Aunke cu e ta nenga di a corta
ORANJESTAD (AAN): Hues di Corte di Husticia, riba Diahuebs mainta a haya e homber di Ecuador I.V.C. di 32 aña, culpabel cu riba 1 Mei 2024, a corta e ciudadano di inicial C. na forma grave na su man robez. E ciudadano C. a sufri un corta hopi serio caminda su nervio di man a keda corta. Fiscal a exigi 2 aña di prison pa I.V.C. pasobra Fiscal ta haya cu I.V.C. a causa herida severo. Hues no a sigui Fiscal den su exigencia. Hues ta haya cu no tin informacion si e ciudadano C. a keda afecta y pesey a baha e castigo pa un castigo combina.
Corta nervio di man: Den Corte, Hues a interoga I.V.C. riba e incidente aki. Segun I.V.C., el a actua den defensa propio. Segun I.V.C., el a pusha e ciudadano C., ora e persona ey a bay riba dje cu un boter di whisky. El a nenga di a corta C. cu un blade stanley. El a bisa cu el a pusha C. y e persona a cay. Hues a puntra si I.V.C. a mira e potretnan con e man di C. a keda.
Hues a bisa cu e ciudadano C. mester a wordo opera di biaha door cu a afecta su nervio di man. Hues a puntra con por ta cu un hende ta sufri herida severo door di cay. Segun I.V.C., C. tabatin un boter di whisky den su man durante e discusion. Durante e luchamento, C. a cay abao cu e boter den man y a corta su mes. Hues a bisa cu Polis a haya un boter di whisky pero e tabata henter. Segun I.V.C. tabatin mas boter di hendenan cu a bebe. Hues a remarca cu si e ciudadano C. a herida su mes na un boter, lo mester a haya un boter na sanger.
Testigo ta bisa cu a uza blade stanley: Hues a bisa cu a Polis a interoga un dama P., kende a bisa cu I.V.C. lo tabatin un blade stanley (conoci como ‘box cutter’) cun’e. El a bisa cu el a puntra I.V.C. pakico el a hinca e ciudadano C. El a bisa cu I.V.C. a bis’e cu pasobra C. a insult’e. Segun e dama P., I.V.C. a bis’e cu ta duel’e loke el a haci.
I.V.C. a para riba cu no ta berdad. Segun I.V.C., ora el a mira C. cay y corta su man, el a bay yuda C. lanta. El a bisa cu e ciudadano C. tabata bao influencia di alcohol. Hues a bisa cu e incidente a tuma lugar den oranan tempran di mainta y hendenan tabata bebi. Segun I.V.C., el a dal drinks pero no tabata bao influencia.
Hues a bisa cu un dama di inicial P. a declara cu I.V.C. lo a bisa cu el a tira e blade stanley den laman. Hues a haci I.V.C. varios pregunta pa saca afor si e tabata bao influencia y I.V.C. a mustra cu e no tabata burachi.
Fiscal a exigi 2 aña di prison: Fiscal a bisa Hues cu I.V.C. ta wordo acusa di maltrato severo y maltrato di e homber C. cu algo skerpi. Fiscal ta haya cu I.V.C. ta culpabel di maltrato severo. El a bisa Hues cu tin declaracion di e victima C. y e dama P.
E dama P. a bisa cu C. a bay cerca dje y bis’e cu I.V.C. a hink’e cu un cuchiu na su man. El a mira e man di C. tabata sangra. Despues e dama P. a bay papia cu I.V.C. y a puntr’e pakico el a hinca C. El a bisa cu C. a insult’e y e ora ey el a hink’e. P. a bisa cu I.V.C. a bis’e cu el a tira e blade stanley den laman. Fiscal a sigui bisa cu tambe tin raport medico cu ta mustra cu C. mester a wordo opera door di e herida severo na su man robez. No ta sigur si e lo recupera completo na su man robez.
Fiscal ta haya cu riba 1 Mei 2024, I.V.C. a causa herida severo na C. Fiscal a bisa cu I.V.C. a keda 21 dia sera pa e caso aki y despues laga liber. Fiscal ta kere cu I.V.C. ta nenga pa no tin problema cu su permiso di estadia. Pa cu e castigo, Fiscal a bisa cu e ta tene cuenta cu ta promer biaha cu I.V.C. a cay den man di husticia. Fiscal a exigi 2 aña di prison pa I.V.C.
Abogado: Den e caso, abogado mr. Odor a bisa Hues cu e ta haya cu no tin prueba convicente cu I.V.C. a causa maltrato severo. E ta haya cu I.V.C. a actua den defensa propio. E abogado a nenga cu I.V.C. tabatin un cuchiu. El a sigui bisa cu no ta asina cu I.V.C. tabata bao influencia. Na opinion di abogado, I.V.C. a bebe pero e tabata bon.
E abogado a bisa cu e dama P. ta amiga di e victima C. y no por bay uza su declaracion como prueba. El a bisa cu e dama P. mes a declara cu e no a mira kico a pasa. E abogado a mustra cu I.V.C. a bisa cu C. tabata hopi bou influencia y a bay pa dal I.V.C. E momento ey I.V.C. a hala un banda y pusha C., kende a cay cu un boter di whisky y herida su mes na su man. E abogado ta persisti cu I.V.C. a actua den defensa propio y mester declar’e liber.
Sentencia: Hues a cera tratamento di e caso y a dicta sentencia. Hues ta haya cu tin suficiente prueba cu I.V.C. a corta C. Hues a bisa cu e no ta kere cu door di cay C., a sufri e herida aki. Ademas tin declaracion di e dama P. kende a bisa cu I.V.C. a bis’e cu e tabatin un cuchiu. Hues a bisa cu C. tambe a bisa cu I.V.C. tabatin un cuchiu den man. Na opinion di Hues, tur esaki ta suficiente prueba cu I.V.C. ta culpabel. Hues a conclui cu no tin claridad cu e herida ta afecta C. pa semper y pesey ta considera C. culpabel di maltrato cu arma. Pa loke ta e ponencia di a actua den defensa propio, Hues a rechaza esaki. Hues a bisa cu I.V.C. a bisa cu C. a bay riba dje y insult’e y esey tabata motibo cu el a ataca C. Pa cu e castigo, Hues ta haya e castigo exigi pa Fiscal mucho pisa. Hues ta haya cu no ta necesario cu I.V.C. mester bolbe bay sera.
Hues a condena I.V.C. na 180 dia di prison di cual 159 dia ta condicional cu un tempo di prueba di 2 aña. Ademas Hues a condena I.V.C. na 120 ora di trabao pa comunidad of 60 dia sera si e no cumpli cu esaki.
