Door di e impacto, dos otro auto a pasa riba e victima cu a causa su morto
ORANJESTAD (AAN): E homber di inicial S.T. a wordo haya culpabel di a dal un homber adulto mayor peaton, Croes, y core bay. Esaki a sosode 2 December 2024 den oranan di anochi, riba Green Corridor di Oranjestad pa San Nicolas na altura di Pos Chiquito. Door di e impacto, e victima a bay cay riba e otro banda di caminda y dos auto biniendo di direccion contrario, a pasa riba e victima cu consecuencia cu el a fayece. Hues a confirma e exigencia di Fiscal cu ta castigo combina.
Dal homber cu auto y core bay: E acusacion cu Fiscal a presenta contra S.T. ta cu riba 2 December 2024, el a ocasiona un accidente y core bay lagando e victima den un situacion desampara. Tambe cu S.T. no tabatin rijbewijs.
Hues a bisa cu e accidente a sosode 7:30’or di anochi riba Green Corridor di Oranjestad pa San Nicolas. E sospechoso S.T. a dal e peaton homber Croes. Door di e impacto, Croes a bay cay riba otro banda di caminda y dos otro auto cu tabata bayendo pabao inocentemente a pasa riba Croes cu a causa cu el a fayece.
Hues a bisa cu esaki tabata un accidente tragico. Fiscal a bisa Hues cu S.T. ta wordo acusa di door di su culpa, pero Fiscal no ta hay’e culpabel di a ocasiona e accidente sino di a core bay despues di e accidente y no tabatin rijbewijs.
Core auto sin rijbewijs: Hues a puntra S.T., pakico S.T. a core auto sin rijbewijs. Segun S.T., e tabata bayendo na un amigo na San Nicolas. Hues a remarca cu S.T. no por core auto sin rijbewijs. Hues a bisa cu rijbewijs ta un prueba cu bo por core auto den trafico. Den e caso aki, S.T. no por core auto pasobra e no a pasa ningun test.
Hues a mustra cu S.T. a yega di pasa examen di rijbewijs pero no a logra. Hues a remarca tambe cu e auto ta di S.T. pero S.T. no por core auto. Segun S.T., e auto ta riba nomber di su ruman homber. Hues a mustra cu anterior S.T. a haya multa di 650 Florin pa tabata core auto sin rijbewijs.
Hues a bisa cu S.T. a tuma riesgo pa core auto toch cu tur consecuencia cu e por trece cune. No solamente cu S.T. por ta envolvi den accidente pero tambe cu aseguro no ta cubri nada y S.T. mes mester paga tur gasto.
“A spanta” y core bay: Hues a puntra S.T. si e por bisa kico a sosode. S.T. a bisa Hues cu tabata mas o menos 7.30 di anochi y e tabata bayendo San Nicolas. Diripiente el a sinti cu el a dal contra algo. El a mira den spiel y no a mira nada. El a spanta y a sigui core. El a bisa Hues cu ta promer biaha cu e ta pasa den algo asina. S.T. a bisa Hues cu ta dificil pa papia di e accidente pasobra ainda e situacion ta traha riba dje.
Hues a mustra cu S.T. a bisa na Polis cu el a spanta y no por a kere cu hende ta cruza caminda riba un caminda scur asina. El a core bay na un amigo y a bis’e cu el a dal contra algo. E amigo a bay check riba media y a mira cu S.T. a dal un hende riba caminda. E momento ey S.T. a pensa cu e ta den hopi problema. Hues a remarca cu tin tres tipo di reaccion. Tin hende ta para y bay den accion di biaha. Tin hende ta para y ta paraliza. Tin hende cu ta sigui core bay.
