Pa colmo e ta su mesun famia
ORANJESTAD (AAN): E acusado masculino di inicial C. di 63 aña, riba Dialuna mainta a para riba cu e no a mishi su famia, e mucha muhe T. Toch Fiscal ta haya cu tin prueba di sosten y ta haya C. culpabel. Abogado mr. Zaandam ta haya cu no tin prueba. Awor Hues ta bay studia e caso y otro luna lo tin sentencia.
Sospecho di a mishi cu e mucha: Fiscal a bisa cu C. ta wordo acusa cu den e periodo di 21 October 2022 te cu 5 September 2024, el a purba tene relacion cu mucha muhe T. menor di edad.
Fiscal a sigui bisa cu C. a bay cu e mucha na cierto lugar y a bis’e cu e kier tin relacion sexual y kita su paña. Fiscal ta acusa C. di a haci actonan inmoral cu e mucha T. door di mishi na su parti intimo. Den sala di Corte tabata presente famia di C.
Sospechoso ta nenga: E acusado C. a bisa Hues cu henter e periodo menciona, ningun momento e mucha T. tabata den auto cun’e. Hues a bolbe puntra C. si e mucha T. tabata den auto cun’e. C. a bisa Hues cu nunca e mucha tabata den auto cun’e. Hues a mustra C. cu e mucha T. a bisa cu e tabata den auto di C.
Segun C. entre fin di Mei 2024 y comienso di Juli 2024 el a hiba T. school riba peticion di e mayornan di T. Hues a remarca cu C. ta admiti cu e mucha T. tabata den auto cun’e.
- a splica Hues cu tin biaha T. tabata bay cu su amiga den bus. Segun C., na Juni 2024 durante 3 siman e tabata baha T. na school y sigui bay pa su trabao na San Nicolas. Hues a puntra cu por bisa cu 10 biaha T. a bay cu C. y C. a bisa cu si. Ta asina cu C. ta ruman di e mama di T.
Hues a puntra C., con por describi su relacion cu T. Segun C., T. tabata confi’e hopi cos cu tabata pasa na school. Tambe di relacion sexual cu T. tabatin na school. E combersacionnan aki tabata sosode ora cu C. tabata hiba T. school mainta. Segun C., e tabata duna T. consehonan positivo. El a bisa T. cu e no mester bay tin relacion cu tur amigonan pasobra asina e ta haya mal nomber.
Hiba mucha apartment di tene relacion: Na dado momento a surgi discusion entre nan caminda C. a bis’e cu e no por sigui buske asina pasobra T. su mayornan ta bay pensa cu C. lo ta haci cosnan cu T. C. a bisa Hues cu un dia T. a mand’e chat 10’or mainta pa bay buske. C. a bis’e cu e por mas laat banda di 2’or merdia. E dia ey C. a bay busca T. banda di 2’or pero T. a bay cu su tata y a bisa e tata cu C. lo tabata kier abusa di dje.
- a admiti di a hiba T. na un apartament di tene relacion. El a bisa Hues cu el a paga pa bay paden y a mustra T. e lugar. Segun C., el a haci esaki, pasobra el a conseha T. pa no tin relacion cu homber den lugarnan publico of den mondi sino den apartment asina. Segun C., el a bisa e tata di T. di esaki. C. a para riba cu nada no a sosode den e apartment y tampoco den su auto.
Mucha ta bisa cu Omo tabata mishi cun’e: Hues a bisa cu 5 September 2024 e tata di T. a bay haci denuncia contra C. na Polis. E tata a bisa Polis cu banda di un misa na Rooi Afo, C. lo a purba di tin relacion sexual cu su yiu. Esaki lo a sosode 3 biaha.
Hues a sigui bisa cu T. di 15 aña a wordo scucha pa Polis. E mucha a bisa cu ora C. tabata hib’e school, C. tabata mishi cun’e y tabata bis’e cosnan manera e kier tin relacion sexual cun’e. C. a bisa Hues cu ora T. tabata bay cun’e, T. tabata hopi sera, molestia. El a nenga di tabata mishi cu e mucha den auto.
Regala iPhone pa tin relacion: Hues a sigui bisa cu T. a declara na Polis cu C. a dun’e un Apple iPhone y cu T. lo mester ‘paga cu su curpa’. C. a bisa Hues cu esey no ta berdad. El a bisa cu el a regala T. e smartphone. Hues a sigui mustra cu e mucha T. a declara cu C., a hib’e na un lugar pa tin relacion cun’e. C. a bisa Hues cu nunca algo a sosode.
