Paketenan tabata worde manda te hasta pa Australia
ORANJESTAD (AAN): Riba Diabierna, e muhe J.S. di 38 aña, y e homber M.T. di 36 aña, a haya condena pa ta complice den mandamento di paketenan di mangel y cosnan di fiesta cu tabatin cocaina scondi den nan. Nan tabata haci esaki pa un homber di Curacao, M., cu tabata manda e paketenan Aruba pa despues esakinan worde manda pa diferente paisnan manera Merca, Hulanda, Arabia Saudita y hasta Australia.
E acusacion cu Fiscal a presenta den Corte contra e muhe J.S. ta cu entre 20 April 2025 y 5 Mei 2025 el a manda paketenan. Fiscal a acusa M.T. cu dia 5 Mei 2025, el a manda 2 pakete. Ta asina cu Douane a intercepta algun pakete y asina e caso a cuminsa.
Exporta droga den mangel: Hues a cuminsa haci preguntanan na J.S. kende a bisa cu el a manda e paketenan pero no tabata sa cu tabatin droga den esakinan. El a bisa Hues cu e tabata hacie pa un conoci homber M. di Curacao. El a bisa cu M. a bin Aruba cu e paketenan for di Curacao cla pa worde manda. Ta asina cu M. a pidie pa manda pakete Hulanda.
Segun e muhe J.S. el a mira e paketenan cu ta di mangel y cos pa fiesta. Hues a mustra cu e paketenan aki a bay pa Arabia Saudita, Australia y otro paisnan. Ta masha straño cu ta manda mangel y coy fiesta pa e paisnan siendo cu aya mes ta hay esaki. Hues a remarca pakico M. ta bin for di Curacao, Aruba pa bay manda paketenan. Esey no ta logico. Segun J.S., door cu e tabata den un situacion financiero fastioso, M. a yud’e. M. a dun’e 1.000 Florin pa paga gastonan pa manda e paketenan, mientras cu el a paga J.S., 2 mil Florin.
Hues ta haya cu como amigo, M. por a djis duna J.S. placa. Hues a mustra cu segun e relato di investigacion, e mangelnan tabatin gel di cocaina den nan. Den e cosnan di fiesta tambe a haya cocaina. Segun J.S., dos biaha el a haya 1.000 Florin y a worde priminti 2 mil dollar. Segun J.S. e no a haya nada. Hues a remarca cu 2 mil Dollar ta hopi placa pa djis manda mangelnan y cos di fiesta. Segun J.S., M. tabata sa di su situacion y pesey a ofrece e placa aki.
Hues a mustra cu investigacion di Polis ta mustra cu J.S. a pidi M.T. pa manda paketenan via postkantoor na San Nicolas. J.S. a splica Hues cu el a pidi M.T. hacie un fabor pasobra e no tabata bon bisti. E tabata cerca M.T. y a puntr’e pa hacie e fabor. E ora ey M.T. a puntr’e si tur cos ta ok cu e 2 paketenan. J.S. a bis’e cu si. Nan a bay hunto postkantoor y M.T. a bay entrega e pakete pa worde manda den exterior. J.S. a bisa cu el a duna M.T. 500 Florin pa paga pa e gastonan y e resto ta keda pa M.T. Hues a remarca, cu paketenan tabata worde manda pa diferente paisnan rond mundo.
Segun J.S., ta M. a pidi’e manda e paketenan pa otro paisnan. El a bisa cu segun M., door cu na Curacao nan ta haci problema, el a pidi J.S. hacie na Aruba. J.S. a bisa Hues cu e otro paketenan a bay sin problema.
Hues a puntra M.T., y el a bisa cu ta asina cu ta J.S. a pidi’e pa manda e 2 paketenan. El a bisa cu J.S. a dun’e 500 Florin pa paga pa e gastonan y e resto ta p’e. El a bisa cu el a puntra J.S. si tur e paketenan tabata bon o sea sin droga y J.S. a bis’e cu tur cos ta bon. Segun M.T., el a kere den palabra di J.S. Hues a remarca cu den pasado M.T. a cay cera na Hulanda pa bolitanan di droga. E ta haya cu M.T. ya ta avisa y no mester a cay pa tentacion di hendenan cu ta purba tur manera pa exporta droga.
Ta asina cu actualmente J.S. ta den libertad. Hues a bisa cu a laga J.S. den libertad pasobra su mama a fayece y no tin hende pa mira pa J.S. su dos yiunan. E libertad ta mara na condicion cu J.S. ta worde guia door di Reclassering. Ta asina cu actualmente J.S. tin un trabao y asina por paga tur su debenan y ta cuidando su dos yiunan. Parce cu e tata di e yiunan no kier haci nada y esey ta haci cu J.S. mester percura pa su yiunan.
Fiscal: Fiscal a bisa Hues cu en total, 3 pakete a keda intercepta. 30 April 2025 Douane a intercepta 1 pakete for di DHL Courier cu mester a bay Australia. A haya mangelnan cu cosnan di fiesta cu a pisa 2.248 gram, den cual tin cocaina. Despues di investigacion di laboratorio a constata cu e cantidad di cocaina mes ta 702 gram.
