El a wordo retira di Cuerpo Policial
ORANJESTAD (AAN): Diabierna mainta Corte di Husticia a trata e caso penal cu Ministerio Publico a cuminsa contra e agente di Polis, S., kende ta wordo acusa di a viola y menaza cu cuchio su pareha cu kende e tin un yiu.
E sospechoso S. a presenta den Corte caminda Fiscal a acus’e cu entre Januari 2017 y Augustus 2021, el a viola 3 biaha su pareha.
VIOLA SU MESUN PAREHA
Hues a mustra cu entre Januari 2017 y Augustus 2021, S. a viola su pareha 3 biaha. E ultimo biaha tabata na Augustus 2021.
E ultimo biaha S. a viola su pareha poniendo cuchio na su garganta. Durante tratamento di e caso ta sali na cla cu e dia ey S. a yega cas burachi y su yiu muher a bisa: “papia ta burachi atrobe!” Esey a pone cu el a perde cabez y a saca un cuchio. E ex señora a core hiba e mucha den un camber y lock esaki.
- a bay riba su pareha, pone cuchio na su garganta y hink’e den un camber. Den e camber S. a viola su mesun pareha na forma brutal
VICTIMA BAY SCONDE
E victima despues di esey kier a huy pero e no por bay na cas di su mama pasobra un biaha cu el a bay na cas di su mama, e homber a hay’e tog.
E biaha aki el a dicidi di bay na cas di un amiga y a keda eynan scondi cu su yiu. El a conta e amiga tur loke a pasa.
DIVORCIA Y HACI DENUNCIA
El a cuminsa un proceso di divorcio y despues cu el a divorcia el a bay haci denuncia na Polis. Segun declaracion di e ex pareha, el a warda tur e tempo ey pasobra e tabatin hopi miedo di S. kende ta hopi agresivo y ora e ta bebi e ta bira peor ainda.
Tambe e victima a declara na Polis, cu e tabata duda promer den haci denuncia door di S. ta un Polis y e no sa si autoridad lo bay haci algo contra S. Na dado momento el a coy curashi y a haci denuncia.
RETIRA DI POLIS
Ta asina cu S. a wordo retira di Polis door cu e tin hopi problema di abuso di alcohol. Mando di Polis a duna S. chens pa e rehabilita pero e no a busca ayudo. Ta asina cu S. no ta di acuerdo cu el a wordo retira y a apela contra e decision di retiro di Polis.
El a bisa cu e kier bay Hulanda caminda e tin un otro pareha.
FISCAL
Fiscal a bisa cu ta trata aki di un caso hopi serio. El a cuestiona e forma con e homber a abusa di su mesun pareha. Fiscal a splica cu normal a base di ley, e lo a exigi 5 aña y 6 luna di prison pero Fiscal a tene cuenta cu e raport di Reclassering cu ta mustra con lo por yuda S.
Fiscal a sigui splica cu segun ley, si e exigi un castigo mas cu 5 aña, no ta posibel pa S. haya ayudo.
Teniendo tur esey na cuenta, el a exigi 4 aña di prison di cual 4 luna ta condicional cu 3 aña di prueba y bou guia di Reclassering. Fiscal a sigui bisa cu e no ta bay pidi pa prohibi S. papia cu su ex pasobra nan mester yega na un areglo pa S. tin contacto cu su yiu.
Hues a bisa cu e ta bay studia e caso y dentro di algun siman lo tin sentencia.
