ta grandi cu Zuriel lo bolbe cay den mal caminda. Reclassering ta haya cu Zuriel mester haya tratamento psicologico, tambe trata su adiccion y cu Zuriel mester cana cu e banchi electronico na su enkel pa asina sa tur ora unda e ta.
Reclassering ta haya cu por haci e tratamento obligatorio (TBS) na Aruba pero cu condicionnan mas pisa. A splica Hues cu anterior cu tabata guia Zuriel, no por sa kico Zuriel ta haci anochi. Reclassering ta haya cu e banchi electronico y nochi di keda na cas, lo por tin mas control.
Mester pone ‘Banchi di Siguridad’ na pia: Ta asina cu desde 1 Juli 2026, Ministerio Publico a introduci e Banchi di Siguridad (‘enkelband’) electronico na enkel. Reclassering a mustra cu Zuriel a bisa cu e no kier haya psicologo B. y tampoco psicologo d C. pasobra e no ta confia nan. Hues a hala atencion di Zuriel cu awor ta bin un psicologo y Zuriel mester sigui indicacionnan sino lo bin e TBS. Segun Zuriel e no tin problema cu esey. Reclassering a mustra cu e Banchi di Siguridad mester ta henter dia y kier pa Zuriel bisti esaki durante di 9 luna, cu ta e periodo piloto stipula pa Ministerio Publico.
Fiscal a baha pisa: Fiscal a bisa Hues cu e ta haya Zuriel culpabel di tur e acusacionnan. El a mustra cu 18 September 2025 tabatin tiramento riba auto di Zuriel door di rumannan D.L. y J.L. E dos rumannan a wordo condena y nan a haci denuncia contra Zuriel di menaza, maltrato. E anochi di 9-10 April 2025 segun D.L., a bay banda di EPB San Nicolas pa topa cu Zuriel pa un asunto droga.
El a bay cu su amigo Zulu. Na e lugar, D.L. a baha y bay den e auto caminda Zuriel tabata. Den auto hunto cu Zuriel, D.L. a wordo maltrata door di un hende cara tapa sinta patras den e auto. E homber a dal D.L. cu e pistool na cu cabez y cara. Zuriel a bisa D.L. cu su ruman J.L. a faya y awor e tin cu paga. Zulu a baha for di auto y core bay. Despues di esaki, e rumannan L. a bay tira riba e auto den cual Zuriel tabata. Fiscal a bisa Hues cu e ta kere e declaracion di D.L. El a bisa cu e no ta haya proba intento di maltrato severo pero si e menaza di morto. E ta haya cu ta Zuriel a pasa e homber den auto e arma.
Fiscal a mustra cu investigacion cu Polis a haci den cellular di Zuriel, a haya potretnan di armanan di candela y Zuriel cu arma den man. E potretnan ta saca na 2025 y expertonan di Polis ta mustra cu ta armanan di candela real. Fiscal a mustra cu Zuriel a bisa cu ta potretnan AI cu el a haci pa asina mustra otronan cu e tin arma. Fiscal a bisa cu e no ta kere Zuriel, pasobra Zuriel no por a splica con el a haci e potretnan. Fiscal tambe ta haya proba cu Zuriel a manda mesahe di menaza pa ruman muhe di D.L. riba 27 September 2025.
Tratamento obligatorio: Fiscal a mustra cu Zuriel ta culpabel di casonan serio. Na opinion di Fiscal, Zuriel ta blo desmenti tur cos y no ta tuma responsabilidad pa su hechonan. El a mustra cu anterior Zuriel a wordo condena pa casonan similar. Fiscal a bisa cu e pregunta ta, kico mester pasa cu Zuriel pa evita cu ta bolbe haci mesun cos. El a mustra cu apesar cu Zuriel tabata nenga di coopera, psicologo y Reclassering a logra traha un raport riba Zuriel.
Fiscal ta haya cu Zuriel mester haya tratamento obligatorio y sino TBS. El a splica cu ta hopi dificil pa por manda hende Hulanda pa tratamento obligatorio den clinica. Door cu Zuriel no kier coopera, no por manda Zuriel Hulanda. Ademas si Zuriel bay Hulanda, e lo bin Aruba bek. Fiscal ta haya cu mester atende cu Zuriel na Aruba mes. El a mustra cu Reclassering a bin cu conseho caminda bou condicionnan pisa y cu banchi na enkel, Zuriel lo por haya tratamento. Psicologo y Reclassering ta haya cu e risico ta grandi cu Zuriel ta bolbe cay den e mal caminda.
Exigi 4 aña di prizon y tratamento: Fiscal ta aproba e proposicion di tratamento obligatorio na Aruba mes cu condicionnan pisa. Fiscal ta haya cu Zuriel mester haya castigo di prizon tambe. El a exigi 4 aña di prizon y despues ta sigui cu e tratamento. Por a mira cu Zuriel tabata sacudi cabes cu e no ta di acuerdo. El a hasta cuminsa yora.
Abogado: Abogado mr. S. Tromp hunto cu mr. J.Tromp a bisa Hues cu nan no ta haya cu tin prueba contra Zuriel. Segun e abogadonan, Zuriel a bisa cu ta e rumannan L. a traha un plan pa Zuriel ta sera den KIA pa asina por tuma represaya contra dje. E abogadonan ta haya cu e homber D.L. ta gaña cu el a topa cu Zuriel pa un deal di marihuana. Zuriel ta desmenti esaki total. No tin ningun prueba. E abogadonan ta haya cu e declaracion di Zulu, e amigo di D.L., no ta confiabel. Nan a remarca tambe cu e declaracion di e mama di D.L., kende a bisa cu el a mira rascanan riba cara di su yiu, no ta confiabel.
Na opinion di e abogadonan, e stem di mensahe cu a wordo manda pa e ruman muhe di D.L., no ta Zuriel y no por wordo uza como prueba. Nan ta haya cu no tin suficiente prueba. Segun e abogadonan, e pruebanan cu Fiscal ta presenta, no ta sostene otro. E abogadonan a bisa tambe cu no tin prueba cu Zuriel ta complice di e maltrato di D.L. den e auto di Zuriel. Segun e abogadonan, Zuriel no tabata sa cu e persona patras den auto tabatin arma. E abogadonan ta haya cu mester declara Zuriel liber.
Tambe e abogadonan ta haya cu no tin suficiente prueba cu Zuriel tabata den posesion di arma. E potretnan di arma den su smartphone ta ‘fake’. Ta via computer el a traha esakinan. Nan ta haya cu sin un investigacion fisico, no por bisa cu e armanan ta real.
Hues a remarca cu segun e ley di arma, si tin algo parecido na un arma cu por wordo uza pa spanta y amenaza, e ta wordo considera como un arma.
E abogadonan no ta haya cu mester pone Zuriel bao TBS. Nan ta haya e castigo exigi pa Fiscal demasiado halto y mas ainda pa pone banchi di enkel. Nan no ta di acuerdo pa pone e orario cu entre 6 pm y 6 am Zuriel mester ta na cas. Tambe nan ta contra pa Zuriel bisti e Banchi na enkel pa 9 luna largo. Nan a bisa Hues cu lo ta mihor cu despues 1 luna lo mester evalua e uso di banchi di enkel.
Hues a sera tratamento di e caso y a bisa cu dia 18 September 2026 lo tin sentencia.
