ORANJESTAD (AAN): E homber R. di 23 aña procedente di St. Maarten, riba Diabierna mainta a presenta den sala di Corte di Husticia pa scucha su sentencia. Hues ta hay’e culpabel y a confirma e exigencia di Fiscal.
Exigencia di Fiscal: Tabata dia 6 di October 2023, tratamento di e caso a tuma lugar caminda Fiscal bisa cu R. entre Augustus 21 y 13 Juli 2023 abusa di un mucha muher di 14 aña.
Pa cu e castigo, Fiscal a bisa cu mucha mester worde proteha pa tene relacion cu adulto, y aki R. di 23 aña ta tene relacion sexual cu mucha di 14 aña.
Fiscal a menciona un caso di e aña aki na Hulanda caminda a abusa di un mucha di14 aña y a condena e culpabel na 22 luna di prison. Fiscal a bisa cu pa cu e caso aki, e ta kere den un castigo combina pa asina R. haya guia di Reclassering. El a exigi 24 luna (2 aña) di prison di cual 15 luna ta condicional cu un tempo di prueba di 2 aña. Durante e tempo di prueba, R. ta cay bou guia di Reclassering.
Sentencia: Diabierna mainta Hues a bisa cu a keda legalmente proba cu R. a tene relacion sexual cu un mucha muher di 14 aña. Hues a rechaza e ponencia cu R. no tabata sa cu e mucha tabata menos cu 16 aña.
Hues a bisa cu ley ta purba proteha muchanan. Hues a sigui bisa cu den sociedad, ta obligacion di un homber pa averigua edad di e persona cu e kier tin relacion cun’e.
Castigo: Na opinion di Hues, aunke cu e mucha muher ta bisa cu e tabatin 16, e acusado R. no mester a kere.
Pa cu e castigo, Hues a tene cuenta cu un mucha di14 aña ta sali na estado. Esaki por tin consecuencia pa henter su bida. Tambe Hues a tene cuenta cu R. a siña su les y kier cuida e baby.
Hues a confirma e exigencia di Fiscal y a condena R. na 2 aña di prison di cual 15 luna ta condicional cu un tempo di prueba di 2 aña y bou guia di Reclasering. Esey ta nifica cu R. lo mester keda 9 luna sera den KIA y despues ta sali.