Hues a sigui bisa cu ta Polis a bay busca S.T. y cu S.T. a laga e auto cerca un amigo. Segun S.T. e tabata baña pa bay Polis. Hues a remarca cu ta hopi casualidad cu ora Polis a bay pa detene S.T., e ta bisa cu net e tabata bayendo Polis. Hues a mustra cu 8 December 2024, 6 dia despues di e accidente, Polis a detene S.T. Hues a bisa S.T. pa e papia e berdad pasobra e no ta kere cu ta manera S.T. ta bisa cu e tabata pa bay Polis. Segun S.T., el a papia cu su mama y tabata planea pa bay Polis.
Chauffeur awor tin rijbewijs: Hues a puntra S.T. kico e ta pensa di e caso awor. S.T. a bisa cu e ta lamenta loke a sosode. Hues a puntra S.T. si e tin rijbewijs. S.T. a bisa Hues cu algun luna pasa el a haya su rijbewijs.
Ta asina cu Hues a bisa S.T. pa e bay busca su rijbewijs den auto unda S.T. a lag’e. Hues a pospone e caso un rato y ora S.T. a bolbe a sigui cu e caso caminda S.T. a mustra su rijbewijs na Hues. Hues kier a mira si di berdad S.T. tabatin rijbewijs.
Fiscal a puntra S.T., si di berdad e tabatin intension di bay Polis pasobra na Polis S.T. a duna otro declaracion. Fiscal a bisa cu na Polis S.T. a bisa cu e dia ey, e, su mama, su ruman y su amiga, a sali pa bay come hunto. Fiscal a remarca cu den ningun interogacion, S.T. a bisa cu tabata su intension pa bay Polis. Segun S.T., despues di come e lo a bay Polis.
Hues a bisa cu S.T. a wordo deteni dia 8 December y 25 December 2024, el a wordo laga liber.
Fiscal a exigi castigo combina: Fiscal a bisa Hues cu e ta haya S.T. ta culpabel di a core bay na Pos Chiquito despues di dal un hende. Un testigo a mira e auto y a duna na Polis tur informacion. Asina Polis a bin haya S.T. A resulta cu S.T. no tin rijbewijs. Fiscal a bisa cu e ta tuma S.T. na malo di a core bay despues di a dal e victima Croes.
Tambe Fiscal a cuestiona e hecho cu S.T. tabata core sin rijbewijs. Fiscal a sigui bisa cu entretanto S.T. a haya rijbewijs. Fiscal a exigi 30 dia di prison, di cual 12 dia ta condicional cu un tempo di prueba di 2 aña. Esey ta nifica cu S.T. no mester bay sera den prison. Pa loke ta e auto cu a keda confisca, Fiscal a bisa cu e auto lo por wordo debolbe.
Abogado: mr. Illes a bisa Hues cu S.T. ta admiti di a dal e homber Croes cu auto y core bay. E abogado a bisa cu S.T. ta lamenta masha loke a sosode. E abogado a sigui bisa cu ora di detencion di S.T., el a para responsabel pa loke el a haci. El a bisa cu S.T. a declara na Polis, cu el a spanta asina hopi cu el a core bay. El a bisa Hues cu S.T. ta lamenta hopi loke a pasa. El a bisa cu S.T. tin un trabao y ta haya e exigencia di Fiscal corecto.
Sentencia: Hues a sera tratamento di e caso y a dicta sentencia di biaha. Hues a bisa cu ta un hecho cu S.T. a dal e homber Croes cu auto y core bay. Hues a declara S.T. liber di e acusacion di a laga un homber desampara. Hues a bisa cu e ta compronde cu hende por reacciona asina di core bay pero e ta haya cu mester para responsabel y bay entrega su mes na Polis. Esey no a sosode y tambe cu S.T. a haya boet pa core sin rijbewijs pero awor tin rijbewijs.
Hues ta haya e castigo exigi pa Fiscal na su lugar. Hues a condena S.T. na 30 dia di prison, di cual 12 dia ta condicional cu un tempo di prueba di 2 aña. Tambe cu e auto por wordo debolbe.
