Mayan tin sentencia si ta haya registro di votadornan of no - ORANJESTAD (AAN): Dialuna mainta, partido AVP, representa pa abogado mr. J.Sjiem Fat, a cuminsa un caso sumario contra Gobierno pa haya registro di votadornan.
Den Corte tambe tabata presente miembro di Conseho Electoral. Den combersacion cu mr. Sjiem Fat, el a duna di conoce na DIARIO cu e ta sinti cu tratamento di e caso a bay bon na banda di AVP.
PRIVACIDAD DI VOTO
Mr. Sjiem Fat a splica cu Minister Presidente y Conseho Electoral a dicidi cu partidonan cu ta participa na eleccion, no ta haya registro di votadornan. Esaki pasobra Minister Presidente y Conseho Electoral ta haya cu esey ta un violacion di privacidad di votadornan.
CONTROL KEN TA VOTA
AVP no ta di acuerdo cu e decision aki. Mr. Sjiem Fat a mustra cu den Parlamento a dicidi cu cada partido ta haya lista di registro di votadornan, pa asina cada partido por controla. E abogado ta haya cu tin circumstancianan cu ta haci cu no por papia di violacion di privacidad di votadornan. El a bisa cu AVP hasta a trece padilanti cu no tin mester di adres di e votadornan. Solamente AVP kier haya e lista di e nomber di e votadornan y e districto unda nan mester vota. Asina e partido por controla kendenan tur a bay vota.
A puntra e abogado ta cuanto lista cada partido tin derecho di haya y si esaki lo no bira mucho riba man.
E abogado mr. Sjiem Fat a splica cu cada partido tin derecho ariba 2 lista di registro di votadornan. El a mustra cu awendia tur cos a bira electronico, pues ta masha facil pa facilita AVP e listanan.
DIARIO por a compronde cu diaranzon mainta Hues lo dicta sentencia y DIARIO lo informa lectornan di e decision.
