Corte Superior a declara apelacion di Besaril contra su condena no-admisibel

Corte Superior a declara apelacion di Besaril contra su condena no-admisibel

Abogado mr. Canwood ta evaluando Corte di Casacion

ORANJESTAD (AAN): Dialuna mainta Corte Superior a trata e protesta di Procurador General (PG) contra e apelacion di ex-Ministro Plenipotenciario Guilfred Besaril.

   Ta asina cu Besaril a apela su sentencia di 13 Juni 2025 caminda Hues a condena Besaril na 20 luna di prison di cual 10 luna ta condicional cu 3 aña di prueba. Den caso kita propiedad, Hues a condena Besaril cu mester paga 138.688 Florin y si no paga e lo mester bay 1 aña di prison. Despues di debate entre PG y abogado mr. Canwood, Hof (tres Hues) di Corte Superior a declara e apelacion no-admisibel.

   Apelacion na tempo of no: Dialuna mainta Besaril no a presenta. Su abogado mr. Canwood a informa Hof cu Besaril no por ta presente door di ta sufri quebrante di salud.

   Hof di Corte Superior a bisa cu ta trata e caso pa dicidi si e apelacion ta admisible of no. Hof a mustra cu 27 Juni 2025, mr. Canwood a manda email na Griffie, Corte, pa informa cu ta apela e sentencia di 13 Juni 2025.

   PG a remarca cu e apelacion no ta admisible. PG a mustra cu dia 13 Juni 2025, Hues a duna sentencia y a haya Besaril culpabel. PG a apela e sentencia e mesun dia, y te cu fecha 27 Juni 2025 abogado a apela. PG a bisa cu segun ley, dentro di 14 dia despues di e sentencia, mester entrega apelacion na Griffie na Corte.

   Pues PG ta convenci cu e email cu abogado mr. Canwood a manda, ta laat haci o sea despues di oranan di trabao di Griffie. PG a mustra cu tin sentencianan di Corte Supremo caba riba e cuestion cu a entrega apelacion laat. PG ta haya cu Hof cu mester declara e apelacion no-admisibel.

   Abogado mr. Canwood a bisa Hof cu contrario cu opinion di PG, e apelacion ta haci na tempo. El a mustra cu segun ley, via email por manda e apelacion pa Griffie. Na opinion di abogado, ningun caminda ta para cu esaki mester sosode promer cu cierto ora. E abogado a bisa Hues cu pa añanan largo mandamento di email pa Griffie ta sosode caminda Griffie ta notifica su siguiente dia cu e apelacion ta haci.

   Apelacion no ta admisibel: Hof a pospone e caso un rato, pa asina e tres Huesnan por papia cu otro y evalua. Despues di un rato nan a bolbe y a dicta sentencia. Hof ta haya cu e apelacion no ta admisibel. Hof ta haya cu no a cumpli cu e termino stipula pa ley. Hof a bisa cu mr. Canwood lo por apela contra esaki tambe.

   Por a compronde cu mr. Canwood a conseha su cliente Besaril pa apela y laga Corte di Casacion na Hulanda (6 Hues) tuma un decision final.