Abogado mr. Emerencia
ORANJESTAD (AAN): Diamars di mainta te atardi, Hof di Corte Superior, a trata e apelacion di Shannon Williams (23) contra su condena di 17 aña di prison pa a tira mata su amigo, Eddy Rincon Bravo. Den e articulo aki DIARIO ta publica e defensa di e abogado mr. Emerencia y den un otro articulo, tratamento di e caso y exigencia di Procurador General.
DEFENSA ABOGADO
Despues di a scucha Procurador General (PG) exigi pa subi e castigo di 17 pa 19 aña, mr. Emerencia a bisa Hof cu e lo trece cosnan padilanti cu e famia lo no gusta pero no ta e intension pa bagateliza e morto di Eddy.
EXIGENCIA EXAGERA
Mr. Emerencia a bisa Hof cu e ta haya cu e exigencia di PG ta exagera. Na opinion di e abogado, inhustamente den Promer Instancia, no ta kere declaracion por escrito di W. E abogado a bisa cu W. a haci uso di su derecho di silencio y te den Corte el a papia cu Hues. Na opinion di e abogado, PG no ta haci caso di e declaracion di W. pasobra e lo a duna declaracion mas laat. W. cada vez a bisa cu e lo bay duna declaracion dilanti Hues.
TESTIGO NO POR A WAK TIRAMENTO
E abogado a bisa Hof cu hecho ta cu W. y K. tabata hunto cu e amiga di K., A. Mr. Emerencia a bisa Hues cu K. tabata stuur un right hand drive auto y W. tabata sinta patras di K. Ta imposibel cu K. por a wak cu W. lo a saca un arma.
ACUSADO NO A HORTA PLACA
E abogado a bisa cu W. a desmenti di a horta Eddy, 3 mil florin. E abogado a mustra cu e testigo dama a bisa cu Eddy a bis’e cu “nan” a hort’e. El a bisa cu W. a tir’e. No tabatin 3 mil florin sino 2700 florin. Pakico Eddy ta menciona 3 mil florin. El a mustra cu promer K. no a bisa nada di placa. Seis dia despues e ta declara cu el a mira W. a listra den saco di Eddy y bay cu un cantidad di placa. E dama A. a bisa cu el a scucha W. bisa cu “sea ta ami of abo”. A scucha discusion entre W. y Eddy caminda W. ta pidi Eddy su placa, esta e 50 florin. Despues nan a cuminsa lucha cu otro.
E abogado ta haya cu tin parti di declaracion di A. cu no ta cuadra cu e berdad. A. no a bisa cu el a mira W. coy placa. Ta K. a bisa cu el a mira. Un testigo no ta suficiente. E abogado ta haya cu K. ta gaña. No a haya W. cu ningun placa. A haya 2700 florin na cas di e victima. Abogado ta haya cu no tin prueba cu W. a horta Eddy. Ta solamente Eddy ta bisa cu el a wordo horta. Na opinion di mr. Emerencia, no ta logico cu W., den presencia di otronan, ta bay tira Eddy y horta su placa.
NO A TIRA INTENCIONAL
E abogado a sigui bisa cu contrario na ponencia di PG, no ta intencional W. a tira Eddy. Ningun momento tabata e intension di W. pa a tira mata Eddy. Nan ta amigo di otro. E abogado a mustra cu ta den un espacio chikito patras den auto, nan a lucha cu otro. E no ta kere cu A. por a mira algo pasobra e tabata sinta schuin dilanti di W., mientras cu K. tabata dilanti di W. y no por a mira nada. E abogado ta haya cu no tin prueba di sosten riba e parti di cu W. a tira intencional. E dos testigonan den auto no por a mira nada. W. a bisa cu ta un accidente a sosode. Cada vez por scucha di Fiscal y Hues, cu W. a tira riba Eddy. Esey no ta berdad.
E abogado a mustra cu investigacion ta mustra cu e tiro a drenta Eddy di abao bay den cashi di pecho. Esey ta mustra cu ta na momento cu Eddy a bula for di e auto, e tiro a cay accidental.
Na opinion di mr. Emerencia, tin hopi caso caminda ta bringa pa un arma, un tiro accidental ta los. Esey no kiermen cu intencional a tira. El a mustra cu e momento di luchamento pa e arma, W. a bira panico.
ACUSADO NO TABATIN ARMA
E abogado a bisa Hof cu no tin ningun prueba cu W. tabatin un arma. Anto ta culp'e di posicion di arma. K. no por a mira W. ta saca un arma for di un tas pasobra K. tabata stuur auto y W. tabata sinta su tras. W. a bisa cu Eddy a saca un arma. E abogado a remarca cu ningun momento Polis a bay check unda W. lo a benta e arma.
Pa loke ta demanda di daño, e abogado a cuestiona e hecho cu awor cu a apela e sentencia, PG ta usa ley nobo pa pidi aproba tur e demandanan. E abogado a bisa Hof cu e ta haya cu mester tin un caso mas profundo pa determina e demanda y pa defensa por analisa tur cos. El a pidi Hof pa desaproba e exigencia di PG.
E abogado a pidi Hof pa tene cuenta pa cu e castigo, cu W. pa resto di su bida lo mester carga cu el a mata su amigo. W. no tabatin intension di a mata su amigo. Pidi Hof pa no confirma e sentencia di 17 aña y mucho menos e exigencia di PG. Hof a sera tratamento di e caso y a bisa cu 3 Juli 2024 lo tin sentencia.
