ORANJESTAD (AAN): Dialuna 7 Februari 2022, un total di 11 persona lo mester presenta dilanti Hues pa e caso penal cu Ministerio Publico a cuminsa contra nan.
E caso aki ta hiba e nomber Avestruz y un di e sospechosonan ta Benny Sevinger.
Segun e rol di casonan penal, un total di 11 sospechoso ta aparece y un compania. E sospechosonan cu mester presenta dilanti den Corte ta: Ewald Biemans, Franklin Abath, Edgar Werleman, Ninosca Nuñez, Oslin (Benny) Sevinger, Reina Richardson, Maria Leoncita Arends, Pieter Susebeek, Carlo Mansur, Curt Harms, y Frederic Every.
ACUSACIONNAN: For di vocero di Ministerio Publico a ricibi e acusacionnan:
- Biemans y Susebeek ta worde acusa di soborno di ambtenaar. Biemans ta worde sospecha di a haci esaki entre Januari 2014 pa December 2017 mientras cu Susebeek di Januari 201o pa December 2017.
- Abath ta worde acusa di falsificacion, estafa y abuso di su funcion entre januari 2014 pa December 2017.
- Werleman, Richardson, Nuñez y Arends ta worde acusa di falsificacion, estafa y soborno di ambtenaar. Ta sospecha Werleman y Richardson di a haci esaki entre Januari 2014 te December 2017. Arends ta worde sospecha di a haci esaki entre Januari 2013 te December 2017.
- Sevinger ta worde acusa di falsificacion, estafa, tumamento di regalo of promesa, labamento di placa y abuso di su funcion.
- Mansur ta worde acusa di estafa, falsificacion di Januari 2014 te December 2017.
- Harms ta worde acusa di soborno di un ambtenaar y labamento di placa di Januari 2014 te December 2017.
- Every ta worde acusa di falsificacion, estafa, tumamento di regalo of promesa, labamento di placa y abuso di su funcion entre Januari 2010 te December 2017.
E caso lo bin dilanti pro forma caminda abogadonan y Fiscal lo bay bisa kico mas lo mester haci pa asina ta completamente cla pa fiha un fecha pa tratamento di e caso.
