El a causa miskraam door di maltrato severo na e mucha - *For di 2005 e abusonan, violacion cu menaza tabata tuma lugar
ORANJESTAD (AAN) – Diabierna merdia 2’or via video conference Hues di Corte den Promer Instancia a atende e caso penal pro forma contra e sospechoso Rudy “Elvis” Weert. E sospechoso Weert tabata den un oficina na KIA mientras cu den sala di Corte tabata presente Hues, Fiscal y abogado mr. Mohamed. Via un screen grandi den sala di Corte tabata mira otro.
Fiscal a haci un serie di acusacionnan hopi serio contra Weert y a bisa cu e caso ta pro forma y ta pidi un otro fecha pro forma pendiente di un investigacion andando.
VIOLA MUCHA
E promer acusacion ta cu entre 19 Maart 2005 te cu 1 Maart 2009, Weert door di usa menaza y violencia, a viola e mucha G. E tempo ey G., tabatin 14 aña y tabata bou cuido di Weert. Fiscal a menciona cu Weert ta wordo sospecha di a mishi na e mucha su pechonan, su parti intimo y a tene relacion sexual cu e mucha. Esaki lo tabata sosode den un apartamento scondi.
ACTONAN INMORAL
Fiscal a sigui bisa cu e otro acusacion contra Weert ta cu entre 19 Maart 2005 te cu 18 Maart 2007, el a haci actonan inmoral cu e mucha G. cu tabata bou di su cuido. E mucha e tempo ey no tabatin 16 aña ainda. Fiscal a bisa cu Weert lo a mishi na partinan intimo di e mucha y a hasta tene relacion sexual cun’e.
Fiscal a bisa cu e mesun cos lo a sosode tambe entre 19 Maart 2007 te cu 1 Maart 2009.
MALTRATO SEVERO CU A CAUSA MISKRAAM
Fiscal tambe ta acusa Weert cu entre 19 Maart 2006 y 19 Maart 2009, intencional y premedita, a maltrata e hoben G. (18) cu consecuencia cu el a sufri un miskraam. Fiscal ta mustra cu Weert lo a hinca un hangua of algo skerpi na e parti intimo di G. cu consecuencia cu el a sufri un miskraam.
FALTA MAS INVESTIGACION RIBA ABORTUS
Fiscal na final a bisa Hues cu e ta propone pa fiha un otro caso pro forma 5 November 2021. Esaki pasobra ainda ta investigando un caso abortus cu Weert lo a haci cu e mesun victima aki.
E abogado mr. Mohamed no a trece nada padilanti y Hues a bisa cu e ta pospone e caso e ora ey pa dia 5 November 2021.
