Un agente di Polis tambe a bira victima
ORANJESTAD (AAN): Den sala di Corte di Husticia, Fiscal a baha pisa riba e hombernan Z.T., J.A., D.P. y A.F., kendenan ta wordo acusa cu riba 3 Augustus 2025 a haci 3 atraco cu violencia y menaza hende cu arma. E lugarnan cu e grupo aki a bay haci atraco tabata na Coconuts, Kalibra Bar y Lekker Bar & Restaurant. Tratamento di e caso aki a tuma hopi ora.
Atraco arma cu violencia: Fiscal a presenta un cantidad di acusacionnan cu basicamente ta encera cu e grupo aki a haci atraco cu violencia y hasta cu Z.T. a haci menaza cu arma. Loke tambe Fiscal a exigi pa e mayoria di e grupo haya e castigo condicional poni riba e castigo cu e ta bay exigi pasobra tur a haci e delitonan aki durante nan tempo di prueba.
Hues a cuminsa interoga J.A., kende a bisa cu na Coconuts nan a ranca su cadena. El a perde cabez y a bay ranca cadena di otro hende y hendenan a bin riba dje y el a bringa. El a bisa cu e tabata burachi. El a bisa cu Z.T. y D.P. a yud’e bringa.
Segun Z.T., ora el a mira cu nan a ataca su amigo J.A., el a bay yuda bringa contra esnan cu tabata bringa cu J.A. Hues a bisa cu tin acusacion cu Z.T. lo a menaza hende cu arma. Z.T. a desmenti di tabatin un arma y mustra esaki. Ta asina cu esnan na Cononuts tabata turista. Hues a bisa cu Polis a bisa cu nan tabata core tras di un auto cu tabata haci maniobranan straño y core bay. Polis a detene nan y a bay bek na e sitio y check y a haya un arma benta abao. Ta asina cu Z.T. tabata maneha e auto. El a bisa cu e no sa nada di e asunto di arma. Segun Z.T., e tabata core auto normal. Hues a bisa cu e turista homber M. y su ruman a bisa cu J.A. a ranca nan cadena y ora nan a bay riba dje, Z.T. a haci manera cu e tin un arma den su carson.
Maltrata agente di polis: Nan a bay for di Coconuts y bay Kalibra Bar na South Beach, caminda J.A. a bay ranca cadena for di un homber S. E ora ey surgi un pelea. E ora ey A.F. cu tabata cana eynan a bay yuda J.A. cu tabata bringa. El a bisa cu e conoce J.A. y a dal un hende un scop. Ta asina cu Z.T. a dal un di e hendenan algun mokete. El a bisa cu el a mira hendenan ta bringa cu J.A. y a bay yuda. D.P. tambe a dal hende scop.
Ta asina cu e victima di atraco cu violencia S., ta un agente di Polis. Hues a mustra tambe cu na Warda di Polis ora cu presonan ta haya chens pa tuma aire, D.P. a haci expresionnan cu e ta haya bon di a bati e Polis y cu e tin un cuenta di regla cu Polis.
D.P. a bisa Hues cu 5 aña pasa el a wordo mal bati door di Polis ora a hay’e cu marihuana. El a keda algun dia den coma. D.P. a bisa Hues cu e no sa ta cual Polis a haci pero e momento ey el a sinti bon cu un Polis a wordo bati.
Otro atraco cu violencia: Despues di Kalibra Bar, e grupo a bay na Lekker Bar & Restaurant na Noord, caminda J.A. kier a bay ranca otro cadena. Z.T. a bis’e pa no hacie pero el a hacie tog riba un otro persona M.F. Ta asina cu segun A.F., el a bay cas pero Z.T. y D.P. si a bay Lekker.
Segun D.P. na Lekker e no a bringa. El a bay para e pelea y a ranca J.A. hiba den auto. E homber M.F. a haci denuncia caminda el a bringa cu J.A. cu a ranca su cadena. J.A. a grita pa ayudo caminda Z.T. a dal M.F. na cabez cu algo. E mester a bay hospital pa cose na cabez. Z.T. a desmenti di a dal M.F. patras di su cabez.
Hues a bisa cu segun investigacion di Polis, A.F. lo ta na cabez di un grupo cu el a manda pa atraca hende y ranca nan cadena. Tin un hende homber cu a bay yuda e victima di atraco y ta bisa cu el a wordo gedal cu mokete y el a reconoce riba potret Z.T. cu lo a menace cu un arma. Z.T. a remarca cu e cos aki ta parce un pelicula. El a bisa Hues cu hende ta bisa cosnan cu no ta berdad.
El a bisa cu por mira e video di seguridad. Hues a bisa cu tin un otro hende cu tambe ta bisa cu el a wordo menaza cu arma y e descripcion cu el a duna ta cuadra cu Z.T. Segun Z.T., ta un grupo e hendenan tabata y nan a planea con pa declara contra dje. Hues a mustra tambe cu na warda di Polis ora cu presonan ta haya chens pa tuma aire, D.P. a haci expresionnan cu el a dal e homber. Segun D.P. el a haci esey pa mustra tof.
