Fiscal a exigi 6 aña di prison y tratamento mental obligatorio
ORANJESTAD (AA): Diahuebs mainta, Hues ta dicta sentencia pa e homber A.R. (29), acusa di intento di mata e homber v.d.B. riba 12 Augustus 2025. Fiscal ta haya A.R. culpabel di intento di asesinato.
HINCA HOMBER 8 BIAHA CU CUCHIO
Tratamento di e caso a tuma lugar 28 April 2026, caminda e acusado A.R. a admiti di a hinca v.d.B. Hues a puntra pakico A.R. a haci’e. Segun A.R., v.d.B. tabata keda pasa 3 dia dilanti su cas y menaza A.R. cu lo bay tir’e mata. Hues a bisa cu segun relato di Polis, A.R. tabata den un truck di Septic hunto cu su ruman homber y a baha di e truck y hinca v.d.B. cu tabata para na un auto ta papia cu un dama cu tabata den e auto. Segun A.R. e dia ey v.d.B. a zwaai man p’e. Hues a bisa cu e ruman di A.R. a bisa cu A.R. a bis’e pa para e truck y si e no para e lo bula afor.
Segun A.R., e kier a papia cu v.d.B. pa resolve e problema pero v.d.B. a bis’e cu awe bo dia a yega. E momento ey v.d.B. tabata para papia cu e ex amiga di A.R. cu tabata den un auto. Hues a bisa cu tin video di seguridad cu ta mustra kico a sosode. Hues a bisa cu por a mira cu v.d.B. tabata para papia y diripiente ta mira A.R. ta cana liher yega y tabata agresivo. E momento ey v.d.B. a hala atras. Segun A.R., e momento ey cu v.d.B. a hala atras, el a mira v.d.B. a bay cu su man patras manera e ta coy un arma. Hues a bisa cu e no a mira v.d.B., kende tabata lomba sunu, cu un arma. A.R. a bisa Hues, cu el a mira e movecion di v.d.B. y el a saca un cuchiu y a ataca v.d.B.
Hues a bisa cu riba e video por a mira cu A.R. a hinca v.d.B. diferente caminda na su curpa. Hues a remarca cu esaki no ta mustra cu A.R. a bay pa papia e asunto. Hues a puntra A.R., pakico v.d.B. tabata menace. Segun A.R., por ta v.d.B. ta jaloers pasobra e amiga di v.d.B. a bay laga v.d.B. pa tin relacion cu A.R. y despues e amiga a bay bek cu v.d.B. Hues a remarca cu e dama tabata cu v.d.B. y por bien ta cu ta A.R. tabata jaloers. A.R. a admiti cu e tabata un poco jaloers. El a bisa Hues cu ora el a yega, v.d.B. a bis’e cu “awor bo ora a yega”. Esey tabata momento cu A.R. a hinc’e.
PLANEA E HINCAMENTO
Hues a bisa cu ta parce cu A.R. a palabra cu e dama pa e ta cu v.d.B. A.R. a para riba cu no tabatin nada planea. Hues a bisa cu si e tabata planea e ora ey ta un caso serio. Hues a puntra A.R., pakico e tabatin un cuchiu. A.R. a bisa cu e tabata cu e cuchiu pa defende su mes contra v.d.B. Ora el a mira v.d.B. haci movecion, el a saca e cuchio y hinc’e.
APENAS SALI LIBER Y BOLBE HINCA
Hues a bisa cu A.R. tabatin castigo di 10 aña di prison pa intento di mata. E tabata mas cu 6 aña sera y a haya libertad condicional. E tabata mas o menos 2 siman pafor di KIA y ta bolbe hinca hende cu cuchiu. Hues ta haya esaki hopi serio. El a puntra A.R. si el a pensa kico e tabata haci. Segun A.R. e no a pensa. A.R. a bisa Hues cu e ta lamenta loke el a haci.
