Mientras cu Fiscal a exigi 6 aña di prison
ORANJESTAD (AAN): Diabierna mainta, pa oranan largo, den Corte a trata e caso penal cu Ministerio Publico a cuminsa contra e homber E. (docente di gym) acusa di a haci actonan inmoral, a abusa di e mucha M. di 9 aña y tambe cu E. tabatin pornografia di mucha.
Fiscal ta haya E. culpabel y a exigi 6 aña di prison y pa 11 aña, E. no por eherce e trabao di docente di deporte.
Den e articulo aki, DIARIO ta publica e defensa di mr. Illes y den un otro articulo, tratamento di e caso.
No tin prueba convicente: Abogado mr. Illes a bisa Hues cu e no ta haya cu tin prueba legal y convicente. E ta haya cu tampoco tin prueba di sosten.
E abogado a bisa Hues cu mirando e acusacionnan serio cu Fiscal a presenta, mester tin prueba legal y convicente pero e no ta haya esey ta e caso. E abogado a remarca cu no tin declaracion di otro testigonan cu a mira algo pasa. E abogado ta haya cu aki ta bay tras di declaracion di e mucha M. so.
E abogado a bisa Hues, cu el a compronde cu Polis a bay e scol pa mira si tin mas victima. Despues di casi 8 luna di investigacion, no a haya ningun otro victima. Na opinion di mr. Illes, esey ta indica segun ley, cu un testigo so no ta suficiente.
E ta haya cu tambe no tin suficiente prueba di sosten. E abogado a bisa Hues cu un mucha por haci declaracion falso pa diferente motibo. Por bien ta cu e tin miedo, e mucha a worde influencia door di mayornan, e mucha ta punta dede riba hende robez.
Mester ta cauteloso: E abogado a bisa Hues cu mester analisa cuateloso e caso y no laga emocionnan influencia e evaluacion. E abogado a mustra cu e declaracion di e mucha ta mustra cu e no por tabata den 4de klas. Na opinion di e abogado, e mucha tabatin 8 aña y lo mester tabata den 3de klas. El a bisa cu ta conoci cu muchanan di 3de klas ta haya les di landamento y no deporte.
Abogado tambe ta haya cu mirando e tempo cortico cu tin pa muchanan cambia paña y bay klas, no ta haci posibel pa e sospechoso E. por a abusa di e mucha M. E abogado a mustra cu e mucha ta papia cu tur cos a sosode den e camber di cambia paña y esey no por tabata posibel.
No tin prueba di sosten: mr. Illes a mustra cu tin testigonan cu ta papia hopi bon di E. pero Fiscal ta wak solamente loke algun ta bisa cu lo ta haya accion di E. straño pa usa como prueba di sosten.
El a remarca cu no tin ningun declaracion di docentenan na school cu ta bisa cu a ripara comportacion straño di e mucha M. na school. Tur esaki ta mustra cu no tin prueba di sosten. E abogado a bisa cu e chat entre E. y un otro mucha tabata wega y nada otro. E ta haya cu no por usa esaki como prueba di sosten.
Mester declara sospechoso liber: E abogado ta haya cu tin duda den e caso aki y mester declara E. liber. Mirando e exigencia pisa di Fiscal, abogado ta haya cu mester ta hopi cauteloso den evaluacion di e caso y ta conclui cu mester declara E. liber. E abogado tambe a cuestiona cu no tur potret di mucha sin paña kiermen e ta pornografia di mucha. Ta depende ki intension tin su tras.
Abogado ta haya cu mester determina si tin aspectonan sexual pa bisa cu ta pornografia di mucha. E abogado ta haya cu pa esaki tambe mester declara E. liber. E abogado a bisa cu si declara E. liber mester desaproba e demanda di daño cu e mama di e victima a presenta den Corte.
Hues a sera tratamento di e caso y a bisa cu dentro di algun siman lo tin sentencia.
