E ta haya cu e sentencia di Corte ta na su lugar
ORANJESTAD (AAN): Den e apelacion di caso Flamingo, Procurador General (PG), a apelacion contra e declaracion liber di Esser. PG ta haya cu Esser ta culpabel di a wordo cumpra y a yuda hendenan haya trabao.
Mantene sentencia y declara Esser liber: Abogado mr. Emerencia a bisa Hof cu Esser a wordo declara liber di tur acusacion den Corte den Promer Instancia y PG a apela. E abogado a pidi Hof pa mantene e sentencia. El a bisa cu PG ta purba tur forma pa culpa Esser di a wordo cumpra y ta liga cu Oduber den yuda hendenan haya trabao. Pero cu no tin ningun prueba pasobra no tin nada.
No a haci mal uso di funcion: E abogado a mustra cu Esser tabata un empleado di Gobierno y sa bon cu e no por haya placa of regalo pa trabaonan cu e tabata haci. E abogado ta haya cu no ta na su lugar e acusacion di PG cu Esser tabata complice di Oduber den yuda hende haya trabao. Mr. Emerencia a bisa Hof cu Esser tabata haci anotacionnan, traha cartanan pa hendenan cu pidi ayudo pero PG no tin ningun prueba cu Esser a wordo cumpra. Mucho menos, cu Esser a haci mal uso di su funcion. E abogado a bisa Hof cu Esser tabata un empleado cu tabata atende hendenan, yuda traha cartanan. Pero esey no kiermen cu Esser a haci mal uso di su funcion.
Esser tabata un di e hopi colaboradornan cu tabata atende hendenan cu ta busca ayudo. Ningun momento por papia di mal uso di funcion.
Haya logbook den forma ilegal: mr. Emerencia a bisa Hof cu e logbook di Esser ta un concepto politico y no manera PG ta laga aparenta. E abogado a señala cu Landsrecherche a haya esaki den forma ilegal door di Marisol Tromp. Na opinion di mr. Emerencia, esey ta trece cun’e cu tur e informacionnan den e logbook mester wordo poni un banda. E abogado a mustra cu Esser tabata usa su logbook pa pone informacionnan di hendenan cu ta bin serca dje y bisa algo pa asina e no lubida. E abogado a enfatisa cu e logbook no tabata un buki di informacion pa Oduber.
Esser no a wordo cumpra: Pa loke ta e acusacion cu Esser a wordo cumpra, mr. Emerencia a bisa Hof cu no tin nada. E abogado a bisa cu core campaña pa un partido no ta castigabel. Esser no tabata propone hende pa haya promocion of haya trabao door di vota.
E abogado a cuestiona e acusacion di PG cu Vito Croes a cumpra Esser. Mr. Emerencia a bisa Hof cu esaki ta un ayudo familiar di Vito Croes na Esser y no tin nada di haci cu cumpra. E abogado a señala cu segun PG, esaki tabata e forma cu Vito Croes a usa pa asina Esser yuda pa Oduber yuda Vito cu tereno pa proyecto.
E abogado a bisa Hof cu Esser a bisa cu Vito Croes ta padrino di su yiu y cu Vito Croes tabata paga estudio di e yiu y esey tabata promer cu Esser a bay traha cu Oduber. E abogado a mustra cu PG ta papia di tap di mensahe di Vito na Esser di un envelope pa Esser cu mas placa cu normal. E abogado a bisa Hof cu e placa tabata pa donacion na un grupo pa hende malo. El a sigui bisa cu e hecho cu Vito a puntra Esser pa follow up cu Oduber riba tereno, no kiermen cu Vito a cumpra Esser.
- Emerencia a splica Hof cu Vito tabata kier haya un contesta pasobra e peticion tabata pega y nada otro. E abogado a bisa Hof cu Esser tabata haya ayudo familiar di Vito y Vito mes a declara esey na Landsrecherche. Esey ta nifica cu Esser no a wordo cumpra. E abogado ta haya cu no por papia tampoco cu Esser lo a haci mal uso di su funcion. E abogado a pidi Hof pa mantene e sentencia cu Esser ta liber di tur dos acusacion.
