A confisca mas cu 60 gram di cocaina na e cas
ORANJESTAD (AAN): E rumannan homber D.T.(56) y E.T. (55), diabierna mainta a presenta dilanti Hues pa un caso di bendemento di droga na e cas den Apelsinastraat. Hues a confirma e exigencia di Fiscal cu ta castigo combina.
E acusacion cu Fiscal a presenta contra e rumannan D.T. y E.T. ta cu entre 1 Januari 2025 y 9 October 2025, nan tabata bende, posecion y duna cocaina.
BENDEMENTO DI DROGA
Hues a puntra D.T. kico e tin di bisa riba e acusacion. Segun D.T., Polis a drenta den su camber y a haya algo cu no ta di dje sino su ruman E.T. El a bisa Hues cu e dia ey e no tabata na cas. Hues a bisa cu e sospecho ta cu D.T. tabata bende droga. D.T. a bisa cu e no tabata bende droga. Hues a bisa cu na Polis D.T. a bisa cu e tabata bende. D.T. a bisa Hues cu de vez en cuando e tabata bende pa e haya algun cen pasobra e no por traha, door cu a kita un dede di pia di dje. Hues a bisa cu dia 9 October 2025 el a wordo deteni. A lo largo D.T. a confirma cu e tabata bende.
Hues a puntra E.T. si e acusacion ta cuadra. Segun E.T., el a bende solamente 4 luna pasobra e tabata traha anochi. Hues a bisa cu tin testigonan cu ta papia cu E.T. lo tabata bende pa 1 aña caba. E.T. a reacciona cu esey no ta berdad y cu tin di e testigonan cu e no conoce mes y nan a bisa cu nan a cumpra un aña caba for di E.T.
POLIS OBSERVA
Hues a mustra cu segun e rapport di Polis, dia 1 Augustus 2025, un persona anonimo a notifica Polis cu den Apelsinastraat tin bendemento di droga door di D.T. y su yiu muher S. Polis a bay observa diferente dia den October 2025. Nan a mira cu diferente persona tabata bay na e cas y ta drenta y sali. Hopi biaha Polis a mira hende ta hinca algo den saco di carson. Esaki ta indicacion cu tin bendemento di droga.
HAYA DROGA DEN CAS
Dia 9 October 2025, Polis a haci investigacion na e cas y D.T. no tabata na cas. Polis a haya banda di e yiu homber di D.T. 40,49 gram di cocaina. Den camber di D.T. a haya 9 gram y den un lugar 14.4 gram di cocaina. E.T. a wordo haya cu droga. El a bisa Hues, cu e pochi cu a haya den camber di D.T. tabata di dje. Hues a puntra D.T. si el a mira e pochi den su camber. D.T. a bisa cu el a mira e pochi pero no a haci caso.
Hues a menciona cinco testigo cu e declara na Polis cu a cumpra droga for di D.T. y E.T. Nan a reconoce D.T. y E.T. riba potret. Hues a bisa cu tin 2 testigo cu ta papia cu a cuminsa cumpra for di 2024 y hopi biaha. Hues a mustra cu Polis a observa cu den un periodo di 1 ora, a mira 8 hende yega na e cas. Hues a bisa cu E.T. a declara cu e placa cu Polis a haya riba mesa den sala, ta di bende di droga. D.T. a bisa Hues cu e placa cu Polis a haya den su cashi, ta placa cu el a haya pa bende pisca. El a bisa cu e tabatin algo mas di 1 mil florin den un etui. El a bisa cu hendenan a pag’e caba pa cuminda cu D.T. ta haci di pisca. Hues a bisa cu 1900 florin y mas o menos 81 dollar a haya di D.T. Segun D.T. e dollars ta di dje cu e ta bay hunga den casino.
