ORANJESTAD (AAN): Awe mainta e sospechoso Anderson Rasmijn (36) lo mester presenta den sala di Corte di Husticia pa awor trata e caso penal cu Ministerio Publico
a cuminsa contra dje. Anderson Rasmijn ta wordo acusa di a tira mata John Anthony Castro riba 22 December 2010. Despues di mas cu 10 aña, awor ta asina leu cu tin un sospechoso.
Varios biaha tabatin casonan pro forma caminda abogado mr. Carlo a pidi pa laga psychiater check Rasmijn pa cu su estado mental.
SOSPECHOSO TIN PROBLEMA MENTAL
A sali na cla cu Anderson Rasmijn ta un persona cu a haya tratamento for di psychiater na Respaldo. Esey tabata e motibo cu na Respaldo, ningun di e psychiaternan no kier traha un raport pasobra nan a yega di atende Rasmijn. Esaki tabata e punto cu Hues tabata kier claridad pa mira si lo mester busca psychiater di afor. Finalmente e director di Respaldo, van Galen, a laga sa cu e mes lo traha un raport.
SCUCHA AUDIO CU POLIS TIN
Ta asina cu abogado mr. Carlo, anterior a haci peticionnan y Fiscal a nenga. Mr. Carlo a bisa Hues cu e ta persisti pa haya audio cu Recherche tin pa asina e por analisa esaki cu su cliente. E abogado a sigui bisa cu si acaso Fiscal ta nenga, e ta pidi Hues pa bisa Fiscal pa regla un forma caminda sin presencia di Recherche, e abogado cu su cliente Rasmijn por scucha esakinan.
Fiscal a bisa Hues cu no por facilita audio. Esey ta un maneho fiho cu Ministerio Publico ta hiba den casonan penal. Pero Fiscal ta di acuerdo pa abogado hunto cu su cliente lo por scucha e audio. El a bisa cu e lo bay papia cu Recherche pa regla esaki y lo laga mr. Carlo sa na unda esaki lo bay sosode.
POTRET DI ZAPATO
Abogado mr. Carlo tambe a bisa cu for di e documentonan di e caso por compronde cu lo tin potret pero no e no a haya nada di potret. El a pidi Hues pa instrui Fiscal pa facilita potret.
Fiscal a bisa Hues cu si abogado kier lo por saca potret di e zapato y facilita esaki. Abogado a bisa cu lo ta bon idea pa tin potret di zapato. Hues tambe ta haya esaki un bon idea.
Awe a dedica henter mainta pa tratamento di e caso caminda lo bay haya sa kico realmente a pasa dia 22 December 2010. Tambe lo haya sa si Rasmijn, a base di e raport di psychiater, ta responsabel pa su acto of no y kico Fiscal ta bay exigi pa Rasmijn. DIARIO lo informa lectornan di tur loke ta sosode den sala di Corte di Husticia.