Hues a sigui bisa cu T. a bisa cu door di tur e cosnan aki, e tin hopi rabia den su cabez. Esey tabata strob’e na school. Na dado momento el a conta un maestra di school tur cos y cu su cabez tabata bruha.
Hues a mustra C. diferente potret di lugarnan caminda cu segun T. el a wordo hiba. C. a bisa Hues cu e no conoce e lugarnan aki.
Acusado ta admiti cu e tabatin gaña: Hues a mustra cu Polis tin chat entre C. y e mucha T., caminda C. lo ta bisa T. cu si e tin relacion cu hende homber jong, C. lo kier tin relacion cun’e pa e mira si hende homber grandi ta mihor compara cu mucha jong. Hues a mustra C. riba un chat cu un potret di un pareha den relacion caminda C. ta bisa e mucha T. ”Just Friends”.
- a bisa Hues cu e kiermen cu e lo kier tin un amiga asina pero no T. Hues a mustra riba un chat caminda C. lo a bisa T. cu e por tin un amigo pero cu T. lo mester tin tempo pa C. Hues a remarca cu esaki ta mustra otro cu C. ta laga mustra. Hues ta haya cu e chat ta mustra mas cu ta C. lo kier tin un relacion habri cu T. C. a para riba cu e lo kier tin un relacion habri cu un muhe pero no T. cu ta un famia di dje.
Hues a keda haci preguntanan na C. y na dado momento C. a admiti cu si T. tabata mayor di edad, e lo kier tin un relacion cun’e. El a bisa Hues cu e no kier a perhudica T. y pa T. tin su bida.
Hues a bisa cu for di cellular di C. a haya chat entre C. y e mucha T. caminda ta papia di tene relacion. Segun C., T. a pidi’e pero e dia ey nunca a yega. Segun C., T. tin problema y ta haci tur cos pa e haya su kier. Hues a papia riba circumstancia personal di C. y por a mira cu C. a cuminsa yora pasobra su señora ta sufri di Alzheimer y ta bayendo atras.
Fiscal ta exigi 30 luna di prizon: Fiscal a bisa Hues cu e ta haya e declaracionnan di e mucha T. no ta mucho cla y consistente. Pero por conclui cu e tabata wordo hiba pa su omo C. school y a haya iPhone for di C. y cu e mester a paga door di tin relacion sexual.
Fiscal a mustra cu nan tabata bay apartamento di tene relacion cu intension di tene relacion pero T. tabata nenga. Fiscal a sigui bisa cu e mucha T. a conta otro situacion caminda atrobe a bay na un apartamento di tene relacion, caminda C. lo a hinca dede na su parti intimo. E tempo ey e mucha tabatin 15 aña.
Fiscal ta haya cu tin prueba di sosten. Tin chatnan entre C. y T. caminda por compronde cu C. kier tin relacion sexual cu T. Fiscal ta haya C. culpabel di a haci actonan inmoral cu T.
Pa cu e castigo, Fiscal a bisa cu e ta tene cuenta cu e situacion di C. y tambe seriedad di e caso. El a exigi 30 luna di prizon di cual 10 luna ta condicional cu 3 aña di prueba.
Defensa abogado: Abogado mr. Zaandam ta haya cu no tin prueba legal cu C. lo a haci actonan inmoral cu T. El a bisa cu ta solamente declaracion di e menor di edad T. tin y no tin pruebanan di sosten. E abogado a bisa cu ta e mayornan di T. mes tabata pidi C. pa hiba T. school. E abogado ta haya cu no tin suficiente prueba.
Pa cu e castigo, e abogado a pidi Hues pa tene cuenta cu e señora di C. ta sufri Alzheimer avansa. El a sigui bisa cu C. tin un yiu na e cas cu a bolbe cay den adiccion. Door cu C. no ta pagando, ta core riesgo cu por perde e cas pasobra no tin hende pa paga gastonan di cas y mantene famia. E abogado a propone na Hues pa duna un castigo condicional, prohibicion di contacto di mayornan cu C. Tambe trabao pa comunidad.
Na final di tratamento di e caso, C. na yoramento a bisa Hues cu e no a haci nada. Hues a sera e caso y a bisa cu 19 October 2026 tin sentencia.