Hues a remarca cu E.T. a yega di wordo condena na 2017 pa droga. Hues a bisa cu pakico E.T. a bolbe bay bende droga. Segun E.T. promer biaha tabata un caso di yamada cu a scucha di droga pero no bendemento. Hues a remarca cu apesar cu E.T. a haya castigo, esey no a stop E.T. di bende droga. Hues a bisa cu segun orientacion di Hof, si bendemento di droga tabata 6 luna ta castigo entre 12 y 18 luna di prison e rumannan por spera.
FISCAL
Fiscal a bisa cu a base di informacion anonimo, Polis a bay observa na e cas den Apelsinastraat na October 2025 y a mira movecionnan. Dia 9 October 2025, Polis a haci investigacion na e cas y a haya droga y placa. Na opinion di Fiscal, ambos ruman a declara na Polis cu de vez en cuando a bende. Fiscal a mustra cu tin 5 testigo a declara di tabata cumpra for di e 2 rumannan. Fiscal ta haya legalmente proba cu entre 1 Januari 2025 y 9 October 2025, D.T. y E.T. tabata bende. Fiscal a bisa cu E.T. tabatin total 60.85 gram den su poder.
Pa cu e castigo, Fiscal a mustra cu e rumannan durante 9 luna tabata bende droga. Ademas a haya E.T. cu 60.85 gram di cocaina. Fiscal a bisa cu cocaina ta causa adiccion y tristeza den famia. Ademas e ta causa criminalidad. Fiscal a bisa cu e ta tene cuenta cu circumstancia personal di e rumannan y cu E.T. ya a yega di haya castigo pa droga. Fiscal a exigi pa D.T., 12 luna di prison di cual 3 luna ta condicional cu 3 aña di prueba. Fiscal a exigi pa E.T., 15 luna di prison di cual 3 luna ta condicional cu un tempo di prueba di 3 aña. Fiscal a sigui bisa cu e 60.85 gram di cocaina a wordo destrui, e 2 cellularnan confisca, E.T. por haya bek. E homber D.T. por haya bek e placa den e etui y e placa cu tabatin den un baki. E otro placanan cu a haya cu ta di bendemento di droga di E.T., lo keda confisca.
ABOGADO
Abogado mr. Kock di D.T. a bisa Hues cu e ta referi na decision di Hues. Mr. Edwards a bisa Hues cu E.T. a bisa cu ta 4 luna e tabata bende. E abogado a bisa cu E.T. a coopera cu Polis den e investigacion. E abogado a bisa Hues cu den Corte tambe E.T. a bisa cu ta 4 luna e tabata bende y a bisa cu e droganan haya ta di dje y no di D.T. E abogado a mustra cu tin testigo cu E.T. no conoce, a bisa cu nan tabata cumpra pa un periodo mas cu 1 aña. E abogado a bisa Hues pa tene cuenta cu E.T. tabata traha na un panderia y cu un castigo mas abao lo haci cu e lo por bay traha e trabao atrobe.
SENTENCIA
Hues a sera tratamento di e caso y a pospone e caso un rato pa bay evalua. Despues Hues a bolbe y dicta sentencia di biaha. Hues ta haya legalmente proba cu e rumannan E.T. y D.T. tabata bende droga durante e periodo 1 Januari 2025 y 9 October 2025. Pa cu e castigo, Hues a bisa cu e orientacion di Hof ta mas halto cu Ministerio Publico ta usa. Hues a sigui Fiscal su exigencia caminda ta haci un diferencia entre D.T. y E.T. Hues ta haya cu E.T. tabatin un funcion mas halto. Hues a condena D.T. na 12 luna di prison di cual 3 luna ta condicional cu 3 aña di prueba. Hues a condena E.T. na 15 luna di prison di cual 3 luna ta condicional cu un tempo di prueba di 3 aña. E droga lo wordo destrui y e placanan di D.T. lo wordo debolbe. E.T. lo haya su cellularnan bek y e placa cu tabata su salario. E resto di placa lo keda confisca.
