Diabierna Fiscal lo bay bisa ki castigo e ta exigi pa nan
ORANJESTAD (AAN): mainta Hues di Corte di Husticia a sigui cu tratamento di e caso penal cu Ministerio Publico a cuminsa contra Wilfred Besaril (51) y Glen Ling (62). A cuminsa 8.30 di mainta y a caba 3.30 di atardi. E palabracion ta cu Diabierna awor 23 Mei 2025, Fiscal lo presenta su rekisitorio caminda e lo bay exigi castigo pa e dos sospechosonan y tambe lo tin e caso di kita propiedad contra Besaril di 197.145 florin.
E acusacionnan cu Fiscal a presenta ayera un biaha mas ta cu entre 16 April 2018 te 15 Maart 2022 na Aruba y Hulanda como Minister Plenipotenciario, intencional Besaril a malversa mas di 15 Mil florin di pago di recibo di Setar. Ta acusa Besaril cu entre 20 November 2017 te 15 Maart 2022 na Aruba y Hulanda, intencional a malversa mas di 50 Mil florin pa paga huur di cas.
E ta wordo acusa cu entre November 2017 te 30 Juni 2022 na Aruba y Hulanda, intencional a malversa mas cu 20 mil florin pa paga servicio cu e tabatin. E ta wordo acusa cu entre 16 December 2020 te 3 di Februari 2021 na Aruba y Hulanda, intencional a malversa casi 4 mil florin pa paga ticket y otro gastonan. Tambe e ta wordo acusa cu entre 20 November 2017 te 30 di Juni 2022 na Aruba y Hulanda intencional, a malversa 25 mil florin pa paga restaurantnan, horeca, gas stations. E tabata cobra facturanan via Aruba Huis.
Fiscal ta acusa Ling di ta complice door di a firma e facturanan y a abusa di su funcion como director di Aruba Huis.
GASTAMENTO DI PLACA SIN APROBACION
Hues a mustra cu a base di denuncia di Paris, Central Accountant Dienst (CAD) a cuminsa investigacion y a constata iregularidadnan. E momento ey, Minister Presidente señora Wever Croes a haci denuncia caminda Landsrecherche a cuminsa cu investigacion cu a conduci na detencion di Besaril y Ling.
FOR DI 2010 A SEÑALA GASTAMENTO DI PLACA
Hues a mustra cu CAD na 2010 a traha un raport caminda ta señala gastamento di placa na Aruba Huis sin cu tin aprobacion pa esakinan.
Esaki ta promer cu Besaril y Ling a cuminsa traha na Aruba Huis. Durante interogacion di Hues den Corte por a ripara cu Besaril no a lesa contenido di e raport mientras cu Ling a bisa cu e tabata na altura di e raport y a puntra su mes, pakico durante 8 aña no a haci nada pa drecha e situacion.
SOSPECHOSONAN TA CULPA OTRO
Hues a haci un cantidad di pregunta na tanto Besaril como Ling riba e forma con tabata gasta placanan di Aruba Huis. Hues a mustra cu 24 September 2019, Ling a manda un memo pa personal di Aruba Huis mustrando cu ta haci gastonan sin cu a pidi permiso na Gobierno. El a hala atencion di tur personal cu promer cu haci gastonan mester haya aprobacion di Gobierno. El a mustra cu den pasado a sosode cu gastonan tabata wordo aproba despues pero awor no ta tolera esaki. Ling a bisa Hues cu tin biaha su trabao ta wordo mina door di Besaril como minister. E tabata director y ora e tuma cierto decision, tin personal ta bay na Besaril y e ta cambie.
Besaril a bisa Hues cu ora Ling a haci kehonan cerca dje di personal cu no a sigui maneho, conhuntamente a traha e memo. Hues a remarca cu Ling a bisa cu e kehonan tabata riba maneho di Besaril. Segun Besaril, e kehonan tabata riba cosnan cu personal mester haci. Hues a puntra si e memo ta dirigi na Besaril mes. Segun Besaril, el a pidi Ling manda e memo pa e tambe pero cu e memo ta dirigi na e personal.
GASTONAN DI TELEFOON PRIVA
Hues a mustra cu Aruba Huis a paga gastonan priva di telefoon di Besaril. Ta trata di 15 mil florin. Besaril a bisa cu el a pidi Setar un linea di telefoon priva na cas di su tata. Segun Besaril esey ta pa ora e bin Aruba, e tin linea. Hues a remarca pakico a haci esaki riba cuenta priva pa añanan largo, siendo cu ora Besaril yega Aruba e por paga un suma chikito pa haya telefoon. Segun Besaril, esey ta loke Setar a ofrece y a tum’e pa tanten cu e construccion di su cas keda cla y e ora ey e telefoon ta bay na su cas. Hues a mustra cu Ling a bisa Setar pa manda cobranza na Aruba Huis.