Dia 5 Mei 2025, 2 pakete a keda intercepta na Postkantoor San Nicolas. Un pakete tabata pa Merca y un otro pa Hulanda. Ambos a pisa 1.366 gram, di cual 267 gram tabata cocaina.
Fiscal ta haya cu tanto J.S. como M.T. tabata sa cu tin droga den e mangelnan y cosnan di fiesta. Fiscal a mustra cu ta hopi straño cu un amigo for di Curacao ta pidi J.S. manda paketenan cu mangel pa paisnan. Fiscal a sigui bisa cu J.S. a bisa cu el a haya 2 mil Florin pa manda e paketenan. Fiscal ta haya cu J.S. a tuma e chens cu e tabata manda droga. Fiscal a bisa cu e ta haya cu J.S. ta complice di cu entre 20 April y 5 Mei 2025 a exporta cocaina. Fiscal a sigui bisa cu M.T. ta complice cu riba 5 Mei 2025 a exporta cocaina. Fiscal a mustra tambe cu M.T. a yega di cay sera na Hulanda pa guli bolitanan.
Fiscal a exigi pa J.S. 18 luna di prison di cual 6 luna ta condicional cu 2 aña di prueba y bao guia di Reclassering. Fiscal a bisa Hues cu esey ta encera cu J.S. tin cu bolbe bay sera.
Fiscal a exigi pa M.T. 15 luna di prison di cual 5 luna ta condicional cu 3 aña di prueba.
Defensa di abogado: Abogado mr. Canwood di J.S., a bisa Hues cu no por culpa J.S. di exporta cocaina. El a mustra cu M. a bin Aruba for di Curacao y e mes a manda paketenan. E abogado no ta haya cu J.S. ta complice. El a mustra cu e homber M. no ta conoci pa traficacion di droga. E homber M. mes tabata bay cu J.S. pa cumpra mangelnan y articulonan di fiesta. J.S. no a sospecha cu e tabata exporta droga. E abogado a sigui bisa cu M. kier a yuda J.S. den su situacion. Awor, despues di tur loke a sosode, por conclui cu J.S. tabata hopi kens di no a paga mihor tino.
E pregunta ta, pakico M. mes no tabata manda esakinan. E abogado a sigui bisa cu J.S. inconciente, a pidi M.T. pa haci un fabor pa manda 2 paketenan. Segun mr. Canwood, por tin preguntanan di con a bay manda mangelnan y cosnan di fiesta pero aki ta trata di hacimento di fabor. E abogado a bisa Hues cu J.S. a worde laga liber door cu su mama a fayece y e mester cuida su yiunan.
Si bolbe cer’e, e chens ta grandi cu e lo perde e cas di huur y no tin hende pa cuida e muchanan. J.S. actualmente ta bou guia di Reclasering y tin un trabao pa asina paga su debe y cuida su yiunan. Na opinion di mr. Canwood, si duna castigo prison lo bay hinca J.S. den hopi problema social. El a pidi Hues pa duna J.S. un castigo combina pa evita cu J.S. tin cu bolbe bay sera.
Abogado mr. Kuster di M.T., a bisa Hues cu M.T. a haci un fabor na J.S. pa manda 2 pakete. El a haya 500 Florin pa manda e paketenan y e resto lo ta p’e. E no a haya pago. Nunca M.T. a pensa cu e lo worde usa pa manda droga. El a puntra J.S. si tur cos ta bon cu e cahanan o sea cu no tin droga. J.S. a sigura cu no tin droga. E abogado a pidi Hues pa tene cuenta cu si M.T. keda sera, e lo bira mas dificil pa e haya trabao. El a pidi pa duna castigo condicional bou guia di Reclasering pa e parti di castigo cu ainda falta.
Sentencia: Hues a sera tratamento di e caso y a pospone e caso un rato pa e bay evalua. El a bolbe y a dicta sentencia. Hues ta haya legalmente proba cu ambos ta culpabel di exporta paketenan cu droga. Hues ta haya cu J.S. y M.T. mester por a ripara cu aki ta trata di droga mirando cu ta mangelnan. Na opinion di Hues, especial M.T. cu a yega di cay cera pa gulimento di bolita, mester a sospecha algo.
Hues a condena M.T. na 450 dia di prison di cual 258 dia ta condicional y cu 3 aña prueba. E tempo di prueba ta bao guia di Reclasering. Hues ta haya cu M.T. a sinta suficiente. Esey ta nifica cu ayera mes M.T. a sali liber.
Pa loke ta J.S., Hues ta haya cu no ta na su lugar pa bolbe mand’e den KIA. Hues a condena J.S. na 300 dia di prison di cual 222 dia ta condicional y 3 aña di prueba bao guia Reclassering. Ademas Hues a condena J.S. na 240 ora di trabao pa comunidad. Si e no cumpli, e lo mester bay 120 dia den prison.
Hues a bisa cu esey ta nifica cu J.S. no mester bay sera back. Por a mira cu J.S. a cuminsa yora di felicidad mientras cu M.T. a lanta cabez wak den laira cu mannan cruza, gradiciendo Dios.
