Hues ta haya e dos rumannan Wouters complice ---
ORANJESTAD (AAN): Diabierna mainta via video conference Hues di Corte di Husticia a dicta sentencia den e caso penal contra Wuill Vrolijk, Joshua Wouters, Yael Frans y Brandon Wouters.
Hues ta haya nan tur complice cu riba 15 Januari 2021 a tira mata Lisander Leonardo Ignacio (Sammy) di 21 aña sinta den un auto den un cura di cas na Pos Chiquito. El a condena e rumannan Wouters na 18 aña di prison mientras cu Vrolijk a worde condena na 18 luna di prison y Frans na 15 luna di prison.
DEMANDA DAÑO: Algun siman pasa tratamento di e caso a tuma lugar caminda mama di Sammy, mama di e yiu di Sammy, A.L. E mama di Sammy a bisa cu e no a spera cu e muchanan ta bay haci algo asina cu su yiu. El a demanda daño haci na su auto, gasto di entiero. Daño inmaterial 6 mil Florin pa e dolor sinti y bay psycologo, 8.640 Florin pa entiero, auto mester di 5 mil Florin pa drecha. El a bisa cu despues di e asesinato el a keda 3 siman na cas sin por a haci nada. Rumannan a bay yud’e.
E mama di e yiu di Sammy, A.L. a exigi ayudo pa cria e yiu. E mucha cada vez ta puntra pa su tata y ta yora. El a bisa cu e mes tin cu bay psycologo. E tabata haya 500 Florin of mas for di e difunto pa mantene e mucha di 5 aña. El a bisa cu e ta traha pero no ta suficiente.
EXIGENCIA DI FISCAL: Fiscal a bisa cu for di investigacion ta mustra cu ta Yoshua a tira. Vrolijk a bisa cu el a mira Yoshua cu un pistool preto 9 mm y cu un penja. Frans a bisa cu Vrolijk tabata para hopi cerca y a mira Yoshua. Tanto Frans como Vrolijk a bisa cu ta Yoshua ta esun cu a tira. Tabatin confrontacion entre Frans y Yoshua y Vrolijk y Yoshua.
Tur dos a reconoce Yoshua como esun cu a tira. Fiscal a bisa cu Yoshua a laga pone un tattoo di druppel bao su wowo despues cu a tira Sammy. Esey ta un simbolo di gang ora a tira un hende mata.
E amiga di Yoshua a bisa cu e tabata kedando den hotel ora cu Sammy a worde tira mata. El a bay cerca Yoshua y Yoshua tabata huma marihuana riba nomber di Sammy. E amiga mes a bisa cu Yoshua a bisa cu el a tira Sammy mata. Yoshua mes a bisa cu el a huma marihuana riba nomber di Sammy y cu ta haci esey ora un enemigo a worde mata. Fiscal a mustra cu Brandon tabata den auto. Tanto Vrolijk como Frans a bisa cu Brandon tabata den e auto promer, durante y despues cu Sammy a worde mata. Na opinion di Fiscal, si Brandon no a insisti, e asesinato cruel aki no a tuma lugar.
El a exigi pa Brandon y Yoshua, 22 aña di prison. Pa Frans y Vrolijk, Fiscal a exigi 16 aña di prison
SENTENCIA: Diabierna mainta Hues a bisa cu dia 30 Juli 2019 Brandon tabata sinta na e veld di basketball na Village. Na dado momento un gang a pasa den auto y tira riba dje. Brandon a resulta herida y a keda lam. Despues el a puntra varios miembro di gang pa tuma venganza pa loke a pasa cun’e.
Dia 15 Januari 2021, Sammy a worde tira mata sinta den su auto cu 2 tiro den cabez. Vrolijk a declara na Polis cu Brandon a bis’e cu e mester bay bisti na preto pasobra nan mester bay regla un cuenta. Nan a bisa Vrolijk pa busca Frans y despues a bay Pos Chiquito. Ora Frans a puntra kico ta bay haci, Brandon a bisa cu nan ta bay spanta un hende.
Ora a yega Pos Chiquito, Frans a mira Yoshua cu arma den man. Nan a keda warda den un cas bao construccion y ora e auto blanco a pasa, nan a bay na e cas. Yoshua a bay cerca di e auto y Frans y Vrolijk a mira con Yoshua a los tiro. Tur tres a core bay. Tin testigo a bisa cu nan a tende tiro y mira 3 hende core bay.
COMPLICE DI ASESINATO: Hues ta haya legalmente proba cu Yoshua a tira Sammy mata. Esey ta mustra cu Yoshua a kita bida di un hende na un manera hopi laf. Hues a sigui bisa cu e asesinato a causa hopi dolor cerca famia y causa hopi inseguridad y miedo den comunidad.
Hues ta haya cu Brandon ta complice pasobra e tabata kier e venganza y a pidi diferente hende pa pone algo back p’e pasobra el a keda lam. Hues a mustra cu Vrolijk, aunke e tabata presente ora Sammy a worde mata, su intension tabata dirigi pa pelea den grupo. Frans su intension tabata menaza cu un arma. Esey ta haci cu e castigonan ta diferente.
CASTIGO: Hues a condena Yoshua y su ruman Brandon na 18 aña di prison. Hues a condena Vrolijk na 18 luna di prison mientras cu Frans a worde condena na 15 luna di prison.
Pa loke ta e demanda di daño di mas cu 41 mil Florin, Hues a bisa cu e ta rechaza e parti di alimentacion di e yiu di Sammy. Hues a aproba algo mas di 20 mil Florin. El a bisa cu e ta pone e medida di pago.
Esey ta nifica cu Gobierno lo duna e mama di difunto Sammy e placa mientras cu e acusadonan ta responsabel pa paga esaki back na Gobierno.