Hues a puntra Ling, pakico el a aproba e gastonan di telefoon di Besaril. Ling a bisa cu el a papia cu Besaril cu e telefoon ta priva y Besaril a bis’e cu el a papia cu Minister Presidente. Hues a puntra si Ling a haya aprobacion di Besaril di Minister Presidente. Ling a bisa cu e no a haya nada y cada vez Besaril tabata bis’e e mesun cos y cu tin cu warda. Na dado momento Ling a dicidi di atende e asunto su mes. Hues a remarca cu Ling ta e director y mester a actua. Segun Ling, Besaril ta e minister y e mester sigui manera Besaril kier.
HUURMENTO DI CAS NA HULANDA
Hues a mustra tambe e placanan cu Aruba Huis a paga pa e cas cu Besaril a dicidi di bay keda na dje. Ta asina cu na Den Haag, Gobierno di Aruba tin un cas caminda Minister Plenipotenciario sa keda. Besaril no kier a keda na e cas pasobra e ta net dilanti di un centro di adicto.
Segun Besaril, el a pidi Minister Presidente kende a bay di acuerdo pa Besaril busca un otro cas pa biba cu su famia riba cuenta di Aruba Huis. Besaril ta considera e cas como esun di Aruba Huis. Hues a puntra Ling, con e ta mir’e. El a bisa cu e ta mir’e como un cas di minister. Hues a remarca cu casi 22 mil Euro a gasta na drechamento di e cas completo. Con esey por ta. Hues a bisa cu Ling tabata firma facturanan di e proyecto. Segun Ling, el a firma pasobra cu Besaril a firma pa haci e construccion. Hues a remarca cu Ling tabata firma facturanan cu ta demostra cu el a controla pero en realidad e no tabata hacie. Ling a bisa cu e tabata canza cu Besaril tabata haci cosnan sin cu Ling tabata aproba esakinan. Segun Ling, e tabata director por nada pasobra Besaril tabata haci y deshaci y e como empleado no por hala atencion di Minister Presidente.
MUEBEL PA CAS
Hues a bisa cu Besaril a gasta 6 mil Euro pa muebles pa baby. Segun Besaril, el a cumpra esakinan y no a cobra Gobierno. El a bisa cu e muebles di camber cu a sali 6 mil Euro, Gobierno a paga via Aruba Huis. Besaril a señala cu tin otro Minister Plenipotenciario cu no a biba den e cas cu Gobierno a destina sino a busca otro cas cu a sali un dineral. Ta asina cu Ling a firma e facturanan. Segun Ling, el a firma cu un fecha abao di su firma skirbi, pa demostra cu e muebles a wordo paga y despues e ta haya e factura pa firma. Segun Ling, esey ta pa mustra cu e no a aproba. Ling a bisa Hues cu e tabata papia cu Besaril cu esaki no por sigui pero Besaril no tabata tende.
Hues a bisa cu e instalacion di alarma a sali 10 mil Euro. Besaril ta culpa Ling cu lo mester a busca tres oferta pa mira cual ta mas mihor. El a bisa cu el a confia den e aparato di finanzas y esun di control cu tur cos ta bon y pesey a laga instala e alarma.
UZA CREDIT CARD DI GOBIERNO DI ARUBA
Hues a mustra cu entre 16 December 2020 te 3 di Februari 2021, Besaril a bin Aruba di vacacion cu su señora. Ora di bay bek Hulanda, el a paga upgrade di e pasashi pa e y su señora. Besaril a bisa Hues cu como minister plenipotenciario, e por haci’e y a paga esun di su señora. Hues a remarca cu Besaril a huur auto, keda den hotel, paga gasoline, cumpra regalonan. Tur esaki riba cuenta di Gobierno. Segun Besaril, tur minister ta viaha VIP y e no ta compronde pakico e ta wordo acusa di a haci malo.
El a remarca pakico esnan na Aruba Huis no a regla tur cos p’e. Pakico e mester bay check tur cos. Fiscal a remarca cu personal na Aruba Huis ta mustra cu Besaril tabata haci kico e kier y no tabata kier tende cu tin procedura. Tin personal a bisa cu nan no por cu caracter di Besaril. Besaril a remarca cu pakico e y Ling ta wordo persigui siendo cu tin otronan envolvi cu no a wordo persigui.
Tanto Fiscal como Hues tabata haci Besaril hopi pregunta riba e forma con e tabata uza e credit card di Gobierno di Aruba y di con e no tabata specifica e declaracionnan cu e ta duna pa haya su placa bek.
KITA PROPIEDAD
Fiscal a exigi pa Besaril paga 197145 florin, cu ta placanan cu el a usa como minister plenipotenciario. Hues a mustra cu tin sumanan cu Besaril a paga bek. Hues a bisa abogado mr. Canwood pa specifica cual ta e sumanan cu a paga bek ora di tratamento di e parti aki.
Hues tambe a mustra cu ta sospecha Besaril lo a deposita 12 mil florin riba su cuenta di placa di Aruba Huis. Ta asina cu Besaril a desmenti. Besaril a bisa cu durante construccion di cas, su señora a para aseguro di bida na Hulanda y e placa a wordo deposita. El a bisa tambe cu su señora a dun’e placanan cash y el a deposita esaki den banco.
Diabierna awor, Fiscal lo bay presenta su rekisitorio y despues e abogadonan mr. Canwood di Besaril y mr. Illes di Ling lo hiba nan defensa.
