Hues a tene cuenta cu e estado di salud di e acusado
- Pero no tin cu bay cera y mester paga daño
ORANJESTAD (AAN): Diahuebs mainta Hues a duna un splicacion amplio pa cu su decision caminda e ta haya e homber adulto mayor E.D. di 79 aña culpabel di a hinca e homber P. dos biaha cu cuchiu y cu no por papia di defensa propio. Pa cu e castigo, Hues a tene cuenta cu e carta di dokter cu ta mustra e seriedad di estado di salud di E.D.
Culpabel di purba mata: Hues a bisa cu E.D. ta wordo acusa cu riba 9 Februari 2024 el a purba di mata e homber P. door di hink’e dos biaha cu un cuchiu grandi. Hues a mustra cu abogado mr. Carlo a bisa, cu mester declara E.D. liber pasobra e no tabatin e intencion y cu el a actua den defensa propio pa su yiu.
Hues a mustra cu e homber P. a declara na Polis cu e tabatin problema cu un yiu homber di E.D., L., y a bringa cun’e riba 9 Februari 2024. Durante e pelea, el a sufri dos hinca y e pareha di P., cu tabata eynan, a saca potret di e homber cu a hinca P., cu ta E.D.
Hues ta conclui cu E.D. ta esun cu a hinca. Hues no ta haya cu E.D. tabatin intencion pa mata pero si cu el a tuma e riesgo cu e hincanan por causa P. su morto. Hues ta haya cu E.D. ta culpabel di a purba mata e homber P.
Rechaza defensa propio: Pa loke ta e cuestion di defensa propio, Hues ta rechaza esaki. Hues no ta haya na su lugar cu E.D. a bay yuda su yiu y a hinca P. cu cuchiu. Na opinion di Hues, door di a usa cuchiu, E.D. ta core e riesgo cu por a mata P.
Hues a remarca cu E.D. mes ta bisa cu e no a hinca. Hues ta kere cu E.D. lo a perde cabez e momento ey y su wowo a bira scur.
Tene cuenta cu salud pa cu castigo: Pa cu e castigo, Hues a mustra cu Fiscal a mustra cu teniendo cuenta cu e edad y salud di E.D., a exigi 2 aña di prizon. Tambe cu Fiscal a mustra cu e caso a tuma lugar mas cu 2 aña pasa. Hues a bisa cu e ta tene cuenta cu e situacion di salud di E.D. Hues a mustra cu ora di E.D. su detencion, dokter a evalua E.D. y a dicidi cu e por a wordo encarcela.
Na dado momento el a wordo laga liber pendiente e caso penal. Sinembargo awor, E.D. su salud a empeora. Ta asina cu E.D. a sufri atake di curason, e ta depresivo. Hues a bisa cu segun e carta di dokter di E.D., E.D. su condicion no ta permiti pa e wordo encarcela den KIA. Hues a sigui bisa cu ademas di su estado di salud, E.D. ta esun cu ta cuida su señora cu ta drumi na cama.
Hues ta haya cu mirando cu e caso a tarda hopi, no tin sentido pa bolbe bay laga dokter evalua E.D. Ademas tin e demanda di daño di e victima, kende tambe kier keda cla.
Hues a condena E.D. na 365 dia di prizon di cual 331 dia ta condicional cu 2 aña di prueba. Esey ta nifica cu E.D. no mester bay sera atrobe.
Pa loke ta daño material exigi di P., Hues no a aproba e daño pa e bril. Hues a bisa cu mirando e situacion di salud di P. caminda e mester a wordo opera, e no por a traha overtime mas y a bay atras den salario. Hues ta haya cu mester paga P. e 15.337 Florin cu P. a demanda.
Hues a condena E.D. pa paga e daño material di 15.337 Florin. Hues ta pone e medida di pago y si E.D. no cumpli cu e pago, E.D. lo no mester bay sera. Esey ta nifica cu Gobierno lo mester bay paga P. e placa.
