ORANJESTAD (AAN): Dialuna mainta abogado mr. D. Kock, acompaña pa mr. Illes y ta representando Benny Sevinger y Pieter Susebeek,
a bisa Hues cu no ta asina manera Fiscal ta bisa cu ningun abogado no a haci peticion pa e caso Avestruz.
E abogado a bisa cu a logra studia algun documento y for di esakinan a traha un lista di peticion di investigacion a base di loke nan por a studia.
KIER HAYA DOCUMENTONAN
E abogado a bisa cu nan tambe kier haya documentonan cu Sevinger a mustra di otorgamento di tereno. E abogado a splica cu esaki no ta pa bisa cu e Gobierno promer cu esun di AVP tambe ta culpable sino pa mustra cu esey ta e forma normal di atende cu cuestion di tereno.
E abogado a bisa cu e kier copia di tur peticionnan di tereno durante periodo di gobernacion di Sevinger. Esaki ta pa mustra cu no a scoge hendenan sino cu a haci normal pero otronan no a wordo persigui.
E abogado a sigui bisa cu e kier haya e peticionnan cu Sevinger a manda DIP y e conseho y e terenonan cu a wordo otorga.
SCUCHA TESTIGONAN
Mr. Kock a presenta un lista di nombernan entre otro director di DIP y varios di e acusadonan cu e kier scucha como testigo. Tambe el a pidi pa scucha hendenan di banco.
El a bisa Hues cu por spera cu na Maart – April 2022 tin mas peticion.
KITA PROHIBICION DI CONTACTO
E abogado a pidi Hues pa kita e prohibicion di contacto cu tin contra su clientenan. E ta haya cu esey lo facilita e y mr. Illes nan trabou pa prepara e caso. El a bisa Hues cu kier por tin e libertad di reuni cu clientenan sin cu nan ta wordo sorprendi pa Polis cu lo a viola e contact verbod.
