Den caso di inmoralidad
ORANJESTAD (AAN): Diahuebs mainta Corte a trata e caso penal contra e homber M., caminda Fiscal ta haya M. culpabel di a haci inmoralidad cu e dama hoben A. y a masturba riba e laken cu A. tabatin. Fiscal a exigi 180 dia di prison, di cual 75 dia ta condicional cu un tempo di prueba 2 aña. Den e articulo aki ta publica e defensa di abogado di M., mr. Mohamed y den un otro articulo ta publica tratamento di e caso y e punto di bista di Fiscal.
NO POR CONFIA E VICTIMA
Mr. Mohamed a bisa Hues cu den e caso aki tin solamente declaracion di e dama hoben A. compara cu e declaracion di e sospechoso M., kende for di inicio ta desmenti di a mishi cu A. y masturba. E abogado a bisa cu e declaracion di A. no ta confiabel y no por haya prueba di sosten. E abogado a mustra cu A. ta bisa cu M. lo a mishi cu su pia y su parti intimo y lo a masturba riba e laken cu A. tabata tapa su curpa. A manda muestra di e laken cu e liquido pa Instituto Forence na Hulanda (NFI). El a mustra cu A. a manda potret di muha riba e deken. Su siguiente dia despues di e incidente, un agente di Instituto Forence a tuma muestra pa manda NFI. Investigacion di NFI ta conclui cu no tabatin sperma. Mr. Mohamed a bisa Hues cu esaki ta un resultado bon cla cu M. no a masturba riba e laken manera A. a bisa.
NO TIN PRUEBA
E prueba principal aki ta cay afor. Na opinion di mr. Mohamed, esaki ta haci cu e declaracion di A. no ta confiabel y mester declara M. liber. Ademas M. mes a declara cu e tabata drumi y ta ora Polis a bati na porta, el a spierta y habri porta. E abogado a remarca cu un agente di Polis a declara cu ora M. a habri porta, por a mira cu M. lo tabata drumi y net a lanta for di soño. Sinembargo e agente ta haya straño cu M. tabatin un jeans bisti.
Abogado a mustra cu M. mes a declara cu el a lanta y bisti un jeans promer cu el a bay habri porta.
DAMA TA MANIPULA HENDE
Abogado Mr. Mohamed a mustra cu A. ta sufri di problema mental, schizofrinie, y ta bira emocional. A. tin miedo di M. E abogado a bisa Hues cu tabatin problema familiar na cas entre M. y e mama di A. Aki A. a menaza M. cu e lo percura cu M. ta bay cera. Notabel ta cu A. lo a bisa cu un aña anterior caba M. a abusa di dje.
Mr. Mohamed a remarca, pakico A. no a bisa esaki anterior ?! E abogado ta haya cu esaki no por wordo usa como prueba di sosten. E abogado a mustra cu constantemente A. tabata bay na warda di Polis y hiba cos pa dos agente. Nan a hala su atencion pa stop. Polis ta considera e actitud aki di ta purba manipula e agentenan.
E abogado a sigui bisa cu tin un amigo di A. cu a bisa cu e conoce A. bon y cu A. ta manipula hende. Ta parce cu ora A. no haya su kier, e ta manipula hende. E abogado a mustra cu A. a hasta saca potret di e laken muha pa indica cu M. a masturba riba e laken.
Na opinion di abogado, esey ta mustra cu A. a manipula cu prueba y NFI a mustra cu no tin prueba. E abogado a conclui cu no tin prueba cu M. a haci actonan inmoral y mester declara M. liber. Pa loke ta e demanda di daño material, e abogado ta comparti punto di bista di Fiscal pa declara e demanda di daño no admisibel.
ACUSADO A BIRA VICTIMA
- a bisa Hues cu en realidad e no mester a wordo deteni. Door di esey Warda Nos Costa despues di un tempo a sake for di Aruba y el a perde su trabao. M. ta haya cu en realidad ta el a bira victima
Hues a bisa cu e ta bay studia e caso 9 April 2026 lo tin sentencia.
