ORANJESTAD (AAN): E hombernan C.R. y S.K. a presenta dilanti Hues pa e caso penal cu Ministerio Publico a cuminsa contra nan.
Hues a confirma e exigencia di Fiscal esta 2 aña di prison pa e tiramento, menaza y posecion di arma di candela.
E acusacionnan cu Fiscal a presenta contra C.R. ta cu riba 21 November 2023 e tabata complice di posecion di arma y bala cayente. Riba e mesun dia lo a menaza hende cu arma di candela. Tambe ta acusa C.R. di a horta un smartphone. S.K. ta wordo acusa di posesion di arma riba 23 November 2023 y 11 Februari 2024. Den sala di Corte tabata presente e damanan G. y K., kendenan tabata victima pero nan no kier a haci demanda.
Menaza cu Arma: Hues a puntra C.R. y S.K. riba e caso. S.K. a bisa cu e tabata stuur auto y a busca C.R. Nan a bay core rond pa C.R. trankiliza. C.R. a bisa Hues cu un rato promer e damanan K. y G. a kibra su auto pa jaloersheid. C.R. y S.K. a para e auto den cercania di cas di K. y G. C.R. y S.K. a cana bay na e cas na Savaneta. Segun C.R., su intension tabata pa bay kibra nan auto. Segun C.R., den auto el a bisa S.K. cu e ta bay kibra K. y G. nan auto.
Segun S.K., nan a bay pa dal hende pasobra nan no sa kico lo spera nan. C.R. a bisa Hues cu e no ta corda kico el a bisa. Hues a remarca cu e declaracionnan ta diferente. Hues a bisa cu tin camera di seguridad caminda ta mira C.R. y S.K. ta core bay na nan auto. Segun S.K., nan a cuminsa tira riba nan y el a bisa C.R. pa nan move. Hues a bisa cu C.R. a bisa na Polis cu e no sa nada di tiramento. C.R. a bisa Hues cu e no ta bay papia riba ningun hende. E no a bisa tampoco cu su auto a wordo kibra. Ta riba camera Polis a mira con C.R. su auto ta wordo kibra.
Hues a bisa cu tin 3 persona cu a declara cu ta C.R. a tira. C.R. a desmenti cu e tabatin arma di candela. Pa loke ta e hortamento di smartphone, segun C.R., el a coy e smartphone for di su pareha pasobra e smartphone ta di dje. Hues a bisa cu segun e dama G., C.R. a coy e smartphone for riba cu scochi.
Posesion di Arma: Hues a bisa cu den smartphone di S.K. a mira potret di un arma di candela riba 11 Februari 2024. Segun S.K. e arma no ta di dje y cu el a fia esaki. Segun S.K., tin hopi peliger riba caya y el a keda 3 dia cu e arma. Dia cu nan a tira riba dje y C.R., el a pidi e arma atrobe.
Hues a bisa cu Polis a bay na e lugar caminda tabatin tiramento y a haya 5 huls. Polis a papia cu e dama K. kende a bisa cu nan tabata 3 y a mira un auto color blauw ta core rond y na dado momento el a mira C.R. baha y los algun tiro den halto y expresa cosnan. G. a bisa mesun cos. E otro dama J. a bisa cu el a tende tironan y a scucha stem. Polis a bisa cu riba video di seguridad ta mira C.R. y S.K. ta core na pia.
Hues a mustra cu e problema a cuminsa door di problema entre C.R. y su amiga G. Hues a mustra tambe cu S.K. y C.R. a yega di haya condena caba pa posecion di arma di candela.
Fiscal a exigi 2 aña di prison: Fiscal ta haya legalmente proba tur e acusacionnan contra C.R. y S.K. El a bisa cu e motibo di tur e asunto aki ta jaloersheid, caminda C.R. a coy su smartphone for di su amiga G., pasobra segun C.R., G. tin un otro amigo. Dia 21 November 2023, G. lo a bay kibra auto di C.R. pasobra e ta sospecha cu C.R. lo tin otro muher. Polis a haya 5 huls na e lugar cu ta cuadra cu loke testigonan a declara. Fiscal a exigi pa ambos 2 aña di prison, kitando e tempo cu nan ta sera den KIA.
Abogadonan: Abogado mr. de Kort cu a representa C.R., a bisa Hues cu su cliente C.R. ta wordo acusa di complice di posecion di arma di candela y municion, menaza. Pa cu e acusacion di ladronicia, e abogado a bisa cu C.R. a coy su smartphone bek for di e dama G. pasobra nan relacion a caba. No tabatin violencia. G. tabata sospecha C.R. di tin un otro muher y 21 November 2023, el a kibra su auto. Na opinion di mr. de Kort, no por acusa C.R. di posecion di arma y municion.
No a haya arma na su cas. E ta haya cu e declaracion di e testigonan no ta consistente. El a mustra cu posiblemente ta S.K. a los tironan. E abogado a bisa cu ta riba conseho di S.K., C.R. a bay na cas di G. y no tabata sa cu S.K. tabatin arma.
Abogado mr. Mohamed a bisa cu ningun momento S.K. tabatin arma. Ta C.R. ta wordo acusa pasobra testigonan ta menciona su nomber y a scucha su stem. E abogado ta haya cu mester declara S.K. liber di a tira y menaza. S.K. a admiti di tabatin un arma di cual a haya potret den su smartphone.
Sentencia: Hues a sera tratamento di e caso y a dicta sentencia di biaha. Hues a bisa cu e ta haya legalmente proba e caso di tiramento y menaza y cu C.R. y S.K. ta culpable. Hues a mustra cu tin tres hende cu a declara cu nan a reconoce C.R. y a reconoce e auto cu ta di S.K. Na opinion di Hues, e declaracion di e tres testigonan ta completamente diferente cu declaracion di C.R. y S.K. Hues ta haya cu e declaracion di e testigonan ta cuadra cu loke por a mira riba imagennan di camera di segurida. Hues a bisa cu e no ta confia den declaracion di C.R. y S.K. E ta kere cu hunto C.R. y S.K. a bay na e cas y C.R. a tira 5 biaha y despues nan a core bay bek na e auto.
Hues ta haya cu S.K., despues di e tiramento, mester a distancia su mes pero no a haci asina. Pesey e ta haya cu nan ta complice di posecion di arma di candela. Pa loke ta menaza, Hues ta haya cu C.R. a menaza cu arma. El a grita palabranan y los tiro. Tambe Hues ta haya proba cu C.R. a horta e smartphone di e dama G. El a remarca cu aunke cu e ta un regalo di C.R., no por coy esaki sin mas. E forma con a haci esaki, no ta husto.
Hues ta haya S.K. culpable di posesion di arma riba 12 Februari 2024. Hues ta haya e casonan hopi serio. El a bisa cu cana rond cu arma di candela ta hopi serio. Pa cu e castigo, Hues a tene cuenta cu tur dos anterior ya caba a haya condena pa arma di candela. Hues a confirma e exigencia di Fiscal y a condena C.R. y S.K. na 2 aña di prison, kitando e tempo cu nan ta sera den KIA.
