ORANJESTAD (AAN): E homber K.R., ex agente di Polis, a presenta den Corte pa e caso penal cu Ministerio Publico a cuminsa contra dje pa difamacion di un funcionario di Polis.
E caso ta relaciona cu declaracion cu K.R. a duna den un programa radial di seָñor Hoek, riba e caso penal cu tabatin contra K.R. pa radio di Polis, cu tabata den poder di un periodista. Ta asina cu K.R. a wordo haya culpable y a wordo condena. Esey a trece cun’e cu K.R. a worde kita for di Cuerpo Policial.
E acusacion cu Fiscal a presenta ayera den contra contra K.R. ta cu dia 15 October 2021 el a mancha bon nomber di ex inspector di Polis W., riba 15 October 2022. Ta asina cu W. a presenta un demanda di daño den Corte.
DIFAMACION DI FUNCIONARIO DI POLIS
K.R. a bisa Hues cu e tabata wordo acerca pa prensa pa papia di e caso. El a wordo acerca pa señor Hoek pa duna comentario riba su caso. Hues a bisa cu K.R. cu e lo a expresa cu W. a gaña na Landsrecherche kende lo tabatin e radio di Polis. Hues a mustra cu den caso penal di K.R. via GPS a haya sa cu e radio di Polis ta di K.R. ta na cas di Espinoza. Espinoza a bisa cu ta Nelson Andrade a dun’e e radio y despues a bisa Espinoza pa hib’e bek pa K.R. Hues a mustra cu den Corte Superior, K.R. a bisa cu tempo cu e GPS tabata mustra cas di Espinoza, e radio tabata serca su hefe W. E tempo ey e no tabatin e radio ainda.
Segun K.R., tin dos agente di Polis cu sa cu tabatin confusion riba radio, o sea e radio cu ta bisa ta di dje, e no tabatin. Hues a bisa cu Hof a evalua investigacion cu a haci y a mustra cu no ta asina. Hof a bisa cu no ta kere K.R. E bruhamento den radio di Polis no ta cuadra. Hof a hasta duna K.R. mas castigo. Door di expresion di K.R., W. a haci denuncia contra K.R. pa a bisa cu W. lo a gaña na Hues. Hues a mustra cu W. mes a declara na Hof cu e confusion tabata promer cu e tempo di radio y a keda regla. K.R. a bisa Hues cu den Hof, W. a bisa cu K.R. a keda cu su radio. K.R. a conclui cu e ora ey no tabatin confusion.
El a bisa cu Procurador General mes a remarca cu si ta asina manera W. ta bisa, e ora ey no tabatin confusion. Hues a bisa cu investigacion di Polis ta mustra cu entre April 2016 te cu Januari 2018 e radio tabata na cas di Espinoza cu a hay’e for di Nelson Andrade.
Hues bisa cu K.R. a bisa cu W. a gaña na Landsrecherche. El a bisa cu W. a gaña cu un agente D. a bisa cu K.R. a huur su radio cu prensa na razon di 1000 florin pa luna. Tambe Hues a mustra cu den e programa di señor Hoek, K.R. lo a bisa cu W. a bay cu VUT pa evita cu e lo wordo investiga pa Landsrecherche y castiga. K.R. a bisa Hues cu el a bisa cu e ta pensa cu W. mester a wordo investiga pero el a bay cu VUT.
Hues a remarca cu si W. bay cu VUT esey no kiermen cu e por wordo investiga. K.R. a expresa na Hues cu el a pasa den asina hopi cos durante e caso aki siendo cu e ta para riba cu e ta inocente. El a bisa cu e no sa di unda ta saca cu el a cobra 1000 florin pa luna pa laga su radio na periodista.
DIFAMACION TA CASTIGABEL
Hues a bisa cu segun ley penal, no por bay tacha bon nomber di un persona. K.R. a bisa Hues cu segun su pensamento, si W. a bay duna declaracion cu no ta cuadra na Landsrecherche, esey a conduci cu el a perde su trabao.
Hues a bisa cu segun W., despues cu e declaracionnan di K.R. haci na radio, hopi hende a yam’e pa puntra kico ta pasando. E ta sinti cu a tacha su bon nomber como ex inspector di Polis.