Menaza di morto: Hues a mustra cu A.F. a manda mensahe WhatsApp pa e homber F., bisando cu e tin dos guy chikito cu ta loke pa laga pasa e promer morto di aña 2025. Esaki lo ta relaciona cu un asunto di placa di order pa pieza di auto. A.F. a bisa Hues cu e tabata rabia pasobra 3 luna a pasa sin cu el a haya nada. El a bisa Hues cu nada a pasa y cu el a haya su placa bek. Segun A.F., Polis a detene y a keda cu e 1.000 Florin cu A.F. a haya for di e homber. Hues a bisa cu Polis a confisca 1.400 y pico Florin.
Segun A.F. e placa ta placa di cu el a gana banda di beach. Hues a mustra cu ora di detencion, Polis a haya A.F. cu marihuana y cocaina. Polis ta sospecha cu A.F. tabata bende marihuana y cocaina pero A.F. ta bisa cu ta pa su propio uso.
Castigo extra: Hues a bisa cu Fiscal a mustra cu A.F. a haci delito den tempo di prueba. E tabata condena pa droga y Fiscal ta exigi pa e sinta e castigo condicional riba e castigo cu e tin cu haya awor.
Fiscal tambe a pidi pa e 6 aña di prison pa intento mata na Hulanda condicional di Z.T. wordo inclui cu e caso aki.
D.P. tambe tin carchi di castigo cu caso di maltrato severo. Apesar di a sali liber na Juli 2025, e ta cay sera na Augustus 2025.
Fiscal a baha pisa: Fiscal a bisa Hues cu e caso aki ta parce un pelicula. Riba un anochi 3 Augustus 2025, 3 atraco cu violencia a sosode. Maltrato di hendenan, menaza cu arma. Fiscal ta cuestiona e hecho cu ningun di sospechosonan no ta para responsabel. Fiscal ta haya cu J.A. a haci dos atraco cu violencia y Z.T. a menaza e tata di e dos hobennan cu arma. Esaki den Coconuts caminda e victimanan ta turista.
Na Kalibra Bar, J.A. a bay ranca cadena di S., un agente di Polis y ademas di J.A., Z.T., D.P. y A.F. a maltrat’e. Tur esaki por mira riba video di seguridad. Mientras cu S. tabata benta riba suela, nan a sigui bati’e. D.P. a expresa na warda di Polis con bon el a sinti ora el a bati e agente di Polis. Fiscal a bisa cu e no ta haya Z.T., D.P. y A.F. culpabel di atraco cu violencia y a pidi Hues pa declara nan liber. Pero Fiscal si ta haya cu nan ta culpabel di maltrato pisa di S.
Na Lekker Bar & Restaurant, J.A. atrobe a ranca cadena di e homber F. Despues Z.T., D.P. a bati’e. Un rato despues Polis a detene J.A., Z.T., D.P. y a haya den e auto e cadena di F. Tin hendenan cu a bay yuda e victima F., a wordo menaza door di Z.T. cu arma. Fiscal a pidi Hues pa declara A.F. liber pasobra no por mustra cu e tabata envolvi pero si tin sospechoso cu e tabata presente.
Fiscal a sigui bisa cu Polis a sigui nan tras y a mira maniobra sospechoso. Despues di a detene nan, a bay bek na altura di un lugar na Noord y a haya un pistool. Investigacion ta mustra cu e pistool a wordo benta for di e auto ora cu Polis a core nan tras. Tur esaki ta mustra cu ta Z.T. tabata usa e arma y D.P. a tira e arma for di e auto.
Fiscal a mustra cu tres di e victimanan tabata turista. Esnan den Coconuts. Pa cu castigo, Fiscal a bisa cu e ta tene cuenta cu posecion di arma na un lugar publico ta 21 luna di prison. Atraco cu violencia ta 24 luna di prison. Aki no ta trata di 1 sino 4 victima y cu a usa violencia caminda 3 tabata turista. J.A. (20) a admiti tur cos.
Fiscal a mustra cu Z.T. ta un recidivista. D.P. ta un residivista y no ta mira seriedad di su delitonan. Algun dia cu el a wordo laga liber, e ta bolbe cay sera. Fiscal tambe a cuestiona D.P. su expresionnan na warda di Polis. Fiscal a bisa cu A.F. ta un residivista y ta bolbe haci delito den su tempo di prueba.
Fiscal a exigi 4 aña di prison pa J.A., 3 aña pa D.P. di cual 6 luna ta condicional cu 3 aña di prueba. Fiscal a exigi pa Z.T., 3 aña di prison y pa A.F. 12 luna di prison. Ademas di esaki mester pone acerca e castigo condicional manera Fiscal a menciona.
