Den caso accidente fatal na Calbas
ORANJESTAD (AAN): Diabierna mainta pa oranan largo a trata e lamentable caso di accidente fatal, caminda e homber conocido futbolista Jeferson Lopez di 28 aña a perde su bida. Esaki a sosode 24 Mei 2024, caminda e homber Javier Tejedor Perez Tejedor (J.P.T.) di 64 aña, ta esun cu a ocasiona e accidente, door di bou influencia di alcohol, a dal frontal contra e defunto Lopez cu tabata coriendo un brommer Harley Davidson.
Aña pasa a introduci e ley Penal nobo caminda awor den casonan penal, ta permiti e victima of famia di e victima hiba palabra den Corte. Esey a sosode Diabierna tambe caminda e señora viuda di Lopez, e ruman muher di Lopez y e mama di Lopez a hiba palabra.
Famia kier husticia: E señora viuda di Lopez tabata presente pero no tabata sinti capaz pa papia. El a duna abogado mr. Emerencia su declaracion pa lesa pa Hues. mr. Emerencia a lesa cu ta inhumano loke nos a pasa aden. Bo por perde bo trabao y bo por spera un trabao. Ora bo perde bo bida, bo no tin nada mas. Hendenan bou influencia ta mata hende y laga famia cu tristeza. Despues di algun aña, nan ta liber. Un cos ta cu nos mester ta bon cu otro pasobra nos no sa e dia cu nos ta bay. E dia cu nos bay, nos tin cu duna cuenta na Dios.
E ruman muher di e victima tambe a papia. El a expresa cu e kier un punto final na e caso. El a cuminsa yora y a bisa cu e kier husticia pa loke a pasa. El a bisa cu e no ta bisiña di J.P.T. E no conoce J.P.T. cu ta un ilegal. El a kibra tur ley di trafico. Maneha auto bou influencia di alcohol. E daño cu J.P.T. a causa, ta inpagabel. No tin nada pa recomenza e bida di mi ruman. Laga e caso aki concientiza tur alcoholico pa busca ayudo.
E mama di Lopez, na yoramento a pidi abogado mr. Emerencia pa hiba palabra p’e. E abogado a expresa cu e mama den su carta ta bisa cu awe tur presente ta scucha con e accidente a sosode cu a causa morto di mi yiu Jeferson. Esaki a paraliza tur famia. Tumando medicamento pa no enfrenta e realidad. Despues di 3 luna mi mester a confronta e realidad. Solamente tristeza so a keda. Mi no por drumi anochi. Ningun hende por compronde mi tristeza.
Nada no ta igual mas. Jeferson tabata un persona hopi stima pa hopi persona. Mi bida a cambia pa semper. Abo manehador iresponsabel no por imagina bo cuanto tristeza bo a laga e famia. Un dia lo bo sali for di prison y bo ta cu bo famia. A nos no. Bo ta haya esey husto? Mi ta pidi Hues pa e sinta su castigo husto y despues pa deport’e for di Aruba. Dios guia Hues pa duna Hues e mihor decision. Tambe pa ministernan cambia e ley pa e famianan cu ta keda destroza.