Fiscal a bisa K.R. cu tin un diferencia ora ta bisa cu loke W. a bisa no ta cuadra y cu W. ta un gañador. K.R. a bisa cu na su opinion si un hende no ta bisa e berdad, e ta un gañador.
DEMANDA
- a demanda cu K.R. macha su bon nomber di 42 aña di servicio na Polis. Hopi hende a yam’e y cada vez e mester splica cu loke K.R. a bisa no ta asina. W. a bisa den su demanda cu esey a dun’e hopi stress. El a bisa tambe cu semper el a trata K.R. cu respet y no a spera esey di K.R. E ta haya e actitud aki hopi falso. El a demanda 2500 florin di daño.
FISCAL
Fiscal a bisa cu apenas K.R. a wordo condena pa Hof, cu el a bay expresa su mes den prensa caminda el a daña e bon nomber di W. Na opinion di Fiscal, no ta importa si K.R. ta duna su opinion di e caso pero el a bay bisa cu W. ta gaña. Fiscal a bisa cu daña un hende su bon nomber ta castigabel. E ta haya cu si K.R. a expresa su opinion cu e no ta di acuerdo cu e sentencia, esey ta su derecho. Pero no por bay tacha bon nomber di W.
Pa cu e castigo, Fiscal a tene cuenta cu demanda di W. Fiscal ta haya cu no por pone un suma pa difamacion. E ta haya cu no por aproba esaki. El a pidi pa declara e demanda di W. no admisibel pa asina W. lo por haci un caso civil.
Fiscal ta haya un multa pa difamacion na su lugar. E ta kere cu mester duna un parti condicional pa evita cu K.R. ta bay haci expresion den prensa contra un persona. Fiscal a exigi 2500 florin di multa di cual 2000 florin ta condicional cu un tempo di prueba di 3 aña. Tambe Fiscal a aproba1000 florin di daño pa W. y cu medida di pago. Si K.R. no paga, e lo mester bay 20 dia sera.
ABOGADO NO TA HAYA CU TIN DIFAMACION
Mr. Illes a bisa Hues cu e ta un parti di acuerdo cu Fiscal cu e caso no ta bay riba e caso di radio di Polis sino loke K.R. a expresa. El a mustra cu tin declaracionnan haci y no sa kende a papia e berdad. K.R. ta basa su mes riba declaracionnan di agentenan di Polis. E hecho cu no por bisa kico ta e berdad, mester conclui cu tin duda. E ta haya cu K.R. a bisa cosnan cu e ta haya y no por bisa cu esey ta tacha bon nomber di hende. Na opinion di mr. Illes, den e caso aki, Ministerio Publico mes a haci publicidad tocante e radionan di Polis cu a disparce y haci den man di cierto periodistanan. Segun e abogado, tin hopi declaracionnan haci riba e caso aki y e ta haya cu no por bay bisa cu a tacha nomber di hende. El a bisa cu aki K.R. a haci uso di su derecho di expresa su opinion a base di EVRM (Derechonan Humano).
E abogado ta di opinion cu den un democracia mester tin espacio pa expresionnan y no cu ta considera esaki como tacha bon nomber. E ta haya cu loke K.R. a expresa no ta castigabel. El a bisa tambe cu ta K.R. a wordo invita pa haci declaracion durante un programa y no cu ta el a bay acerca señor Hoek. E abogado a mustra riba radionan cu a perde y cu nunca a haci investigacion ariba esakinan. El a mustra cu un di e radionan aki ta di ruman di W. cu tambe ta un Polis. El a remarca, pakico no a haci investigacion riba esaki. El a cuestiona e hecho cu no tin un descripcion di loke K.R. a expresa durante e programa. Tin raport di loke Polis a interpreta for di interogacion di K.R. E ta haya cu K.R. a expresa su opinion y cual declaracion e ta haya cu ta gañamento.
E abogado ta haya cu lo tabata mas mihor pa a pidi rectificacion y no un caso penal. No tabata intension di K.R. di pinta un hende malo. E ta haya cu Fiscal no mester a cuminsa un caso penal. E ta haya cu mester declara K.R. liber.
Hues a bisa cu e lo bay evalua e caso y 2 Juni 2022 pa 8.15 lo tin sentencia.
