ORANJESTAD (AAN): Dialuna merdia 1:45 pm, Hof di Corte Superior a dicta sentencia den e apelacion di Elvis Weert contra su condena di 9 aña di prison.
Ta asina cu apesar cu Hof a bisa cu door di introduccion di e ley nobo, tin delito cu a caduca y no por persigui Weert pesey, toch Hof a mantene e castigo na 9 aña di prison.
Dia 6 di Februari 2023, Hof a trata e apelacion di ex-locutor Elvis Weert, caminda Weert a bisa cu e ta haya e castigo mucho halto y a pidi ayudo di Hof pa e haya tratamento awor di psycologo, pa e no bolbe haci e delito aki. El a bisa Hof cu ta duel’e loke a sosode. Procurador General a bisa Hof cu e ta haya Weert culpabel y a exigi 9 aña di prison, mescos cu e castigo duna pa Corte den Promer Instancia.
Sentencia: Huez di Corte di Husticia di Aruba, a lesa e sentencia di Hof di Corte Superior. Hof ta mustra cu Weert entre 19 Maart 2009 y 1 Maart 2015 a comete delitonan.
Ta asina cu tin ley nobo a keda introduci y esey a haci cu tin un delito cu Weert a haci cu ta cay afor, door di e periodo cu a transcuri.
Weert culpabel di haci abortus: Hof a bisa cu abogado mr. Mohamed a pidi pa declara Weert liber di e acusacion di dos abortus, cual ta worde considera maltrato severo. E abogado a mustra cu e promer abortus a worde haci door di un ginecologo y e di dos door di Weert mes, caminda Weert a injecta den e parti intimo di e dama G.
Hof ta mustra cu e dama G., e tempo ey tabatin 17 aña y no ta nada straño cu door di e practica cu Weert a haci, a benta e baby afor. Hof a rechaza e defensa di abogado mr. Mohamed.
A abusa di su yiu di crianza: Hof pa cu e castigo, a tene cuenta cu durante un periodo largo, Weert a abusa sexual di su yiu di crianza. Esaki tempo cu e mucha G. tabatin 14 aña te cu su 18 aña. Hof ta haya cu Weert ningun momento a tene consideracion cu sentimento di e mucha sino tabata blo pensa pa satisfase su mes.
Hof ta haya cu di e hechonan aki, dos biaha G. a sali na estado y Weert a laga haci dos biaha abortus. Hof a mustra cu abortus por afecta e mucha pa un tempo largo. Hof a tuma Weert na malo pa esaki.
Mentalidad narcista: Hof pa cu e castigo, tambe a tene cuenta cu e raport di psycologo, cu ta mustra cu Weert ta gaba su mes y tin un mentalidad narcista. Tambe cu Weert tin un mentalidad anti-social caminda e ta tira culpa riba otro. E psycologo ta haya cu door di e mentalidadnan aki, Weert no ta realisa kico el a haci.
Psycologo ta bisa cu pa un parti, Weert no ta responsabel. E ta haya cu Weert mester di tratamento pa evita cu e lo bolbe haci mesun cos, si e haya un pareha cu tin yiu.
Castigo: Pa loke ta e peticion di Weert na Hof pa e haya tratamento awor, pa evita cu ora e sali e lo bolbe repiti, Hof a bisa cu e tratamento lo por tuma lugar despues cu Weert sinta su castigo.
Hof a rechaza e apelacion di Weert y a conden’e na 9 aña di prison. Esey ta nifica cu Hof a confirma e sentencia di Corte den Promer Instancia.
