Pa prome biaha den historia:
ORANJESTAD (AAN): Corte Comun di Husticia a dicidi dialuna pa pospone revision di ehecucion di un castigo di prison di bida largo te 31 di augustus venidero. A keda palabra cu tanten Ministerio Publico lo percura pa tene Corte Comun di Husticia na altura tocante e pasonan cu a tuma caba den cuadro di e revision y tocante e pasonan cu lo mester bay tuma ainda. Dialuna tabata prome bes cu Corte a trat’e.
E persona sirbiendo e castigo di bida largo ta e homber C.A.H., cu a wordo sentencia pa asesinato na aña 2006. Actualmente e ta e unico hende na Aruba cu ta cumpliendo cu un condena na cadena perpetuo.
E revision ta marca un momento historico: ta prome biaha cu Corte Comun di Husticia mester tuma un decision asina den un caso Arubiano. Esta, si un persona condena na bida largo por wordo poni den libertad condicional, of no.
Na 2014 a introduci un regulacion nobo den Codigo Penal, cu ta encera cu ora un persona wordo condena pa cadena perpetuo, no ta nifica automaticamente cu e lo keda preso te na su morto.
Ley ta bisa cu hues mester evalua despues di 20 aña si continuacion di e castigo ta ainda necesario y proporcional. Si hues dicidi cu si, anto e revision mester tuma lugar cada 5 aña despues di esey.
E regulacion aki a bin despues di varios dictamen critico di Hof Europeo pa Derechonan Humano. Hof Europeo a determina cu un castigo sin ningun perspectiva di bolbe den sociedad, por wordo considera inhumano. Pesey un castigo di prison pa bida largo mester wordo revisa periodicamente dor di hues. Sin e revision aki, castiga di bida largo lo posibelmente bay en contra e Tratado Europeo pa Derechonan Humano.
E revision di castigo di bida largo ta un innovacion Caribense di ley penal. Hasta na Hulanda e mecanismo aki no ta existi.
Punto di salida di e legislador Arubiano ta cu continuacion di e castigo tin sentido solamente si e ta sirbi un obhetivo rasonabel.
Na mes momento, ta tene cuenta cu interesnan di comunidad y sigur tambe cu posicion di e victima y/of di famia. Den e caso di C.A.H., Ministerio Publico a busca contacto cu famia di e victima pa scucha nan sentimentonan y nan puntonan di bista. Famia a wordo involucra na forma explicito.
Pa evalua e riesgo di recidiva, Corte Comun di Husticia a pidi conseho di expertonan di comportacion di hende, manera psicologonan, psikiatranan y profesionalnan di Reclassering. Nan raportnan ta forma parti fundamental di e decision si e persona por bolbe den pueblo na un manera sigur.
Na e momento aki sinembargo, Corte Comun di Husticia no tin suficiente informacion pa por yega na un huicio definitivo, asina ta cu pesey lo sigui cu e tratamento di e revision na augustus awor.
