E rumannan Boekhoudt por poco a mata e turista!
- an tabata droga y burachi cu no ta corda nada
- Recherche a traha incansable pa detene e duo
ORANJESTAD (AAN): Dos hoben cu a pone Aruba su cara na berguensa, a presenta Diabierna mainta dilanti Hues pa responde riba e caso serio cu nan ta wordo acusa di dje, esta di a bati un turista Canades inocente dilanti su famia riba e parkinglot den Werfstraat na Playa.
Hues den Prome Instancia a trata Diabierna contra e dos sospechosonan cu ta worde acusa di intento di homicidio. E sospechosonan ta e rumannan Boekhoudt, esta Timothy E.A. Boekhoudt di 24 aña y Carl-Angelo M-G.E. Boekhoudt di 22 aña.
Nan ta wordo acusa di a dal y scop un turista Canades asina hopi, te cu el a sufri lesion fisico hopi grave y cu hasta e lo por a fayece. E incidente violento aki a tuma lugar riba e parkinglot pariba di e cruiseterminal na Oranjestad riba 26 di December 2022.
E dos sospechosonan Boekhoudt a admiti loke nan a haci y ta worde considera totalmente responsable pa nan accionnan. Nan a bisa di no por corda mucho di e sucedido, probablemente debi na nan uso di alcohol y droga.
E maltrato: E pareha inocente cu a yega Aruba abordo di e barco di Royal Caribbean International, esta ‘Voyager of the Seas’ cu a yega e isla pa 8:00 am y tabatin planea pa bandona e isla pa 11:00 pm.
Den oranan di atardi nan a planea di huur un auto, pa asina core un poco rond di Aruba y conoce di cerca. Nan a wordo avisa cu e auto di huur ta staciona den e parkinglot grandi den Werfstraat, pues esun cu tin patras di e edificio di Diamond International.
Aki ta unda cu e turista masculino a wordo maltrata na un forma masha violento mes door di dos persona, combina cu golpi di impacto grandi contra su cara, cu a lage cu varios trauma y bolombonchi na su curpa. Tur e maltrato aki den presencia di su casa y tres yiunan.
Recherche di Oranjestad a haci un bon trabao, pa logra track e auto cu e sospechosonan tabata aden. Nan a logra haya e auto na un cas na Pos Chikito, y a detene un muher aki. E muher a cuminza basha abao, y danki na esaki na comienzo di Januari 2023, a detene e rumannan Boekhoudt na nan cas na Jan Fleming. E caso aki cerca Ministerio Publico a haya e nomber ‘Caso Voyager’.
Recherche di Oranjestad a demostra cu como Cuerpo Policial, nan no ta tolera cu e unico pilar economico worde perhudica pa un par di persona cu ta comete fechorianan asina aki. Tur turista mester sinti nan mes safe ora e bin pasa su vacacion na Aruba.
Requisitorio di Fiscal: Fiscal di husticia a exigi contra e sospechoso T.B. un castigo di prison di siete aña. Ministerio Publico a exigi contra e sospechoso C-A.B. tambe un castigo incondicional di siete aña. E tempo cu nan a sinta den detencion preventivo lo worde kita di e total.
Fiscal a enfatiza den su requisitorio cu e caso horible aki a haci hopi daño na e victima y su famia. Pa hopi tempo nan lo sufri e consecuencianan traumatico di e dia ey. A haci daño tambe na Aruba y particularmente na e imagen di e pais como destinacion di vakantie safe.
Ningun hende aki na Aruba lo desea pa turistanan worde confronta cu un explosion di violencia manera e sospechosonan a causa. Turistanan mester sinti nan mes sigur y proteha tur caminda na Aruba y na cualkier momento durante dia of anochi.
Huez lo dicta sentencia riba 7 di juli 2023.
