Fiscal a exigi 8 aña di prison pa cada un
ORANJESTAD (AAN): Awe Diabierna mainta, Hues di Corte di Husticia ta dicta sentencia den e caso penal contra dos Venezolano G.M.G. di 47 aña y A.C.I. di 33 aña, kendenan riba 8 Juni 2024 a worde gara cu mas di 700 kilo di droga y 3 revolver cu bala.
Wardacosta a intercepta e droga: Tratamento di e caso tabata luna pasa Februari 2025, caminda Hues a bisa cu Wardacosta di Caribe Hulandes a haya informacion cu tin un boto sospechoso tabata bin Aruba 8 Juni 2024. Wardacosta a mira riba radar cu e boto tabata bayendo direccion Eagle Beach. Di biaha a manda patruya pa Eagle Beach. Mainta tempran e patruya ta mira cu tin un pick up Mitsubishi cu un trailer cu un boto y 4 persona riba e boto.
Wardacosta a bay riba e pick up y dos di esnan den e boto a bula abao y core bay. E miembronan di Wardacosta a logra detene e hombernan G.M.G. y A.C.I. E pick up y e trailer cu boto a keda confisca y hiba Wardacosta.
Investigacion a mustra cu tabatin bultonan di droga. En total a haya 379 kilo di marihuana y 335 kilo di cocaina. Tambe e miembronan di Wardacosta a haya scondi den un compartimento di e boto, 3 revolver cu municion, cualnan tabata lora den plastic.
Recidivista di droga: Hues a mustra cu G.M.G. no ta un desconoci di Polis. G.M.G. na 2023 a worde condena na 3 aña di prison pa droga y ora el a worde laga liber, el a worde saca for di Aruba. Hues a bisa cu na 2004 tambe G.M.G. a worde condena pa droga.
Segun G.M.G., e tabata abordo di e boto hunto cu 8 ilegal y no tabata sa nada di droga. Hues a remarca cu cada bez, G.M.G. ta cay pa importacion di droga. A.C.I. a pidi disculpa pa loke el a haci.
El a bisa cu el a hacie pa haya placa door di su situacion financiero malo. G.M.G. a bisa cu door di situacion financiero malo, el a bin Aruba pa traha pa manda placa pa famia na Venezuela.
Fiscal a exigi 8 aña di prison: Den su rekisitorio, Fiscal ta haya A.C.I. y G.M.G. culpabel y a exigi 8 aña di prison pa cada un. Fiscal a exigi tambe pa e boto, pick up, motornan y trailer mester keda confisca.
Awe Hues lo bisa kico e ta pensa di e caso y dicidi ki castigo e duo Venezolano mester haya.
Riba e potret por mira personal di Wardacosta hunto cu e boto confisca.