Segun A.R. for tempo cu e tabata sera e tin problema cu v.d.B. door di e ex amiga.
PROBLEMA MENTAL SERIO
Hues a bisa cu door di e situacion, a pidi psychiater y psicologo pa evalua A.R. Nan raport ta bisa cu A.R. tin problema mental y ta sufri di paranoid. Segun e raport di e dos expertonan, A.R. ta sinti su mes hopi biaha amenaza y no tin e capacidad di pensa kico e ta haci. Door di esey nan ta conclui cu A.R. ta menos responsabel pa su actonan. Tambe e expertonan a mustra cu A.R. ta usa droga. E expertonan ta mustra cu e chens di ripiti algo asina ta hopi grandi. Nan ta conseha pa A.R. haya tratamento no sera den un instituto. Na Aruba no tin posibilidad pa haya tratamento den un instituto. Pa bay Hulanda e ta bira dificil door di cu A.R. no ta compronde Hulandes. E expertonan ta haya cu e tratamento den forma liber lo mester bay den cooperacion cu Reclasering y Respaldo caminda A.R. ta wordo obliga pa haya tratamento.
Hues a puntra A.R. si e ta usando droga ainda. A.R. a bisa cu ora el a sali for di KIA e tabata usa marihuana so. Hues a puntr’e si e no ta haya marihuana un problema. A.R. a bisa cu e no ta haya marihuana un problema.
FISCAL
Fiscal a bisa Hues cu 14 dia despues cu A.R. a sali for di KIA, el a bolbe hinca hende. El a haya libertad condicional pa un condena di 10 aña di prison pa intento di mata.
Fiscal a bisa cu dia 12 Augustus 2025, A.R. a bay riba v.d.B. kende tabata papia cu e ex amiga di A.R. El a bisa v.d.B., “mi a bisa bo cu mi ta bin pa bo” y a hinca v.d.B. 8 biaha entre otro na cabez y schouder. Despues di a hinca v.d.B., el a bay bek den e truck. Fiscal a sigui bisa cu segun A.R., v.d.B. tabata pasa dilanti cas y zwaai man y e tabata considera esaki como menaza.
INTENTO DI ASESINATO
Fiscal a mustra cu riba camera di serguridad por a mira con A.R. a bay riba v.d.B. y tras di e auto nan a bringa y cay abao. Despues nan a lanta. Segun Fiscal, no por a mira si v.d.B. lo a haci movecion di saca un arma manera A.R. ta bisa. Fiscal ta haya cu A.R. no por papia di lo a actua den defensa propio. Fiscal ta haya cu A.R. a cana bay agresivo riba v.d.B. y ta considera esaki un un intento di mata. El a mustra cu ocho biaha A.R. a hinca v.d.B. cu e cuchiu. Raport medico ta mustra cu a perfora un pulmon cu a klap. Fiscal ta haya cu A.R. a actua premedita. El a mustra cu A.R. tabata manda mensahe na v.d.B. y tambe na su ex amiga cu v.d.B. lo no scapa. Fiscal ta considera esaki un intento di asesinato. Fiscal a remarca cu e castigo di 10 aña di prison no a trece cambio den A.R. pa stop di haci algo asina. E raport di psychiater y psicologo ta mustra cu e risico ta grandi cu A.R. lo haci algo asina atrobe. Fiscal a mustra cu segun e raport di Reclasering, A.R. cu su 10 aña e tabata usa marihuana. Despues tabata usa cocaina tambe y bebe alcohol. Psychiater y psicologo ta haya cu A.R. mester di tratamento pasobra e ta menos responsabel pa su actonan. E pregunta ta si por duna castigo maximo y haya tratamento obligatorio. Fiscal a bisa cu teniendo cuenta cu e interes di tratamento, el a exigi 6 aña di prison y cu e condicion cu A.R. mester haya tratamento obligatorio (TBS).
DIARIO lo informa lectornan kico Hues su decision ta.
