ORANJESTAD (AAN): Un grupo di 4 persona a presenta den Corte di Husticia pa un caso di bendemento di droga for di un cas den J.G. Emanstraat y den Rancho.
Tur e acusadonan: e homber Dominicano J.A.L., e muhernan Dominicano P.F.L. y S.M., e homber Dominicano C.M., a nenga dilanti Hues di tabata bende droga.
Durante tratamento di e caso a resulta cu e mayoria realmente tabata bende. E unico cos cu a cambia durante tratamento di e caso, tabata e periodo den cual lo tabata bende droga. Promer tabata acusa e trio J.A.L., C.M. y S.M. di tabata bende durante 2 aña. E muher P.F.L. ta worde acusa di tabata bende den Rancho durante 1 aña.
SOSPECHOSO TA NENGA DI TABATA BENDE: Segun P.F.L., e tabata sera pa bendemento di droga y a priminti Hues cu e lo bay busca trabao y a haya trabao. El a bisa cu su casa ta sufri di cancer, AIDS y ta adicto, a dun’e 295 Florin pa cumpra y P.F.L. a duna un persona placa pa cumpra droga.
E momento cu a haya droga, Polis a yega banda di Fruteria Virgilio pa accion y el a benta e droga abao. El a bisa cu antes e tabata bende pero a priminti cu e no ta bende mas.
Hues a mustra cu ora a detene P.F.L., e tabatin piedranan di cocaina. Hues a bisa cu e tin e impresion cu na Polis, P.F.L. tabata bende. P.F.L. a bisa Hues cu esey tabata antes. Su ultimo condena di bendemento tabata na 2018 caminda el a haya castigo di 2 aña y 6 luna. Hues a mustra cu Polis ta bisa cu J.A.L. a declara cu P.F.L. tabata bende. P.F.L. a bisa cu esey tabata antes y no awor.
BENDEMENTO NA UN CAS: J.A.L. ta desmenti cu despues di a sali for KIA na December 2018 el a bolbe bende droga den J.G.Emanstraat. Nan ta yam’e Papo Chulo y su señora S.M.( Chula).
Hues a mustra cu Polis tabata haci observacion na e cas y a haya sospecho cu lo tabata bende droga. Tabatin hendenan ta bay na e cas y Polis a detene algun y a resulta cu nan tabata bay cumpra piedra di cocaina serca Papo y S.M.
E homber C.M. a bisa cu e tabata keda eynan pero no tabata bende droga. Hues a mustra cu tin hende a bisa cu a cumpra for di J.A.L., S.M. y C.M. Nan a splica cu ora e bentana ta habri na e cas, nan ta bende.
USA DROGA PA ALIVIA CANCER: J.A.L. a bisa Hues cu e ta usa piedra pasobra e tin cancer di weso y prostate y esey ta dun’e alivio. El a bisa cu tin hende ta bin serca dje pa busca droga y e ta regala nan droga.
No ta berdad cu e tabata bende. El a bisa Hues cu e ta papia e berdad y despues cu e tabata sera den KIA, el a bay Colombia pa tratamento y despues a bay Santo Domingo. E ta para riba cu e no tabata bende y cu ningun momento el a bisa cu P.F.L. tabata bende.
El a splica cu na Santo Domingo e tin cria di gay di pelea y ta viaha regular pa tratamento. Hues a bisa cu e hendenan a declara cu nan tabata cumpra pero no cu nan tabata haya regalo.
EXIGENCIA DI FISCAL: Fiscal a bisa cu Polis na October y November 2020 a observa na e cas y 12 November 2020 a haci investigacion na e cas. A haya droga, 280,6 gram di cocaina y 1.2 gram di marihuana. Polis a detene diferente persona cu a bay cumpra y nan a declara cu a cumpra for di e cas. Fiscal ta haya cu J.A.L. tabata bende pa 1 luna y mey, mirando su splicacion di viahe y tratamento.
Pa loke ta P.F.L., tin diferente persona a declara di tabata cumpra. A base di e declaracionnan e lo tabata bende pa 2 aña. A haye cu 11,4 gram di cocaina.
Pa loke ta S.M., tin diferente persona a bisa cu a cumpra for di S.M. Esey ta indica cu durante 1 aña e tabata bende. Pa loke ta C.M. tin algun persona a bisa di a cumpra for di C.M. Esey mustra cu tabata bende 1 luna y mey.
Fiscal a tene cuenta cu den pasado J.A.L., P.F.L., S.M. a yega haya condena pa droga. J.A.L., S.M. tabata bende na e cas y C.M. tabata yuda. J.A.L. a worde haya 280,6 gram y P.F.L. 11,4 gram.
Fiscal a bisa cu cocaina ta causa hopi tristeza den famia y causa criminalidad. El a exigi pa J.A.L. 18 luna di prison di cual 6 luna ta condicional cu 3 aña di prueba.
Pa P.F.L. el a exigi 16 luna di prison di cual 6 luna ta condicional cu 3 aña di prueba. Pa S.M., Fiscal a exigi 18 luna di prison di cual 6 luna ta condicional cu 3 aña di prueba. Pa C.M., Fiscal a exigi castigo igual na loke el a sinta caba. Fiscal tambe a exigi pa destrui e droganan confisca.
SENTENCIA: Despues di a scucha defensa di e abogadonan, Hues a sera tratamento di e caso y dicta sentencia di biaha. Hues a bisa cu pa loke ta J.A.L. a base di investigacion di Polis y hendenan deteni, e ta haya cu durante 1 luna y mey el a bende droga.
Pa loke S.M., Hues a bisa cu e no tin motibo pa duda den declaracion di hendenan cu a worde deteni cu droga y a bisa di a cumpra for di S.M. E ta comparti opinion di Fiscal cu no ta 2 aña y mey sino 1 aña.
Pa loke ta C.M., Hues a bisa cu aunke cu e ta acusa 2 aña y tin hendenan a bisa di a cumpra for di C.M., e ta sigui opinion di Fiscal cu ta 1 luna y mey e tabata bende.
Pa loke ta P.F.L., Hues ta kere cu loke P.F.L. a bisa cu e tabata bende no ta asina. Tin diferente hende cu ta bisa di a cumpra for di P.F.L. y pa un periodo di 1 aña.
Hues a bisa cu no ta promer biaha cu J.A.L., S.M. y P.F.L. cay sera pa droga. El a condena J.A.L. na 16 luna di prison di cual 6 luna ta condicional cu 3 aña di prueba. Hues a condena S.M. manera Fiscal a exigi esta 18 luna di prison di cual 6 luna ta condicional cu 3 aña di prueba.
Pa C.M., Hues ta haya cu el a sinta suficiente. El a conden’e na 180 dia di prison y e mesun dia mester worde laga liber. Hues a condena P.F.L. na 18 luna di prison di cual 6 luna ta condicional cu 3 aña di prueba. E droganan ta worde destrui.
