ORANJESTAD (AAN): E Homber di inicial E.P. ta culpable di tabatin 15 kilo di marihuana scondi den freezer. Hues di Corte den Promer Instancia, via video conference a dicta sentencia.
Mientras cu e acusado E.P. ta den un oficina na KIA, Hues tabata den sala di Corte hunto cu abogado y Fiscal.
Hues a bisa cu e acusacion contra E.P. ta cu durante Juni 2020 y Januari 2021, e tabata den posecion di marihuana.
DROGA DEN FREEZER:
Hues ta haya legalmente proba cu E.P. tabatin un cantidad grandi di droga. El a mustra cu Polis a bay haci investigacion na e cas na Tanki Leendert, caminda E.P. a duna permiso pa haci investigacion den e cas.
Polis a haya un balansa y 29 paki di marihuana cu a pisa mas cu 15 kilo. Ta asina cu E.P. a bisa cu el a haya e droga for di un tal Dijkhof pa warda. Ta asina cu e persona aki a fayece.
Abogado di E.P. ta haya cu door cu E.P. a haci un fabor, e no ta castigabel. Na opinion di e abogado, E.P. a laga e droga warda den freezer y door di esey e droga no a afecta comunidad.
Hues a bisa cu e no ta di acuerdo cu e defensa di abogado. Hues ta haya cu E.P. a duna Dijkhof permiso di laga droga na su cas. Esey ta haci cu E.P. ta culpable.
CASTIGO:
Pa cu e castigo, Hues a bisa cu e ta tene cuenta cu droga ta prohibi pa tin. Tambe Hues a tene cuenta cu E.P. su edad y cu e ta sufri di curazon.
Hues a condena E.P. na 20 luna di prison, di cual 12 luna ta condicional cu 2 aña di prueba bao guia di Reclasering. Hues a duna orden pa destrui e droga confisca.
E potret aki ta uno di referencia.
